الماتىداعى اباي اتىنداعى قازاق مەملەكەتتىك وپەرا جانە بالەت تەاترىندا «جىل ادامى» فەستيۆالىنىڭ جەڭىمپازدارىنا بەرىلەتىن باستى جۇلدە – «التىن ادام» مۇسىنشەسىن, «قوعامدىق تانىلۋ» سىيلىعىن جانە «جىلدىڭ №1 تاڭداۋى» قۇرمەت مەدالدارىنىڭ يەگەرلەرىن سالتاناتتى تۇردە ماراپاتتاۋ ءراسىمى ءوتتى.
وسىمەن ون سەگىزىنشى مارتە ۇيىمداستىرىلىپ وتىرعان ءداستۇرلى ۇلتتىق جوبا ساياساتتان تىس كوممەرتسيالىق تاۋەلسىز جوبا بولىپ سانالادى. ياعني, جوبانىڭ بارلىق شىعىندارىن ۇلتتىق دەمەۋشىلەر وتەيدى. بۇل سالتانات تەك ءبىزدىڭ ەلىمىزدە عانا ەمەس, باۋىرلاس وزبەكستان مەن قىرعىزستاندا, سونىمەن قاتار ۋكراينا مەن بەلارۋس ەلدەرىندە دە وتكىزىلەدى. «جوبانىڭ باستى ماقساتى – وتانعا دەگەن شىنايى سۇيىسپەنشىلىك. «التىن ادام» سىيلىعى تەگىن تابىس ەتىلەدى جانە اقشالاي سۇيەمەلدەنبەيدى, ونىڭ جالعىز بالاماسى – قوعامنىڭ قۇرمەتى مەن ريزاشىلىعى» دەيدى ۇيىمداستىرۋشىلار.
جەڭىمپازداردى ىرىكتەۋ ەلىمىزدىڭ باستى ايماقتارىندا جۇرگىزىلگەن الەۋمەتتىك ساۋالناما ناتيجەسى مەن ارنايى ساراپشىلاردىڭ زەرتتەۋى مەن باعالاۋى ارقىلى ىسكە اسادى. ەلىمىزدىڭ تانىمال تۇلعالارىنان قۇرالعان قازىلار القاسى قوعامدىق پىكىردى ەسەپكە الىپ, ەڭبەكتەرى, قايسارلىقتارى, ەرەكشە دارىندارى مەن جومارتتىقتارى ەلىمىزدىڭ شىنايى يگىلىگىنە اينالعان قازاقستاندىقتاردى انىقتادى. بيىلعى جوبا مادەنيەت, بيزنەس, مەديتسينا, ونەر جانە سپورت سالالارىندا دارا دەپ تانىلعان ازاماتتار مەن ۇيىمداردى ماراپاتتادى. سونىمەن «جىلدىڭ №1 تاڭداۋى» اتالىمىندا «رەترو» راديوسى ۇزدىك راديو, «كتك» تەلەارناسى ۇزدىك تەلەارنا, «Nur.kz» اقپاراتتىق پورتالى مەن «نوۆوە پوكولەنيە» قوعامدىق-ساياسي گازەتى جەڭىمپاز دەپ تانىلدى. «ەگەمەن قازاقستان» گازەتى دە وسى اتالىم بويىنشا «مەملەكەتتىك تىلدەگى جىل باسىلىمى» دەپ تانىلعانىن ەرەكشە ايتا كەتكەن ءجون.
«التىن ادام» جانە «قوعامدىق تانىلۋ» ماراپاتتارى بىرقاتار ازاماتتارعا ۇسىنىلدى. ناقتىراق ايتساق, ەركىن بوتاقانوۆ وتانعا قىزمەتى ءۇشىن, يرينا تاجىباەۆا ۇزدىك ءبىلىم قايراتكەرى, ولەسيا كەكسەل ۇزدىك مەملەكەتتىك قىزمەتكەر, الەكساندر مەدۆەدەۆ ۇزدىك مۇعالىم, قانات يسلام جىل سپورتشىسى, اسقار كۋليباەۆ وتانعا قىزمەتى ءۇشىن, تالعات تەمەنوۆ ۇزدىك مادەنيەت قايراتكەرى, مۇرات نۇرسەيىتوۆ جىل پوليتسياسى, نۇرلان دالباي ۇزدىك ءمۇسىنشى, كارينا ابدۋللينا, دانا مۇقانوۆا, ۆاليحان مۋسين, ساۋلە سۇلەيمەنوۆا شىعارماشىلىق جەتىستىكتەرى ءۇشىن, يۋري سينياۆسكي, سەرگەي اپارين, «NS راديوسى» كاسىبي جەتىستىكتەرى ءۇشىن, جاقىپ اسانوۆ دەموكراتيالاندىرۋ مەن اشىق قوعام قالىپتاستىرۋعا قوسقان ۇلەسى ءۇشىن, ارتۋر پلاتونوۆ قوعام مەن بيلىك اراسىندا ۇزدىك بايلانىس ورناتقانى ءۇشىن, «دوس-مۇقاسان» ءانسامبلى ۇلتتىق يگىلىكتەرى ءۇشىن جوعارى ماراپاتقا يە بولدى.
ءار جىلى ۇزدىكسىز وتكىزىلىپ كەلە جاتقان بىرەگەي جوبا سان سالادا جان-جاقتى قىزمەت جاساپ كەلە جاتقان ازاماتتار مەن ۇيىمداردى ماراپاتتاپ, اينالاعا شاپاعات شۋاعىن شاشىپ قىسىلعانعا قولداۋ تانىتقان جانى جومارت جانداردى باسقا قوعام مۇشەلەرىنە ۇلگى ەتۋدى كوزدەيدى.
ارمان وكتيابر,
«ەگەمەن قازاقستان»
الماتى