الماتىنىڭ «حالىق ارەنا» سپورت كەشەنىندە كۇرەس تۇرلەرىنەن وليمپيادا جانە الەم چەمپيوناتىنىڭ جۇلدەگەرلەرىنىڭ قاتىسۋىمەن شەبەرلىك ساباعى ءوتتى. شارانى سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى, قر گرەك-ريم, ەركىن جانە ايەلدەر كۇرەسى فەدەراتسياسى, الماتى قالاسى №15 بالالار مەن جاسوسپىرىمدەر سپورت مەكتەبى ۇيىمداستىردى.
ەركىن كۇرەستەن اتلانتا وليمپياداسىنىڭ قولا جۇلدەگەرى ماۋلەن مامىروۆ, گرەك-ريم كۇرەسىنەن بەيجىڭ وليمپياداسىنىڭ كۇمىس جۇلدەگەرى نۇرباقىت تەڭىزباەۆ, ەركىن كۇرەستەن لوندون وليمپياداسىنىڭ قولا جۇلدەگەرى اقجۇرەك تاڭاتاروۆ, ريو وليمپياداسىنىڭ قولا جۇلدەگەرى ەلميرا سىزدىقوۆا, گرەك-ريم كۇرەسىنەن الەم چەمپيوناتىنىڭ كۇمىس جۇلدەگەرى دەمەۋ جادراەۆ, ازيا چەمپيونى ەربول قوڭىراتوۆ, ەركىن كۇرەستەن 1976 جىلعى مونرەال وليمپياداسىنىڭ كۇمىس جۇلدەگەرى الەكساندر يۆانوۆ 200-گە تارتا بالعىن بالۋاندارعا كۇرەستىڭ ايلا-تاسىلدەرىن ءتۇسىندىردى. شارانى ۇيىمداستىرعا ۇيتقى بولعان №15 بالالار مەن جاسوسپىرىمدەر سپورت مەكتەبىنىڭ ديرەكتورى داستان قاناتحانوۆتىڭ ايتۋىنشا, مۇنداي شەبەرلىك ساباعىن وتكىزۋدەگى ماقسات جاس بالۋانداردىڭ شەبەرلىگىن شىڭداي تۇسەدى.
- قازىرگى تاڭدا الماتىداعى «حالىق ارەنا», «الماتى ارەنا», «دوستىق» سپورت كەشەندەرىندە جاس بالۋانداردىڭ كۇرەسپەن شۇعىلدانۋىنا كەرەمەت جاعداي جاسالعان. سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى مەن قر گرەك-ريم, ەركىن جانە ايەلدەر كۇرەسى فەدەراتسياسىنىڭ قولداۋىنىڭ ارقاسىندا جاس بالۋاندارىمىز اتالعان سپورت كەشەندەرىندە تەگىن جاتتىعادى. بۇگىنگى وتكىزىپ وتىرعان سپورتتىق شارادا جاس بالۋاندارىمىز وليمپيادا مەن الەم چەمپيوناتىنىڭ جۇلدەگەرلەرىنەن كۇرەستىڭ ايلا-ءتاسىلىن ۇيرەنىپ, شەبەرلىكتەرىن شىڭداي تۇسەتىنىنە سەنىمىم زور. بولاشاقتا ولار دا اعالارى سياقتى ەل نامىسىن ابىرويمەن قورعاپ, كوك تۋىمىزدى كوكتە جەلبىرەتەتىنى ءسوزسىز, - دەدى د.قاناتحانوۆ.
شەبەرلىك ساباعىنىڭ اشىلۋ سالتاناتىندا جاس بالۋاندار اتاقتى بالۋاندارمەن قاتار تۇرىپ, قازاقستان رەسپۋبليكاسىنىڭ ءانۇرانىن تىڭدادى. ارتىنشا, كەزەك-كەزەگىمەن كىلەمگە شىعىپ, ءار بالۋان وزدەرىنىڭ سۇيىكتى ءادىس-تاسىلدەرىنىڭ قىر-سىرىن كورسەتتى.
سپورتتىق شارانىڭ سوڭىندا جاس بالۋاندار اتاقتى بالۋانداردان قولتاڭبا الىپ, ەستەلىك سۋرەتكە ءتۇستى.
بۇدان كەيىن قر گرەك-ريم, ەركىن جانە ايەلدەر كۇرەسى فەدەراتسياسىنىڭ تورەشىلەر كورپۋسى جانە باپكەرلەر شتابىنىڭ جۇمىسى جونىندەگى ۆيتسە-پرەزيدەنتى ەرلان سادۋاقاس ۇلى قوجاسباي شەبەرلىك ساباعىنا قاتىسقان بالۋانداردى «مەركۋري مەدەت» سپورتتىق-ساۋىقتىرۋ كەشەنىندە ورنالاسقان كۇرەس اكادەمياسىنا باستاپ باردى. ول جەردە بالۋاندار اكادەميانىڭ تىنىس-تىرشىلىگىمەن تانىستى. ەركىن كۇرەستەن اتلانتا وليمپياداسىنىڭ قولا جۇلدەگەرى ماۋلەن مامىروۆ اكادەميا قابىرعاسىندا ءتالىم الىپ جاتقان جاس بالۋاندارعا باتاسىن بەرىپ, اقجول تىلەدى.
ەركەبۇلان الدابەرگەن