ورتالىق كوممۋنيكاتسيالار قىزمەتىندە دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ توراعاسى – باس مەملەكەتتىك سانيتاريالىق دارىگەر جانداربەك بەكشيننىڭ قاتىسۋىمەن ءباسپاسوز ءماسليحاتى ءوتتى.
ول ىشكى نارىققا اكەلىنەتىن جانە اينالىمداعى سانيتاريالىق-ەپيدەميولوگيالىق قاداعالاۋعا جاتاتىن ونىمدەردى باقىلاۋ, سونىمەن بىرگە تاماق ونىمدەرىنىڭ كوتەرمە جانە بولشەك ساۋداسى وبەكتىلەرىنە قويىلاتىن سانيتارلىق قاعيدالار تالاپتارىن قايتا قاراۋ بويىنشا جۇرگىزىلگەن جۇمىس تۋرالى اڭگىمەلەدى.
رەسپۋبليكا بويىنشا وتاندىق ونىمدەردىڭ 12 پايىزى تەحنيكالىق رەگلامەنتتەر تالاپتارىنا سايكەس كەلمەيتىن تاماق ونىمدەرىنىڭ 88 پايىزى يمپورتتىق ونىمدەر ۇلەسىنە تيەسىلى ەكەنىن اتاپ ءوتتى. تەحنيكالىق رەگلامەنتتەر تالاپتارىنىڭ نەگىزگى بۇزۋشىلىقتارى قاۋىپسىزدىك تالاپتارىنا سايكەس كەلمەۋ بويىنشا – 36 پايىز, فيزيكالىق-حيميالىق كورسەتكىشتەرگە سايكەس كەلمەۋى – 12 پايىز, وندىرۋشىلەردىڭ تاڭبالاۋ قاعيدالارىن بۇزۋى 48 پايىزدى قۇرايدى.
قوعامدىق دەنساۋلىق ساقتاۋ كوميتەتى توراعاسىنىڭ سوزىنشە, جانۋارلار تىندەرىن سايكەستەندىرۋدى انىقتاۋ بويىنشا تاماق ونىمدەرىنىڭ 145 ۇلگىسى الىنعان. 40 ۇلگىدە ءونىمنىڭ تاڭبالاۋىندا كورسەتىلمەگەن شوشقا دنق-سى انىقتالعان. «ەت ءونىمى توپتارى بويىنشا شۇجىق بۇيىمدارىنىڭ 67,5 پايىز سىناماسىندا, جارتىلاي فابريكاتتاردىڭ 20,0 پايىز سىناماسىندا جانە ەت كونسەرۆىلەرىنىڭ 7,5 پايىز سىناماسىندا سايكەسسىزدىك انىقتالدى», دەدى ول.
جانداربەك بەكشيننىڭ مالىمەتىنشە, سايكەس كەلمەيتىن تاماق ونىمدەرىنىڭ باسىم سەگمەنتى رەسەي فەدەراتسياسى وندىرۋشىلەرىنىڭ ۇلەسىندە (52 پايىز).
«بۇل ءسۇت ونىمدەرى, بالىق جانە ەت كونسەرۆىلەرى, شۇجىق جانە كونديتەرلىك ونىمدەر, باق جانە بالالار تاعامى وندىرۋشىلەرى. سونىمەن قاتار قىرعىز رەسپۋبليكاسىنىڭ سايكەس كەلمەيتىن ونىمدەرىنىڭ 4 پايىزدان 9,6 پايىزعا دەيىن ءوسۋى بايقالادى. قىرعىزستاندىق وندىرۋشىلەردىڭ ءسۇت ونىمدەرى مەن كونديتەرلىك بۇيىمدارىنىڭ بىرقاتارىنىڭ تەحنيكالىق رەگلامەنتتەر تالاپتارىن جۇيەلى تۇردە بۇزۋ فاكتىلەرى بايقالۋدا. مىسالى, 2016 جىلى كوميتەت ميكروبيولوگيالىق كورسەتكىشتەر بويىنشا «اق-ءسۇت» ااق شارۋا مايى ءسۇت ءونىمىن, ماي-قىشقىل قۇرامى بويىنشا «ۆيمم بيل دامم» ااق ءسۇتىن, جالعاندىعى بويىنشا «كۋليكوۆسكي» كد كونديتەرلىك ونىمدەرىن اكەلۋگە ۋاقىتشا شەكتەۋ ەنگىزدى. تەك قازان ايىندا عانا قىرعىزستاندىق وندىرۋشىلەردىڭ سايكەس كەلمەيتىن تاماق ونىمدەرىنىڭ ۇلەسى – 23,4, ال جەڭىل ونەركاسىپ تاۋارلارى 44 پايىزدى قۇرادى, بۇل ءاربىر 2-3-ءشى سىناما», دەپ اتاپ ءوتتى ول.
ج.بەكشيننىڭ ايتۋىنشا, اعىمداعى جىلى انىقتالعان فاكتىلەر نەگىزىندە ونىمدەردى ساتىپ الۋ قورىتىندىسى بويىنشا بۇزۋشىلىقتى جويۋ تۋرالى 801 نۇسقاما بەرىلگەن, اكىمشىلىك قۇقىق بۇزۋشىلىقتار تۋرالى 826 ءىس قوزعالعان, سوتتىڭ 415 قاۋلىسى شىعارىلعان, ونىڭ ىشىندە 360 تالاپ ارىز قاناعاتتاندىرىلىپ, جالپى سوماسى 19,5 ملن تەڭگەدەن استام ايىپپۇل سالىنعان. سونىمەن قاتار ساۋدا كاسىپورىندارىندا 11,2 ملن تەڭگەدەن استام سوماعا سايكەس كەلمەيتىن ءونىمنىڭ 172 تونناسى ساۋدادان الىنعان.
راۋان قايدار, «ەگەمەن قازاقستان»