وسكەمەندە تۇڭعىش پرەزيدەنت كۇنىنە وراي قالالار, اۋداندار بويىنشا مەملەكەتتىك قىزمەتكەرلەر اراسىندا وبلىستىق سپارتاكيادا باستالدى.
اتالمىش سايىس وسىمەن 16-ىنشى مارتە وتۋدە. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى حابارلادى. جارىستىڭ اشىلۋ سالتاناتىنا باسقارما باسشىسى اسقار موجانوۆ قاتىستى.
«سىزدەردى ايماق باسشىلىعى جانە دەنە شىنىقتىرۋ جانە سپورت باسقارماسى اتىنان مەملەكەتتىك قىزمەتكەرلەر اراسىنداعى وبلىستىق سپارتاكيادانىڭ اشىلۋىمەن قۇتتىقتايمىن. مۇنداعى بارلىق جانكۇيەرلەردى سپورتشىلارىمىزدى بەلسەندى تۇردە قولداۋعا شاقىرامىن. بارلىق مەملەكەتتىك قىزمەتكەرلەرىمىز شىنىققان, شىمىر بولسا قۋانارلىق جايت. بارشاڭىزعا ساتتىلىك تىلەيمىن», – دەدى باسقارما باسشىسى.
ۇيىمداستىرۋشىلاردىڭ ايتۋىنشا, بۇل جارىسقا بارلىعى 48 كوماندا, 1500-عا جۋىق مەملەكەتتىك قىزمەتكەر قاتىسادى دەپ جوسپارلانۋدا. قاتىسۋشىلار سپورتتىڭ 7 ءتۇرى بويىنشا باق سىناسۋدا. اتاپ ايتساق, فۋتزال, ۆولەيبول, ۇستەل تەننيسى, سۋدا ءجۇزۋ, شاڭعى جارىسى, شاحمات جانە بيليارد سىندى سپورت تۇرلەرىنەن باسەكە ءوربيتىن بولادى. سايىسقا سەمەي, ريددەر, كۋرچاتوۆ, زىريان قالالارىنان جانە ءوڭىرىمىزدىڭ بارلىق اۋداندارىنان سپورتشىلار قاتىسۋدا. وبلىستىق سپارتاكيادادا الەۋەتتىك قۇرىلىمدار قىزمەتكەرلەرى, وبلىستىق باسقارما قىزمەتكەرلەرى, اۋداندىق دەپارتامەنت قىزمەتكەرلەرى جارىس جولىنا شىقتى. اتالمىش جارىس كەلەر جىلدىڭ اقپان ايىنا دەيىن جالعاساتىن بولادى.
ازامات قاسىم,
«ەگەمەن قازاقستان»
وسكەمەن