ەلباسى نۇرسۇلتان نازارباەۆ ءار جولداۋىندا الەۋمەتتىك ساياساتتى جۇزەگە اسىرۋعا ەرەكشە ءمان بەرىپ كەلەدى. ماڭىزدى قۇجاتتا مەملەكەت باسشىسى ەكونوميكالىق كەدەرگىلەرگە قاراماستان, الەۋمەتتىك جاعىنان از قامتىلعان تۇرعىنداردى قولداۋعا باعىتتالعان ءىس-شارالاردىڭ جالعاسىن تاباتىندىعىن باسا ايتادى. اتالمىش العىشارتتاردىڭ نەگىزىندە قاراعاندىنىڭ ساران قالاسىندا الەۋمەتتىك از قامتىلعان جانە كوپبالالى وتباسىلاردىڭ بالالارى ءۇشىن تەگىن ساباقتار جۇرگىزىلىپ كەلەدى. ساباقتاردى «Zhas Project» بىرلەسكەن جوبا نەگىزىندە حالىقارالىق قايتا قۇرۋ جانە دامۋ بانكى مەن ءبىلىم جانە عىلىم مينيسترلىگى ۇيىمداستىرۋدا.
«سوزۆەزديە تالانتوۆ» بالالار كلۋبىنداعى ۇزارتىلعان توپتا الەۋمەتتىك از قامتىلعان جانە كوپبالالى وتباسىلاردان شىققان بالالار قازاق, ورىس جانە اعىلشىن تىلدەرىن, دۇنيەتانۋ, ماتەماتيكا پاندەرىن وقىپ, دەنە شىنىقتىرۋمەن اينالىسادى.
وسىنداي ورتالىق اشۋ تۋرالى باستامانى كوتەرگەن اباي قۇنانباي ۇلى اتىنداعى ساران گۋمانيتارلىق-تەحنيكالىق كوللەدجىنىڭ تۇلەكتەرى.
– ءبىز «Zhas Project» جوباسى تۋرالى ەستىدىك جانە ول اتا-انالارى رەپەتيتورلارعا تولەي المايتىن وتباسىلاردىڭ بالالارى ءۇشىن تەگىن كۋرستار اشۋ ءۇشىن جاقسى مۇمكىندىك دەپ شەشتىك, – دەيدى وسى ورتالىقتىڭ نەگىزىن قالاۋشىلاردىڭ ءبىرى يۋليا زاحاروۆا. – ءبىز جوبا جەتەكشىلەرىنە بىزگە عيمارات بەرۋ مەن قارجىلاي كومەكتەسۋ تۋرالى حات جولدادىق. ولار كەلىستى.
بالالارمەن جۇمىستى باستاماس بۇرىن ۇيىمداستىرۋشىلار جوبا اياسىندا استانادا ۇيىمداستىرىلعان ارنايى كۋرستان وتكەن. سونداي-اق ولارعا تالىمگەر بەلگىلەنگەن, ول قىزدارعا ءتۇرلى ماسەلەلەر بويىنشا كەڭەس بەرىپ, قيىن جاعدايلاردا كومەكتەسەدى.
بۇگىندە ورتالىقتا از قامتىلعان وتباسىلاردان 20 بالا ءبىلىم الۋدا.
– ءبىز مەكتەپتەردە ناسيحات جۇمىستارىن جۇرگىزدىك, الەۋمەتتىك از قامتىلعان جانە كوپبالالى وتباسىلاردان شىققان وقۋشىلاردىڭ ءتىزىمىن الدىق, – دەپ ەسىنە ءتۇسىردى يۋليا زاحاروۆا. – باستاپقىدا ءبىرازى بىزگە سەنبەدى, ءبىزدىڭ قارجىمىز جوق دەدى, ولار ءبىز وقۋلار اياقتالعان سوڭ اقى تالاپ ەتەدى دەپ ويلادى. الايدا, ۋاقىت وتە كەلە بىزگە بالالارىن الىپ كەلە باستادى, بارلىعى دا تەگىن ءارى شىن ەكەنىنە كوزدەرى جەتتى. قازىر ونداي سەنىمسىزدىك جوق. جوبا ساران قالاسىندا بيىلعى جىلدىڭ شىلدە ايىندا ىسكە اسىرىلا باستادى. ەگەر دە ولار التى ايدا, ياعني جەلتوقسان ايىنا دەيىن وزدەرىنىڭ قاجەتتى ءارى پايدالى ەكەنىن دالەلدەسە, وندا ۇيىمداستىرۋشىلارعا جۇمىستارىن جالعاستىرۋ مۇمكىندىگى بەرىلەدى.
جاستار كورپۋسىن دامىتۋ جوباسى – بۇل حالىقارالىق قايتا قۇرۋ جانە دامۋ بانكى مەن ءبىلىم جانە عىلىم مينيسترلىگىنىڭ بىرلەسكەن جوباسى. جوبانىڭ ماقساتى – جاستاردى, اسىرەسە وسال جاستار توبىن قوعامداستىق ومىرىنە جانە دە قوعامداستىق يگىلىگى ءۇشىن پايدالى قوعامدىق قىزمەتتەرگە تارتۋ ارقىلى ومىرلىك قاجەتتى تاجىريبەلەردى دامىتۋ.
جوبا سىناق تۇرىندە ءتورت وبلىستا جۇزەگە اسىرىلىپ وتىر. پاۆلودار, قاراعاندى, الماتى جانە وڭتۇستىك قازاقستان وبلىستارىندا اتالمىش ورتالىقتار ءوز جۇمىستارىن جەمىستى اتقارىپ جاتىر دەۋگە تولىق نەگىز بار.
جوباعا ساي باسىمدىق ەش جەردە وقىمايتىن, جۇمىس ىستەمەيتىن جاستارعا, جۇمىس جاسايتىن, الايدا الەۋمەتتىك جاعدايى تومەن جاستارعا بەرىلەدى.
ميراس اسان, «ەگەمەن قازاقستان»
قاراعاندى وبلىسى