بيىل قازاقستاندا بەس ادام «دەنگە» بەزگەگىن جۇقتىرسا, ۇشەۋى قىزىلجار ءوڭىرىنىڭ تۇرعىندارى بولىپ شىققان. بۇل تۋرالى وبلىستىق قوعامدىق دەنساۋلىق ساقتاۋ دەپارتامەنتىندە وتكەن بريفينگتە ايتىلدى.
اسا قاۋىپتى جۇقپالى اۋرۋلار ەپيدەميولوگيالىق قاداعالاۋ ءبولىمىنىڭ جەتەكشىسى تولقىن قاجەنوۆانىڭ سوزىنە قاراعاندا, سوڭعى جاعداي قازان ايىندا تىركەلگەن. تايلاندتا دەم العان 30-40 جاس ارالىعىنداعى ەرلى-زايىپتىلار مەن ۆەتنامعا ساپارلاعان ەر ادام بەزگەك اۋرۋىنا شالدىققان. ولار ەلگە ورالعاننان كەيىن وزدەرىن جايسىز سەزىنە باستاعان. دەنە قىزۋىنىڭ كوتەرىلۋى, باس اينالۋ, لوقسۋ, تابەتتىڭ ازايۋى سەكىلدى تۇماۋعا ۇقساس بەلگىلەر بىلىنگەن سوڭ دارىگەرلەرگە قارالۋعا ءماجبۇر بولعان. مەديتسينالىق تەكسەرۋلەر قورىتىندىسى بويىنشا «دەنگە» بەزگەگى دەگەن دياگنوز قويىلعان.
قازىر ناۋقاستاردىڭ جاعدايى جاقسى. جان-جاقتى ەم-دوم شارالارى كورسەتىلدى. قوزدىرعىش تروپيكالىق ايماقتاردا عانا كەزدەسەتىن ماسالار ارقىلى جۇققان. ساقتانباۋدىڭ سوڭى وسىنداي وقىس وقيعالارعا سوقتىرىپ جاتادى. سوندىقتان شەتەلدەرگە شىققاندا الدىن الا قام-قارەكەت جاساعان ءجون, دەيدى ماماندار.
جىل سايىن «دەنگە» بەزگەگىنە 50 ميلليونداي ادام شالدىعىپ, 20 مىڭعا جۋىعى ومىرمەن قوشتاسادى ەكەن. بۇل دەرت تايلاند, قىتاي, يندونەزيا, مالايزيا, جاپونيا, كوستا-ريكا, تاعى باسقا ەلدەرگە كەڭ تارالعان.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى