استانادا قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسى ءوتتى. ءىس-شاراعا مەملەكەتتىك حاتشى گۇلشارا ابدىقالىقوۆا, قحا توراعاسىنىڭ ورىنباسارى – حاتشىلىق مەڭگەرۋشىسى دارحان مىڭباي, ءماجىلىس دەپۋتاتتارى, ورتالىق جانە جەرگىلىكتى اتقارۋشى ورگانداردىڭ باسشىلارى, كەڭەس مۇشەلەرى, قوعام قايراتكەرلەرى, عىلىم جانە شىعارماشىل زيالى قاۋىم قاتىستى.
جيىندا ءسوز سويلەگەن مەملەكەتتىك حاتشى گ.ابدىقالىقوۆا ەلباسى نۇرسۇلتان نازارباەۆتىڭ تاپسىرماسى بويىنشا قازاقستاندا ەكونوميكانى, ساياسات پەن قوعامدىق سانانى قامتيتىن جۇيەلى ءارى اۋقىمدى جاڭعىرتۋ باستالىپ كەتكەنىن اتاپ ءوتتى.
وسى ورايدا, مەملەكەتتىك حاتشى ەلىمىز بەن قازاقستان حالقى اسسامبلەياسىنىڭ جاڭا دامۋ قادامىنا بەت العانىنا توقتالدى. ونىڭ ايتۋىنشا, قوعامدىق سانانى دامىتۋعا باعىتتالعان «رۋحاني جاڭعىرۋ» باعدارلاماسى اسسامبلەيا جۇمىسىنا تىڭ سەرپىن بەردى. ماسەلەن, ەلىمىزدە 1 338 ەتنومادەني بىرلەستىكتىڭ جۇمىس ىستەيدى, 41 دوستىق ءۇيى اشىلدى, 3 مىڭداي قوعامدىق كەلىسىم كەڭەستەرى قىزمەت اتقارادى.
گ.ابدىقالىقوۆا قحا اياسىندا جاسالاتىن قايىرىمدىلىق ءىس-شارالارىنىڭ دا وڭ ناتيجە كورسەتكەنىن اتاپ ءوتتى. ماسەلەن, ەكى جىل بۇرىن مۇنداي ۇيىمداردىڭ قۇرامىندا 900-گە جۋىق ادام بولعان. بۇگىندە ولاردىڭ سانى 30 مىڭنان اسىپ جىعىلادى. مەملەكەتتىك حاتشى كەلتىرگەن دەرەكتەرگە سۇيەنسەك, 500 مىڭنان استام ادام, 18 مىڭنان استام ۇيىم 4,1 ميلليارد تەڭگەدەن استام قاراجات كولەمىندە قايىرىمدىلىق كومەك الدى.
مەملەكەتتىك حاتشى «تۋعان جەر», «قازاقستاننىڭ كيەلى جەرلەرىنىڭ گەوگرافياسى», «جاھانداعى زاماناۋي قازاقستاندىق مادەنيەت», مەملەكەتتىك ءتىلدى لاتىن گرافيكاسىنا كوشىرۋ جونىندەگى جوبالاردى ىسكە اسىرۋعا بارلىق ەتنومادەني بىرلەستىكتىڭ اتسالىسۋى كەرەك ەكەنىنە نازار اۋداردى.
«رۋحاني جاڭعىرۋ بارىسىنا قازاقستاننىڭ ءاربىر ازاماتى اتسالىسۋى كەرەك. قازاقستان حالقى اسسامبلەياسى ەلدەگى ءار ايماقتا قوعامدىق سانانى جاڭعىرتۋ جوبالارىن ورىنداۋعا ءوز ۇلەسىن قوسىپ كەلەدى. اسىرەسە, اسسامبلەيانىڭ ايماقتارداعى وفيستىك جوبالارعا قاتىسقانى ماڭىزدى. قازىرگى تاڭدا قحا مىڭداعان ايماقتىق جوبامەن اينالىسادى. بۇعان قوسا, اسسامبلەيانىڭ 76 جەكە جوباسى بار», دەدى گ.ابدىقالىقوۆا.
مەملەكەتتىك حاتشى كەلەر جىلى ەلوردانىڭ 20 جىلدىعى اتاپ وتىلەتىنىن جەتكىزدى. ونىڭ ايتۋىنشا, استانا – تاۋەلسىز قازاقستاننىڭ سيمۆولى ىسپەتتى. ءارى جاڭا شاھار – پرەزيدەنت يدەياسىن ىسكە اسىرۋدىڭ كورىنىسى جانە بۇكىل حالىقتىڭ ەڭبەگىنىڭ ناتيجەسى. وسى ايتۋلى مەرەيتويعا وراي, گ. ابدىقالىقوۆا قحا-عا ءتيىستى ءىس-شارالار جوسپارىن ازىرلەۋدى ۇسىندى.
سونىمەن قاتار, گ.ابدىقالىقوۆا قحا-نىڭ «ەكسپو-2017» حالىقارالىق مامانداندىرىلعان كورمەسىنە قاتىسۋىن دا جوعارى باعالادى. ونىڭ سوزىنە سۇيەنسەك, ەلباسى ن.نازارباەۆتىڭ قوعامدىق كەلىسىم مەن جالپىۇلتتىق بىرلىكتىڭ بىرەگەي مودەلىن تانىستىرۋى شارا اياسىنداعى ەڭ ماڭىزدى وقيعالاردىڭ ءبىرى بولدى.
قحا توراعاسىنىڭ ورىنباسارى – حاتشىلىق مەڭگەرۋشىسى د.مىڭباي ءوز سوزىندە 2017 جىلدىڭ قازاقستان ءۇشىن وتە ءساتتى وتكەنىن مالىمدەدى. بيىلعى ەلەۋلى وقيعانىڭ قاتارىندا سانالاتىن ەلباسىنىڭ «بولاشاققا باعدار: رۋحاني جاڭعىرۋ» ماقالاسى حالىقتىڭ ساناسىنا سەرپىن بەرىپ, ويىنا وي قوسىپ جاتىر.
«حالىقتى ءتول تاريحى ارقىلى تاربيەلەۋ, سالت-ءداستۇر اياسىندا توپتاستىرۋ, جالپىۇلتتىق مۇددەگە جۇمىلدىرۋ, جەكە ادامنىڭ ونەگەسى ارقىلى ءپاتريوتيزمدى قالىپتاستىرۋ سەكىلدى بىرىكتىرۋشى يدەيالاردى ىسكە اسىرۋ, جاڭعىرۋدىڭ وزەگى بىرەگەيلىكتى نىعايتۋ ماقساتىندا قازاقستان حالقى اسسامبلەياسىنا دا بىرقاتار مىندەتتەر قويىلدى», دەدى د.مىڭباي.
سونداي-اق, كەڭەيتىلگەن وتىرىستا «قحا دوستىق ەلشىسى» قۇرمەتتى اتاعىن بەكىتۋ ماسەلەسى قاراستىرىلدى. د.مىڭبايدىڭ ايتۋىنشا, بۇل – وتە وزەكتى تاقىرىپ. ويتكەنى, كوپتەگەن مەملەكەتتەر اسسامبلەيانىڭ جۇمىسىن جوعارى باعالاپ, ەلىمىزدىڭ تاجىريبەسىن ءوز ەلىنە ەنگىزۋگە قۇشتارلىق تانىتىپ وتىر.
جاڭا اتاق قازاقستان حالقىنىڭ مۇددەلەرىنە وكىلدىك ەتەتىن, سونداي-اق قازاقستاننىڭ جانە ءوزى تۇراتىن مەملەكەت اراسىنداعى ەكىجاقتى قارىم-قاتىناستاردى دامىتۋ مۇددەسىنە قىزمەت ەتەتىن تۇلعا. «قازاقستان حالقى اسسامبلەياسىنىڭ دوستىق ەلشىسى» ءوز جۇمىسىن قحا باسشىلىعىمەن كەلىسە وتىرىپ اتقارادى. سونىمەن قاتار, جىل سايىن اتقارعان قىزمەتى جونىندە اسسامبلەياعا ەسەپ بەرۋگە مىندەتتى.
جيىن بارىسىندا «قازاقستان حالقى اسسامبلەياسى تۋرالى» زاڭعا ەنگىزىلەتىن وزگەرىستەر مەن تولىقتىرۋلار جوباسى, «قازاقستان حالقى» ينتەراكتيۆتىك تاريح كارتاسىنىڭ, كوپ فۋنكتسيونالدى مۋلتيمەديالىق پورتالدىڭ ازىرلەنۋ بارىسى, «رۋحاني جاڭعىرۋ» باعدارلاماسىن ىسكە اسىرۋداعى پاۆلودار وبلىستىق اسسامبلەياسىنىڭ تاجىريبەسى تالقىلاندى.
كەڭەس ۇيىمداستىرۋ ماسەلەلەرىن قاراستىرىپ, قازاقستان پرەزيدەنتى – قازاقستان حالقى اسسامبلەياسىنىڭ توراعاسىنا «بiرلiك» التىن مەدالىمەن, «جومارت جان» توسبەلگىسىمەن, قحا توراعاسىنىڭ قۇرمەت گراموتاسىمەن جانە العىس حاتىمەن ماراپاتتاۋ ءۇشىن كانديداتۋرالار بويىنشا ۇسىنىستار ەنگىزدى.
اباي اسانكەلدى ۇلى,
«ەگەمەن قازاقستان»
سۋرەتتى تۇسىرگەن, ەرلان وماروۆ