«ەگەمەن قازاقستان» گازەتىنىڭ 24 قازان كۇنگى نومىرىندەگى «ادۆوكاتتىق كومەك قايتكەندە قاۋقارلى بولماق؟» اتتى ساراپتامانى وقىپ, ونىڭ دەر كەزىندە ناقتى جازىلعانىنا ريزا بولدىم. سوعان وراي «ادۆوكاتتىق قىزمەت جانە زاڭ كومەگى تۋرالى» زاڭ جوباسىنا ساي مامان رەتىندە ءوز ويلارىمدى دا بىلدىرسەم دەيمىن.
حالىقتىڭ ادۆوكاتتىق قىزمەتكە دەگەن سۇرانىسىن قامتاماسىز ەتۋ ماقساتىندا بۇل ماماندىققا كىرۋ ءتارتىبى وڭتايلاندىرىلىپ, زاڭ جوباسىندا ادۆوكات ماماندىعىنىڭ قولجەتىمدىلىگىن قامتاماسىز ەتۋ ماقساتىندا العاشقى مۇشەلىككە كىرۋ ءۇشىن تولەنەتىن جارناپۇل مۇلدەم الىپ تاستالادى دەگەنى وتە دۇرىس. سەبەبى كوپتەگەن ازاماتتارعا وسى مۇشەلىككە كىرۋ ءۇشىن تولەنەتىن جارناپۇل كەدەرگى كەلتىرىپ وتىر. الىسقا بارماي-اق قويايىن, مەنىڭ ءوزىم دە ليتسەنزيامدى العان سوڭ كوپكە دەيىن وسى جارناپۇلدى تولەۋگە مۇمكىندىگىم بولماي, مۇشەلىككە كىرە الماي ءجۇردىم. سوندىقتان دا, مۇشەلىككە كىرۋ ءۇشىن تولەنەتىن جارناپۇلدى الىپ تاستاۋدى قالايمىن. ادۆوكاتۋراعا قازىرگى كەزدەگى كوزقاراستاعى زاماناۋي جاستار كەلگەنى دۇرىس. سەبەبى بارلىق قۇقىقتىق سالالاردا, سوتتاردا جاڭارتۋلار جۇرگىزىلىپ, بارلىق جۇمىستار ەلەكتروندى جۇيەگە ءوتىپ جاتىر. ەسكى, كەڭەستىك داۋىردەگى تۇسىنىكتەن ارىلۋىمىز قاجەت, قاتارىمىزدا جاستارعا جۇمىس جاساۋعا مۇمكىندىك بەرىلگەنى دۇرىس دەپ سانايمىن. قاتارىمىز كوبەيسە, باسەكەلەستىك ارتادى جانە ادۆوكاتتار دا وزدەرىنىڭ كاسىبي بىلىكتىلىگىن كوتەرۋگە ىنتالانادى دەپ سانايمىن.
سونداي-اق زاڭ جوباسىندا 2020 جىلدان باستاپ مىندەتتى ساقتاندىرۋ ينستيتۋتى ەنگىزىلمەك. وتە قولداۋعا تۇرارلىق حالىققا جاعىمدى تالاپ دەپ سانايمىن. سەبەبى ساپاسىز زاڭ كومەگى كورسەتىلگەن جاعدايدا ازاماتتاردىڭ ساقتاندىرۋ وتەماقىسىن الۋ مۇمكىندىگى جۇزەگە اسىرىلاتىن بولادى. بۇل ارامىزدا ساپاسىز زاڭ كومەگىن كورسەتەتىن ادۆوكاتتار مەن زاڭ كەڭەسشىلەرى بولماۋى ءۇشىن قاجەت. ساقتاندىرۋ ماقساتتارىندا كاسىبي قاتەلىكتەر بولىپ مىنالار بەلگىلەنىپ وتىر: ءىس قاراۋ مەرزىمدەرىن جىبەرىپ الۋ; قۇجاتتاردى دۇرىس رەسىمدەمەۋ; جاسالعان زاڭدى ارەكەتتەر سالدارىنان كەلتىرىلگەن زيان تۋرالى ءۇشىنشى تۇلعانى حاباردار ەتپەۋ; ساقتاندىرىلۋشىمەن (ساقتاندىرىلعان تۇلعامەن) زاڭ كومەگىن كورسەتۋ بارىسىندا جۇگىنۋشىدەن الىنعان قۇجاتتاردى جوعالتۋ نەمەسە ءبۇلدىرۋ جانە ادۆوكاتتىق قۇپيا دەپ سانالاتىن اقپاراتتاردى زاڭسىز تاراتۋ. زاڭ جوباسىنداعى رەتتەلگەن وسى ساقتاندىرۋ وتە قاجەت دەپ سانايمىن, سەبەبى ءبىز ءوزىمىزدىڭ كاسىبي جاۋاپكەرشىلىگىمىزدى ساقتاندىرامىز.
سونىمەن بىرگە زاڭ جوباسىنداعى تاعى ءبىر جاڭالىق – ۇسىنىلاتىن قىزمەتتەر تاريفتەرىنىڭ سەتكاسىن (تور) بەكىتۋ. بۇل ءوز كەزەگىندە ازاماتتارعا كورسەتىلەتىن قىزمەتتىڭ ورتاشا باعاسىن انىقتاۋعا مۇمكىندىك بەرە وتىرىپ, تولەماقىنىڭ نەگىزسىز كوتەرىلۋىنىڭ الدىن الادى. تاريفتىك سەتكا رەسپۋبليكالىق ادۆوكاتتار القاسىمەن ازىرلەنىپ بەكىتىلەدى. ول ۇسىنىمدىق سيپاتتا بولادى جانە اشىق جاريالانادى دەپ وتىر. بۇل تالاپتى دا دۇرىس دەپ ەسەپتەيمىن. سەبەبى كليەنتتەر ادۆوكاتتى تاڭداۋ جاساۋ مۇمكىندىگىنە يە بولار ەدى دەپ ويلايمىن.
بۇدان بولەك, زاڭ جوباسىنا سايكەس ادۆوكاتتىڭ وكiلەتتiكتەرiن كۋالاندىرۋ رەتتەلگەن. وندا ادۆوكاتتىڭ ناقتى ءىستى جۇرگىزۋگە وكىلەتتىگى ادۆوكاتتىڭ كۋالىگىمەن جانە پروتسەسسۋالدىق زاڭناماسىمەن بەلگىلەنگەن تارتىبىنە سايكەس دالەلدەنەدى دەگەنى دە جاعىمدى جاڭالىق. سەبەبى وردەر بۇرىنعى كەڭەس داۋىرىنەن قالعان قالدىق دەسەك تە بولادى. تەك بوس اۋرەشىلىككە سالىنامىز. ازاماتتىق ىستەردە سەنىمحات بولسا, ال قالعان اكىمشىلىك جانە قىلمىستىق ىستەردە پروتسەسسۋالدىق زاڭنامالارعا وزگەرتۋلەر ەنگىزىلىپ, وكىلەتتىگىمىزدى وردەرسىز جۇرگىزۋ ءتارتىبى رەتتەلسە قۋانار ەدىم. سەبەبى كەيدە وسى وردەر جوق دەپ, كليەنتپەن شارتقا وتىرا الماي قالاتىن كەزىمىز بولادى, وردەر كوپ كەدەرگى كەلتىرەدى ءارى سوتقا دا, قۇقىق قورعاۋ ورگاندارىنا دا وردەر جوق بولسا, ادۆوكات بولىپ تاعايىندالا المايسىڭ. وردەر زاڭ جوباسىنا سايكەس الىنىپ تاستالسا, وسىنداي كەدەرگىلەردەن قۇتىلار ەدىك. زاڭ جوباسىندا مىنە, وسىنداي ءتيىمدى جاقتار بار. مۇنى جۋرناليست الەكساندر تاسبولات اتالعان ساراپتامادا جۇيەلى تۇردە جەتكىزگەن. ماقالادا ايتىلعانداي, زاڭنىڭ جاڭارتىلعانى قاجەت دەپ سانايمىن. سەبەبى حالىقتى زاڭ كومەگىمەن قولجەتىمدى تۇردە قامتاماسىز ەتۋدە اتالعان زاڭ جوباسىندا ءتيىمدى جاقتار بارشىلىق.
رىستى قاليەۆا, اتىراۋ وبلىستىق ادۆوكاتتار القاسىنىڭ ادۆوكاتى