قازاقستاندا 600 مىڭعا تارتا وتباسى «سۇر» سپۋتنيك تارەلكەلەرىن پايدالانىپ ءجۇر. بۇل تۋرالى پارلامەنت ءماجىلىسىنىڭ جالپى وتىرىسىندا قر اقپارات جانە كوممۋنيكاتسيالار ءمينيسترى داۋرەن اباەۆ ءمالىم ەتتى, دەپ حابارلايدى قازاقپارات.
«بۇل ماسەلە ەلىمىزدىڭ اقپاراتتىق قاۋىپسىزدىگىنە قاتىستى. قازىرگى كەزدە 600 مىڭعا تارتا وتباسى «سۇر تارەلكەلەردى» پايدالانىپ كەلەدى. بۇل سۇر تارەكەلەردە جادى كارتاسى پايدالانىلادى, وندا قازاقستاندىق تەلەارنالار قورعالماعان. وسى ورايدا شامامەن 1,5 ميلليون ادام قازاقستاننىڭ اقپاراتتىق كەڭىستىگىنەن تىس قالىپ وتىر, ياعني ولار قازاقستاندىق تەلەارنالاردى قارامايدى جانە ەلىمىزدە نە بولىپ جاتقانىن بىلمەيدى»,-دەدى مينيستر «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات جانە كوممۋنيكاتسيالار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا. ونىڭ سوزىنە قاراعاندا, ەل تۇرعىندارى «سۇر تارەلكەلەردى» پايدالانۋدى جالعاستىرۋدا.
«سوندىقتان بۇل ماسەلەنى وزەكتى دەپ بىلەمىز. وسى قۇرىلعىلاردى ادامدار پايدالانۋدى جالعاستىرا بەرمەك. بۇل تۇرعىدا تۇتىنۋشىلارعا ىقپال ەتۋدىڭ ەشقانداي شارالارى بىزدە قاراستىرىلماعان. الايدا ءبىز وسى كارتالاردى تاراتىپ جۇرگەن ادامدىردى قۇقىقتىق كەڭىستىككە شىعارۋدامىز. ولار شىنىمەن دە قازاقستاننىڭ قۇقىقتىق كەڭىستىگىنەن تىس قالىپ وتىر. ەلەكتروندى تولەمدەر ارقىلى تولەنگەن اقشا باسقا ەلدەرگە كەتىپ جاتىر», - دەدى د. اباەۆ. ايتا كەتەيىك, مينيستر زاڭ جوباسى اياسىندا باق-قا اكىمشىلىك جۇكتەمەلەر ازايتۋ ماقساتىندا بىرقاتار جەڭىلدىكتەر جاسالاتىنىن ءمالىم ەتتى.
«بىرىنشىدەن, بۇقارالىق اقپارات قۇرالدارىنىڭ دامۋى ءۇشىن ساپالى زاڭنامالىق بازانى ودان ارى قالىپتاستىرۋ قاراستىرىلىپ وتىر. سونىڭ ىشىندە اكىمشىلىك جۇكتەمەلەر مەن شەكتەۋ شارالارىن ازايتۋ ماقساتىندا بىرقاتار جەڭىلدىكتەر جاسالادى. اتاپ ايتقاندا, ازداعان قۇقىقبۇزۋشىلىقتار ءۇشىن گازەتتىڭ تيراجىن تاركىلەۋ نەمەسە باق-تىڭ قىزمەتىن توقتاتۋ سياقتى جازالاردى الىپ تاستاۋ كوزدەلۋدە. اقپارات قۇرالدارىن شىندىققا ساي كەلمەيتىن اقپاراتتى تاراتۋعا قاتىستى جاۋاپكەرشىلىكتەن بوساتاتىن سەبەپتەر قاتارى دا ۇلعايادى. بۇل وزگەرىس مەملەكەتتىك ورگاندارداعى باق-پەن بايلانىس جونىندەگى وكىلەتتى تۇلعاعا جاۋاپكەرشىلىك جۇكتەيدى»,-دەپ ءتۇسىندىردى ۆەدومستۆو باسشىسى. تالقىلاۋدان كەيىن ءماجىلىس دەپۋتاتتارى زاڭ جوباسىن ءبىرىنشى وقىلىمدا ماقۇلدادى.