تاياۋدا قاراعاندىدا قازكسر حالىق ءارتىسى ءزابيرا جۇباتوۆا تۇرعان ءاليحانوۆ كوشەسى, 38/2 مەكەنجايى بويىنشا ورنالاسقان ءۇيدىڭ قابىرعاسىنا مەموريالدىق تاقتا ورناتىلدى. ول ماسكەۋ ساحناسىندا قازاق اندەرىن شىرقاعان تالانتتى ونەر يەسى. ءانشى قاراعاندى وبلىستىق فيلارمونياسىنىڭ باستاۋىندا تۇرعانداردىڭ ءبىرى. سالتاناتتى شاراعا ءارتىستىڭ تۋعان-تۋىستارى, مادەنيەت جانە ونەر قىزمەتكەرلەرى قاتىستى.
– مەموريالدىق تاقتانى ورناتۋداعى ماقسات – ۇرپاق جادىندا تانىمال تۇلعا تۋرالى ەستەلىك قالدىرۋ. ءبىز ەلىمىزدىڭ داڭقىن اسقاقتاتىپ, حالىق شىعارماشىلىعىن دامىتقان جانداردى ارداقتاي ءبىلۋىمىز كەرەك, – دەدى مادەنيەت, مۇراعاتتار جانە قۇجاتتاما باسقارماسىنىڭ باسشىسى ەركەبۇلان اعىمباەۆ تاقتانىڭ اشىلۋ سالتاناتىندا.
ءزابيرا جۇباتوۆا 1914 جىلى پەتروپاۆلدا دۇنيەگە كەلگەن. 1932 جىلى ءوزىنىڭ قىزمەت جولىن قاراعاندى راديوكوميتەتىندە باستاعان. وندا اتاقتى تۇلعالار قالي بايجانوۆ, قوسىمجان باباقوۆپەن قاتار قىزمەت جاساعان. كەيىن, 1947 جىلى قاراعاندى وبلىستىق فيلارمونياسىنىڭ ورىنداۋشىسى بولىپ, وندا زەينەتكەرلىككە شىققانشا قىزمەت ەتكەن. حالىق ءارتىسىنىڭ ەڭبەك كىتاپشاسىندا نەبارى ەكى جازبا عانا بار. مەتستسو-سوپرانو داۋىس يەسى ۇلى وتان سوعىسى جىلدارى مايدانداعى كونتسەرتتىك توپتاردىڭ قۇرامىندا ونەر كورسەتكەن.
ەرەكشە دارىن يەسىنىڭ رەپەرتۋارىندا حالىق شىعارمالارى, كلاسسيكالىق جانە قازىرگى زامانعى شىعارمالاردان تۇراتىن 200-دەن استام تۋىندى بولدى.
ءزابيرا جۇباتوۆانىڭ جەكە مۇراعاتىنان كوپتەگەن قازاق اندەرىنىڭ قولجازبالارى تابىلعان. ولار – «دايديداۋ», «القوڭىر», «بوزجورعا», «ايتتىم سالەم, قالامقاس», «تاتيانانىڭ حاتى», «شاحتەر ءانى». سونىمەن قاتار ءوزىنىڭ قولجازبا داپتەرلەرىندە ول ءتۇرلى حالىقتاردىڭ – تاتار, ارميان, رۋمىن, قىتاي, ۇيعىر جانە باسقالارىنىڭ اندەرىن جيناعان.
ميراس اسان, «ەگەمەن قازاقستان»
قاراعاندى وبلىسى