پارلامەنت سەناتىنىڭ توراعاسى قاسىم-جومارت توقاەۆ سەربيا حالىق سكۋپششيناسىنىڭ توراعاسى مايا گويكوۆيچپەن كەلىسسوز جۇرگىزدى.
تاراپتار ەكىجاقتى نەگىزدەگى جانە حالىقارالىق ۇيىمدارداعى پارلامەنتارالىق بايلانىستاردى, ساياسات, ساۋدا-ەكونوميكالىق, كولىك جانە يندۋستريا-يننوۆاتسيا سالاسىنداعى ىنتىماقتاستىق ماسەلەلەرىن تالقىلادى. ق.توقاەۆ قازاقستان مەن سەربيانىڭ اراسىنداعى ىنتىماقتاستىقتى دامىتۋداعى مەملەكەت باسشىلارىنىڭ كەزدەسۋلەرى مەن كەلىسسوزدەرىنىڭ شەشۋشى ماڭىزىن اتاپ ءوتتى.
جۇزدەسۋشىلەر ەكىجاقتى كەشەندى بايلانىستاردى نىعايتۋ ءۇشىن پارلامەنتارالىق ءوزارا ءىس-قيمىلدىڭ ەرەكشە ماڭىزىنا قاتىستى ورتاق پىكىرگە كەلدى. دەپۋتاتتىق دوستىق توپتارىنىڭ جەلىسى بويىنشا پارلامەنتارالىق بايلانىستاردى ورىستەتۋ تۋرالى ۋاعدالاستىققا قول جەتكىزىلدى.
ق.توقاەۆ استاناعا العاش رەت قادام باسقان م.گويكوۆيچتى قازاقستاندا مەملەكەت باسشىسىنىڭ باستاماسى بويىنشا جۇزەگە اسقان ەكونوميكالىق جانە ساياسي رەفورمالاردىڭ بارىسى تۋرالى حاباردار ەتتى. «رەفورمالار – ءبىزدىڭ پرەزيدەنت ن.نازارباەۆتىڭ بەرىك ۇستانىمى, ول ءىس جۇزىندە الەمدىك اۋقىمداعى كورنەكتى رەفورماتور بولىپ سانالادى», دەدى سەنات توراعاسى.
ەلىمىزدىڭ ينۆەستيتسيالىق زاڭناماسى جانە ەكونوميكالىق جوسپارلارىمەن جۇزدەسۋشىنى تانىستىرا كەلىپ, ق.توقاەۆ سەربتىڭ بيزنەس وكىلدەرىن قازاقستانداعى جوبالار بويىنشا بىرلەسە جۇمىس ىستەۋگە شاقىردى. سەنات باسشىسىنىڭ پىكىرىنشە, اۋىل شارۋاشىلىعى, قۇرىلىس, تۋريزم جانە كولىك-لوگيستيكا سالالارىنداعى ىنتىماقتاستىق ەكى جاقتىڭ دا ىقىلاسىن تۋعىزاتىن بولادى.
تاراپتار تالقىلانعان ماسەلەلەر بويىنشا كوزقاراستاردىڭ ۇقساستىعىنا توقتالا كەلىپ, حالىقارالىق سالادا ءبىر-بىرىنە قولداۋ ءبىلدىرۋدى جالعاستىرۋ جايىندا ايتتى.