جاھاندانۋدىڭ ۇدەرىسى جان-جاقتان انتالاپ كەلىپ, جاڭا تاڭداۋلار مەن تالعامدار ۇسىنىپ جاتقان وسىناۋ قاربالاس, قاۋىرت ۋاقىتتا ءاربىر ءىستى اقىلمەن, سابىرمەن, «جەتى رەت ولشەپ, ءبىر عانا كە-ءسۋدىڭ» ۇلگىسىمەن سىندارلى ساياسات جۇرگىزۋدىڭ تاجىريبەسىن جيناقتادىق. وسى ورايدا پرەزيدەنتىمىز ن.نازارباەۆتىڭ «بولاشاققا باعدار: رۋحاني جاڭعىرۋ» اتتى تاريحي باعدارلامالىق ماقالاسى زور سەرپىن تۋعىزدى.
ەل بولىپ قالىپتاسىپ, سونى كەمەل كەلەشەكتىڭ كەرۋەنىنە قوسۋداعى ءارتۇرلى فاك-تورلاردىڭ ءبىرى – قازاق ءالىپبيىن وزگەرتۋ ەدى. سول كۇنگە دە جەتتىك. حالىقارالىق قاتىناستاعى ۇلەس سالماعى سەكسەن پايىزدان اساتىن لاتىن ءالىپبيىن قابىلداۋ – تاريحي شەشىم دەپ ۇققانىمىز دۇرىس.
قازاقستان ەندىگى ۋاقىتتا حالىقارالىق قوعامداستىقتىڭ ورتاسىندا ءوز بەت-بەدەلى, ءوز جولى بار ەل رەتىندە ودان تىس قالا المايدى. سول سەبەپتى دە قازاق ءتىلىن لاتىن الىپبيىنە كوشىرۋدىڭ تا-ريحي ماڭىزى زور. مۇنداي باتىل شەشىمگە بارۋ ءۇشىن دە ۋاقىتتىڭ ۇرىمتالدىعى, ساياساتتىڭ سارابدالدىعى, ەلدىك مۇددەنىڭ بارىنەن جوعارى بولماقتىعى كەرەك. پرەزيدەنتىمىز سونى جاقسى ۇقتى, پايىمدادى. ونى ەلى قولدادى.
قازاق ءتىلىنىڭ جاڭا لاتىن الىپبيىنە كوشۋىنە بايلانىستى تاريحي ءسات بارشامىزدى قۋانتۋعا ءتيىس. قاتىپ قالعان ەشتەڭە جوق. ارتىق-كەمى بولسا, جۇرە تۇزەلەر. وعان ۋاقىت تا بار, مۇمكىندىك تە بار.
جاڭا ءالىپبي – جاڭا ءداۋىردىڭ باسى بولعاي!
ەربولات بايات,
م.اۋەزوۆ اتىنداعى ادەبيەت جانە ونەر
ينستيتۋتىنىڭ اعا عىلىمي قىزمەتكەرى
الماتى