ماڭعىستاۋ وبلىسىنىڭ جاڭاوزەن قالاسىندا ورتا جانە شاعىن بيزنەستى قولداۋعا ءارى دامىتۋ ءۇشىن بۇگىن «بيزنەس كاپيتال» جوباسىنىڭ تۇساۋى كەسىلىپ, ۇشجاقتى مەموراندۋمعا قول قويىلدى.
كاسىپكەرلەر قاۋىمى بۇل جوبا وڭىردە عانا ەمەس, ەل ىشىندە تۇڭعىش رەت ىسكە اسىرىلىپ وتىرعانىن ايتادى. سوندىقتان ونى جىل جاڭالىعىنا بالاپ, بارلىعى جىلى قابىلداۋدا. باعدارلامانى قارجىلاندىرۋ «دامۋ» قورىنىڭ جانە «وزەنمۇنايگاز» اق جەر قويناۋىن پايدالانۋ كەلىسىم-شارتى اياسىندا جەرگىلىكتى اتقارۋشى ورگانعا بەرەتىن قاراجاتتارى ەسەبىنەن جۇزەگە اسىرىلاتىن بولادى. قارجىلاندىرۋ كولەمى: باعدارلاما بويىنشا جالپى سوماسى – 1 ملد. 50 ملن. تەنگەنى, ونىڭ ىشىندە: «وزەنمۇنايگاز» اق-نىڭ 350 ملن. تەڭگە, «دامۋ» قورىنىڭ قارجىسى - 700 ملن. تەڭگە.
-ورتا جانە شاعىن بيزنەسپەن اينالىسامىن دەگەن ءاربىر ازاماتقا تولىقتاي مۇمكىندىك جاسالىنىپ وتىر. ءۇش جاقتىڭ قاتىسۋى ارقىلى جۇزەگە اساتىن باعدارلامانى باستاۋعا ءازىرمىز. «وزەنمۇنايگازدان» الىناتىن اقشانىڭ 350 ملن. تەڭگەسىن «دامۋ» قورىنا قايتارىمدى نەگىزدەگى نەسيە رەتىندە بەرىلەدى. ءوز كەزەگىندە «دامۋ» قورى ەكى ەسەدەن كوپ قاراجات بولەدى. ناتيجەسىندە بارلىعى 1 ملد. 50 ملن. تەنگەنى جەرگىلىكتى كاسىپكەرلەردىڭ جوبالارىن قارجىلاندىرۋعا جۇمسايمىز. قىسقاسى, بۇل جەردە ەشقانداي جەرگىلىكتى بيۋدجەتتىڭ قاراجاتى جۇمسالمايدى», دەدى ماڭعىستاۋ وبلىسىنىڭ اكىمى ەرالى توعجانوۆ. سونداي-اق ول, جاڭاوزەن قالاسى مونوقالا بولعاندىقتان, ءوندىرىس جانە قىزمەت كورسەتۋ سالالارىندا جاڭا نىسانداردى اشۋدى قارجىلاندىرۋ ارقىلى, قالا ەكونوميكاسىن ءارتاراپتاندىرۋ قاجەت.
جاڭاوزەن ارقىلى وبلىستىڭ ءتۇرلى كورىكتى جەرلەرىنە اپاراتىن تۋريستىك باعىتتار وتەدى («كەندىرلى» دەمالىس ايماعى, تابيعي كورىكتى جەرلەر, ءدىني عيبادات ورىندارى), سوعان بايلانىستى سەرۆيستى جەتىلدىرۋ جانە جاڭا قىزمەت كورسەتۋ نىساندارىن قۇرۋ قاجەت. باعدارلامانىڭ جۇزەگە اسىرۋ قاجەتتىلىگى دە وسى ەكەنىن ەرەكشە اتاپ ءوتتى. «دامۋ» قورىنىڭ موف ديرەكتورى بەرىك نۇرعاليەۆ: - باعدارلامانىڭ نەگىزگى تالاپتارىنىڭ ءبىرى, تەك قانا جاڭا تۇراقتى جۇمىس ورىندارىن قۇراتىن ينۆەستيتسيالىق ماقساتتاعا جوبالار قارجىلاندىرىلاتىن بولادى.
ەڭ ماڭىزدىسى قاراجات «وزەنمۇنايگازدان» «دامۋ» قورىنا تىكەلەي اۋدارىلادى. سول سەبەپتى نەسيە بويىنشا پايىزدىق مولشەرلەمە «بيزنەستىڭ جول كارتاسى 2020» بىرىڭعاي باعدارلاماسى اياسىندا سۋبسيديالاناتىن بولادى. ەگەر سوڭعى قارىز الۋشى ءۇشىن سىياقى مولشەرلەمەسى – 11 پايىز بولسا, ونىڭ 10 پايىزى سۋبسيديالاناتىن بولسا, ال قالعان 1 پايىزىن عانا كاسىپكەر تولەيدى. سونىمەن قاتار, ەگەر قارىز الۋشىنىڭ كەپىلگە قوياتىن مۇلكى جەتكىلىكسىز بولعان جاعدايدا, وعان «بيزنەستىڭ جول كارتاسى – 2020» بىرىڭعاي باعدارلاماسى اياسىندا «دامۋ» قورىنىڭ كەپىلدەمەسى بەرىلەتىن بولادى, - دەدى. شاعىن جانە ورتا كا¬سىپكەرلىك ەل ەكونوميكاسىنىڭ نەگىزگى تىرە¬گى ەكەنىن ەسكەرسەك, الىپ ءوندىرىستىڭ دە, شاعىن ءوندىرىستىڭ دە جۇمىسىن العا جەتەلەيتىن ەڭ ءتيىمدى جول – بيلىك پەن بيزنەستىڭ اراسىنداعى اراقاتىناستىڭ ۇزىلمەۋىندە جاتىر.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى