ەل تاۋەلسىزدىگىنىڭ ءبىر بەلگىسى ونىڭ ونوماستيكالىق ساياساتىنان كورىنىس تاباتىنى بەلگىلى. بۇل ورايدا كوپتەگەن وڭتايلى ىستەر اتقارىلىپ, حالىقتىڭ كوڭىلى ءوسىپ قالعانى انىق. جالعىز مىسال ايتالىق. ءتالىم تاريحىمىز قاتتالعان ششۋچە اۋدانى وسىدان ەكى جىل بۇرىن بۋراباي بولىپ وزگەرگەندەگى قۋانىشتى ەلەۋلى وقيعالار ساناتىنا جاتقىزا الامىز. شاتتىعىمىزدى «ەگەمەن قازاقستان» گازەتى «اتىڭنان اينالايىن, بەۋ بۋراباي!» دەگەن تاقىرىپپەن جالپاق جاھانعا جەتكىزگەن بولاتىن. بۋراباي بۇگىن تاعى دا سىلكىنىس ۇستىندە. مۇندا مادەنيەت مينيسترلىگىنىڭ ءتىل كوميتەتى ۇيىمداستىرعان «وڭىرلەردەگى ونوماستيكا ماسەلەلەرىن رەتتەۋ جولدارى» اتتى رەسپۋبليكالىق «دوڭگەلەك ۇستەل» ءماجىلىسى وتكىزىلدى.
استانا جانە الماتى قالالارىنداعى, بارلىق وبلىستارداعى ءتىل باسقارمالارى ونوماستيكا ءبولىمدەرىنىڭ باسشىلارى, بايلانىس جانە اقپارات مينيسترلىگى جانىنداعى «ۇلتتىق اقپاراتتىق تەحنولوگيالار» اق «مەكەن-جاي تىركەلىمى» اقپاراتتىق جۇيەسىنىڭ ماماندارى, اۋدان اكىمدەرىنىڭ ورىنباسارلارى مەن بۇقارالىق اقپارات قۇرالدارىنىڭ وكىلدەرى قاتىسقان جيىندى مادەنيەت مينيسترلىگى ءتىل كوميتەتىنىڭ باسقارما باستىعى سەرىك ءسالىموۆ كىرىسپە سوزبەن اشتى.
كۇن تارتىبىنە شىعارىلعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ونوماستيكا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اياسىندا ازىرلەنگەن «ءتارتىپ» جوباسى جانە «اكىمشىلىك-اۋماقتىق بىرلىكتەردىڭ جانە گەونيم اتاۋلارىن بىرىزدەندىرۋ ءماسەلەلەرى تۋرالى» رەسپۋبليكالىق «ۇلتتىق اقپاراتتىق تەحنولوگيالار» اق ءبولىم باستىعى ءزاۋرە ءالىموۆا مەن ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ پروفەسسورى قادىرجان ءابۋوۆتىڭ باياندامالارى تىڭدالدى.
ونى تالقىلاۋعا اقمولا, شىعىس قازاقستان, قوستاناي, الماتى جانە باتىس قازاقستان وبلىستارى تىلدەردى دامىتۋ باسقارمالارىنىڭ باستىقتارى عوسمان تولەعۇل, روزا تولەمىسوۆا, جاراسحان ناۋرىزباەۆ, گۇلنار بيتەبەكوۆا, جومارت ەرنازاروۆ, التىنگۇل ءابجاليەۆا مەن اقمولا وبلىسى زەرەندى اۋدانى اكىمىنىڭ ورىنباسارى ءاليا امانجولوۆا قاتىستى. مىنبەرگە كوتەرىلگەن باسقا دا شەشەندەر ونوماستيكا جونىندەگى قۇقىقتىق نەگىزدەردى جەتىلدىرۋ, ونىڭ قولدانىلۋ تەتىگىن ايقىنداپ, ىسكە اسىرۋ جولدارىن ازىرلەۋ, بۇل رەتتە بۇقارا حالىقتىڭ تىلەكتەرىن ەسكەرۋ جونىندە ۇسىنىستارىن ورتاعا سالدى.
باقبەرگەن امالبەك,
اقمولا وبلىسى.