«ەگەمەن قازاقستان» گازەتىنىڭ 2011 جىلعى 13 تامىزداعى نومىرىندە جارىق كورگەن «ءتارتىپ قايتسە ورنىعادى؟» دەگەن ماقالاداعى دەرەكتەر سەمەي قالالىق اكىمدىگىندە وتكەن ۆەدومستۆوارالىق كوميسسيا جيىنىندا سەمەي قالالىق ىشكى ىستەر باسقارماسىنىڭ باستىعى ە.سىدىقوۆتىڭ قىلمىستىق احۋال جايىنداعى بايانداماسىندا وزەكتى ماسەلەلەر رەتىندە كەلتىرىلگەن بولاتىن.
مىسالى, تەك 2011 جىلدىڭ باسىنان بەرى سەمەي قالاسىنا اۋىلدىق جەرلەردەن قونىس اۋدارعاندار سانى بىلتىرعىمەن سالىستىرعاندا 2 مىڭ ادامنان ارتىپ وتىر. ساياجايلاردا ورىن العان 149 ۇرلىق پەن 9 توناۋ قىلمىستارىنىڭ بارلىعى دەرلىك تۇنگى ۋاقىتتا ىستەلگەن, بۇل وقيعالار بولعان جەرلەر مەن كوشەلەردىڭ كوپشىلىگىندە تۇنگى جارىق ورناتىلماعان. سەمەي قالاسى كوشەلەرىندە ورىن تەپكەن 56 سىرا ساتاتىن دۇڭگىرشەكتەر مەن پالاتكالاردى تەكسەرۋ ناتيجەلەرى ولاردىڭ ەكەۋىندە عانا قاجەتتى رۇقسات قاعازدارى بار ەكەندىگىن كورسەتكەن.
اتالعان جيىندا سەمەي قالالىق ىشكى ىستەر باسقارماسىنىڭ باستىعى ە.سىدىقوۆ وسى جايتتەردى تالقىعا سالىپ, بۇل وزەكتى ماسەلەلەردى كەشەندى تۇردە جەرگىلىكتى بيلىك ورىندارىمەن بىرلەسە شەشۋ تۋرالى ءسوز قوزعاعان بولاتىن.
پوليتسيا قىزمەتكەرلەرى تاراپىنان قولدان كەلگەن شارالار ىستەلىنۋدە. 2011 جىلدىڭ 7 ايىندا وسى «ۆوستوچنىي» ساياجاي الابىندا پوليتسيانىڭ ۋچاسكەلىك قىزمەتكەرلەرى قۇقىق بۇزۋشىلىق فاكتىلەرى بويىنشا 465 اكىمشىلىك حاتتاما تولتىرىپ, قاتىستى ادامداردى ءتيىستى جاۋاپكەرشىلىككە تارتقان.
قازىرگى ۋاقىتتا «ۆوستوچنىي» ساياجاي الابى اۋماعىندا قىزمەت جاسايتىن پوليتسيانىڭ ەكى اتتى پاترۋل باعىتى, ءبىر جاياۋ پاترۋل باعىتى, ءبىر اۆتوكولىكپەن پاترۋل جاساۋ باعىتىنا قوسىمشا تاعى ەكى اتتى پاترۋل باعىتى, ءبىر جاياۋ پاترۋل باعىتى بەلگىلەندى.
ب.قاسەنوۆ, سەمەي قالالىق ءىىب باستىعىنىڭ ورىنباسارى.