«اۋلەت» جوباسى بىرگە بيزنەس باستاعان اعايىنداردىڭ الاۋىزدىعىنا جول بەرمەيدى

ەندىگى جەردە تۋىسقاندارىمەن بيزنەس باستاۋعا بەل بايلاعاندارعا ارنايى كۋرستارعا قاتىسىپ, كەڭەس الىپ وتىرعان ارتىقتىق ەتپەيدى. ارنايى بيزنەس-ترەنينگتەردە اعايىندار اراسىندا كيكىلجىڭدەر مەن تۇسىنىسپەۋشىلىكتەر تۋىنداتپاۋدىڭ جولدارى تۇسىندىرىلەدى.

بۇل جوباعا قازاقستانداعى وتباسىلىق بيزنەس قاۋىمداستىعى مۇرىندىق بولىپ, الماتى قالاسىنىڭ كاسىپكەرلەر پالاتاسى مەن بىرقاتار ۇيىمدار قولداۋ تانىتىپ وتىر.

قالالىق كاسىپكەرلەر پالاتاسى الدىمەن الەمگە تانىمال وتباسىلىق بيزنەس ءبىزدىڭ ەلىمىزدە ونشالىقتى دامىماعانىن العا تارتتى. وتانداستارىمىز اقشاعا بولا تۋىسقاندىق قارىم-قاتىناستى بۇزىپ الماس ءۇشىن اعايىندارىمەن بىرگە ءىس باستاۋعا ابايلاپ قارايدى. الايدا ستاتيستيكا باسقاشا سويلەيدى. شەت مەملەكەتتەردە ەكونوميكانىڭ دامۋىنا وتباسىلىق بيزنەستىڭ بەرىپ وتىرعانى قوماقتى كورىنەدى. ماسەلەن, اقش-تا ءاربىر بەسىنشى كومپانيا وتباسىلىق بيزنەسپەن اينالىسادى. ەۋروپا ەلدەرىندەگى, جاپونياداعى كومپانيالاردىڭ 80 پايىزى تۋىستاردىڭ ورتاق كاسىبى بولىپ تابىلادى. ال ۇندىستانداعى كاسىپورىنداردىڭ 95 پايىزى وتباسىلىق بيزنەسكە تيەسىلى.

ء«بىز بيزنەس پەن تۋىستىق بايلانىستار قابىسپايدى دەگەن تاپتاۋرىن كوزقاراستى جويۋ ءۇشىن «اۋلەت» جوباسىن قولعا الدىق. ەلىمىزدە مۇنداي ترەنينگتەر العاش رەت وتكىزىلىپ وتىر. جوبادا كاسىپكەرلىكتىڭ كوزدەرى عانا ەمەس, سەرىكتەستەرمەن, ياعني تۋىستارمەن تاتۋ قارىم-قاتىناستى ساقتاي وتىرىپ, جۇمىس پەن تابىستى قا­لاي ءبولۋ كەرەكتىگى ۇيرەتىلەدى. بىزدە ءجيى قايتا­لا­ناتىن قاتەلىك – كەلىسىمشارتتاردا تاراپ­تار­دىڭ قۇقىقتارى مەن مىندەتتەرى اتاپ كورسەتىلمەيدى. ءارى وتباسىلىق كاسىپورىن ادەت­تە ۇزاق جىلعا ەسەپتەلگەن بيزنەس ەكەنىن ۇمىتپاعان ءجون. وسى رەتتە از عانا تا­بىستى ەمەس, كومپانيانىڭ ابىرويىن ەستە ساق­تاعان ابزال», دەپ اتاپ ءوتتى قازاق­ستانداعى وتباسىلىق بيزنەس قاۋىمداستىعى ۇيلەس­تىرۋ كەڭەسىنىڭ ءتورايىمى يانا يساكوۆا.

سونىمەن, وقۋ كۋرستارى 28 قازاننان باس­تالدى. كەزدەسۋ التى اپتا بويى ءار جۇما سايىن وتەدى. وڭىرلەردەگى اعايىندار ءارى-بەرى شاپقىلاماي-اق, ترەنينگتەرگە ونلاين رەجىمدە قاتىسا الادى.

ايناش ەسالي, «ەگەمەن قازاقستان»