تۇركى اكادەمياسى حالىقارالىق ۇيىمى (TWESCO) جاپونيا استاناسى توكيو قالاسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىنا ارنالعان جيىن وتكىزدى. بۇل تۋرالى twesco.org حابارلادى.
توكيو حالىقارالىق زەرتتەۋلەر ۋنيۆەرسيتەتىندە (TUFS) وتكەن شارادا اكادەميا باسشىسى دارحان قىدىرالى «رۋحاني جاڭعىرۋ» باعدارلاماسىنىڭ ماقسات-ماڭىزىنا ارنالعان مازمۇندى بايانداما جاسادى. سونىمەن بىرگە, ۋنيۆەرسيتەتتىڭ ىزدەنۋشىلەرى مەن ستۋدەنتتەرىنىڭ كوكەيدە جۇرگەن سۇراقتارىنا جاۋاپ بەردى.
بۇدان كەيىن ورتالىق ازيا تاقىرىبىن زەرتتەۋشى بەلگىلى جاپون ساراپشىلارى كيمۋا ساتورۋ, كوماتسۋ حيساو, ساكي حيروكي, تەتسۋ اكياما مەن شيمادا شيزۋو ەلباسى ن.نازارباەۆتىڭ اتالعان باعدارلاماسىنىڭ وزەكتىلىگىنە قاتىستى پايىمدى پىكىرلەرىن ورتاعا سالدى. ساراپشى مامانداردىڭ ويىنشا, باعدارلامادا كورسەتىلگەن مىندەتتەر قازاقستانداعى عىلىم, مادەنيەت سالاسىنداعى جەتىستىكتەردى جاڭا ساپالى دەڭگەيگە كوتەرۋگە سەپ بولماق.
رۋحاني جاڭعىرۋدا كوتەرىلگەن كەلەلى ماسەلەلەر توڭىرەگىندە قۇندى پىكىرلەر ايتىلعان جيىندى قورىتىندىلاي كەلە د.قىدىرالى قاتىسۋشىلارعا ريزاشىلىعىن ءبىلدىردى.