ەلورداداعى «جاستار» سارايىندا ء«بىز بىرگەمىز, ءبىر وتباسىمىز» اتاۋىمەن ۋكراين حالىق شىعارماشىلىعىنىڭ III حالىقارالىق ءداستۇرلى ءان-بي بايقاۋى ءوتتى. «قازاقستاندىق ۋكراينا راداسى» قوعامدىق بىرلەستىگى ۇيىمداستىرعان مەرەكەلىك شاراعا رەسپۋبليكامىزدىڭ جەتى وبلىسىنان ءۇش جۇزگە جۋىق ونەرپازدار كەلدى.
قازاق-ۋكراين بايلانىسىنىڭ بۇگىنگى دەڭگەيىن پاش ەتىپ, قارىم-قاتىناسىن نىعايتۋعا باعىتتالعان شاراعا قازاقستان حالقى اسسامبلەياسى اتىنان سايلانعان ءماجىلىس دەپۋتاتتارى مەن قوعام قايراتكەرلەرى جانە ەلىمىزدەگى ءتۇرلى ەتنوستىق ۇيىمداردىڭ وكىلدەرى قاتىستى. ال ۇيىمداستىرۋشىلاردىڭ ايتۋىنشا, بايقاۋ اياسىندا مەملەكەت باسشىسى ايقىنداپ بەرگەن «رۋحاني جاڭعىرۋ» باعدارلاماسىنىڭ شەڭبەرىندەگى تاپسىرمالاردى جۇزەگە اسىرۋ ماقساتى كوزدەلگەن. ويتكەنى, ونىڭ استارىندا قوعامدىق كەلىسىم مەن تاتۋلىق, بىرلىكتى بەكەمدەۋ بار ءارى قازاقستانداعى ءتۇرلى ۇلتتار مەن ۇلىستار مادەنيەتىنىڭ جاڭعىرۋى جاتىر. مەرەكەلىك جيىندى سالتاناتتى جاعدايدا اشقان قازاقستان حالقى اسسامبلەياسى توراعاسىنىڭ ورىنباسارى دارحان مىڭباي پرەزيدەنت ن.نازارباەۆتىڭ «رۋحاني جاڭىرۋ: بولاشاققا باعدار» ماقالاسىندا «ۇلتتىق سالت-داستۇرلەرىمىز بەن ءتىلىمىز, مۋزىكامىز بەن ادەبيەتىمىز, جورالعىلارىمىز, ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس» دەپ ناقتى اتاپ كورسەتىلگەندىگىن تىلگە تيەك ەتتى.
«بۇل بايقاۋدى ءبىزدىڭ ەلىمىزدە تۇرىپ جاتقان ۋكراينداردىڭ ۇلتتىق ونەرى مەن شىعارماشىلىعىنىڭ دامىپ جاتقانىنىڭ بەلگىسى دەپ باعالاۋعا بولادى. سونداي-اق, ولاردىڭ ءوز ءتىلى مەن ءتول مادەنيەتىنىڭ زامان تالابىنا ساي كەڭ ءورىس الىپ وتىرانىن كورسەتەدى. سوندىقتان دا بۇگىنگى بايقاۋعا قاتىسۋشىلاردىڭ ىنتا-ىقىلاستارى مەن قىزىعۋشىلىقتارى زور», دەدى د.مىڭباي.
جالپى, قوعامدىق سانانى جاڭعىرتۋ ماقساتىندا ۇيىمداستىرىلاتىن مۇنداي مادەني شارالار ونەر مەن شىعارماشىلىق تۋىندىلارى ارقىلى ادامداردىڭ ءبىر-ءبىرىن تانىپ, بىلۋىندە وڭ ىقپالىن تيگىزەدى. سوندىقتان دا «جاستار» سارايىنىڭ فويەسىندە قازاقستان حالقى اسسامبلەياسى مەن ۋكراين شەبەرلەرىنىڭ قولىنان شىققان قولدانبالى ونەر تۋىندىلارىنىڭ كورمەسى ۇيىمداستىرىلدى.
نۇرلىبەك دوسىباي,
«ەگەمەن قازاقستان»