«حابار» اگەنتتىگى جۋرناليستەر اراسىندا شاعىن فۋتبولدان رەسپۋبليكالىق تۋرنير وتكىزەدى. ءداستۇرلى تۋرنير وسىمەن ءۇشىنشى جىل قاتارىنان ۇيىمداستىرىلايىن دەپ وتىر.
العاشقىسى «حابار» ارناسىنىڭ 20 جىلدىق مەرەيتويىمەن تۇسپا-تۇس كەلگەن بولاتىن. نازارباەۆ ۋنيۆەرسيتەتىندە وتكەن باسەكەدە «BaqOrda» كومانداسى چەمپيون اتانعان. وسىدان كەيىن بۇل اتاققا «جاسStar Production» ۇجىمى يە بولدى. جۋرناليستەر دوداسى «استانا-ارەنا» ستاديونىندا ۇيىمداستىرىلعان ەدى.
بيىلعى تۋرنير دە ەلىمىزدەگى №1 ستاديونعا جوسپارلانىپ وتىر. جارىس ەرتەڭ, ياعني 22 قازان كۇنى وتەدى. چەمپيوندىق اتاقتى باس-اياعى 16 كوماندا ساراپقا سالماق. ولار ءوزارا ءتورت توپقا ءبولىنىپ, ۇزدىكتەردى انىقتايدى. تيىسىنشە, ءبىرىنشى جانە ەكىنشى ورىن العاندارى پلەي-وفف كەزەڭىنە, ياعني شيرەك فينالعا شىعادى.
جارىس ءبىر كۇنگە جوسپارلانعان. ويىندار 09:00-دە باستالادى. ال اشىلۋ سالتاناتى 11:00-دە وتەدى.