تۇركيانىڭ استاناسى انكارادا ەكى ەل اراسىنداعى ديپلوماتيالىق قارىم-قاتىناستار ورناۋىنىڭ 25 جىلدىعىنا ارنالعان قازاقستان مادەنيەتى مەن كينوسىنىڭ كۇندەرى اشىلدى.
سالتاناتتى شاراعا قر مادەنيەت جانە سپورت ۆيتسە ءمينيسترى اقتوتى رايىمقۇلوۆا قاتىسىپ ءسوز سويلەدى. «بۇل يگى ءىس قازاقستان مەن تۇركيا اراسىنداعى ديپلوماتيالىق قارىم-قاتىناستاردىڭ ورناۋىنىڭ 25 جىلدىعىنان ارنالىپ وتىر. وسى جىلداردا ەكى ەل اراسىنداعى ىنتىماقتاستىق تەرەڭدەي تۇسۋدە. بيىل 9 قىركۇيەكتەگى تۇركيا پرەزيدەنتى رەدجەپ تايپ ەردوعاننىڭ استاناعا ساپارىنىڭ وسىناۋ ەكىجاقتى بايلانىستاردىڭ ودان ءارى جاندانا تۇسۋىنە ىقپال ەتتى»,- دەدى ول. سونىمەن قاتار ەلباسى نۇرسۇلتان نازارباەۆتىڭ تۇركيامەن ىنتىماقتاستىققا باسا نازار اۋداراتىنىن دا اتاپ ءوتتى.
تۇركيا مادەنيەت جانە تۋريزم ءمينيسترىنىڭ ورىنباسارى حۋسەين يايمان قازاقستاننان كەلگەن مارتەبەلى مەيماندارعا ىستىق ىقىلاسىن ءبىلدىردى. سونداي-اق ەكى حالىقتىڭ تاريحى, ورتاق مادەني قۇندىلىقتارى تەرەڭنەن ساباقتاسا تامىر تارتىپ جاتقاندىعىن اتاپ ءوتتى.
اتاۋلى شاراعا بايلانىستى يۋنۋس ەمرە مادەنيەت ورتالىعىندا قازاقستان انشىلەرى مەن شىعارماشىلىق ۇجىمدارىنىڭ سالتاناتتى كونتسەرتى بولدى.