وڭتۇستىك قازاقستان وبلىسىنداعى قازىعۇرتتىق شارۋالار جەمىستىڭ ءار گەكتارىنان 20 توننا ءونىم الدى. بۇل تۋرالى اۋدان اكىمدىگىنىڭ اۋىل شارۋاشىلىق ءبولىمىنىڭ باسشىسى باق وكىلدەرىنە ارنايى ۇيىمداستىرىلعان ءباسپاسوز-تۋرى بارىسىندا ايتتى.
ونىڭ مالىمدەۋىنشە, اۋداندا جالپى كوپ جىلدىق ەكپەلەر 2300-دەن استام گەكتاردى قۇرايدى, ونىڭ ىشىندە 600 گەكتارعا جۋىعى ءجۇزىم بولىپ وتىر. ال بيىلعى جىلى ءونىم بەرگەن 1200 گەكتار جەمىس اعاشتارىنان ورتاشا ەسەپپەن 24 مىڭ توننا ءونىم السا, 413 گەكتار جۇزىمنەن 6400 توننا ءونىم العان.
وسىنداي ءونىم كولەمىن ارتتىرۋعا سەپتىگىن تيگىزگەن كووپەراتيۆتىڭ ءبىرى قازىعۇرت اۋدانى قىزىلقيا اۋىلىنداعى «امانكەلدى» جشس بازاسىندا شىلدە ايىندا قۇرىلعان «امان اگرو سەرۆيس» جەمىستەردى ساقتاۋ جانە دايىنداۋ اۋىل شارۋاشىلىعى وندىرىستىك كووپەراتيۆى. اۋقىمى بەس اۋداندى قۇرايتىن كووپەراتيۆتىڭ 38 مۇشەسى بار. قازىعۇرت, سارىاعاش, سايرام اۋداندارى مەن شىمكەنت, ارىس قالالارىنىڭ شارۋالارى بىرەككەن وندىرىستىك كووپەراتيۆتىڭ 25 مىڭ گەكتاردان استام جەرى بار. ونىڭ 11 مىڭنان استام جەرى ياعني, 30-40 پايىزى وسى «امانكەلدى» شارۋا قوجالىعىنا تيەسىلى. ونىڭ 500 گەكتارى قارقىندى باق بولسا, ولاردان بيىل 2 مىڭ توننادان استام جەمىس جينالعان. ال ولاردان الىنعان ونىمدەردىڭ جارتىسى رەسەيگە ەكسپورتتالدى.
بۇگىندە كووپەراتيۆكە بىرىككەن شارۋالار سەرىكتەستىكتىڭ 2 مىڭ توننالىق جەمىس-جيدەك توڭازىتقىشى بار قويماسىن, كەڭەيتىپ قايتا جاراقتاندىرىپ وتىر. مۇندا سونىمەن قوسا, ەۋروپادان, يتاليا, تۇركيا, گوللانديا مەملەكەتتەرىنەن اكەلىنگەن جاڭعاق پەن 15 ءتۇرلى الما سورتى جانە ءجۇزىم كوشەتتەرى وسىرىلەدى. سونداي-اق, كووپەراتيۆ مۇشەلەرى كەلەشەكتە جەمىستەردى وڭدەيتىن تسەح اشۋدى دا جوسپارلاپ وتىر.