بۇگىن استانادا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى, سونىمەن قاتار قوعامدىق سانانى جاڭعىرتۋدىڭ تۇجىرىمدامالىق پروبلەمالارى تالقىلاندى, دەپ حابارلايدى baq.kz.
جيىن بارىسىندا ۇلتتىق اۋدارما بيۋروسىنىڭ اتقارۋشى ديرەكتورى, «100 جاڭا وقۋلىق» جوباسىنىڭ جەتەكشىسى راۋان كەنجەحان ۇلى بيىلعى جىلى اۋدارىلىپ ءبىتۋى ءتيىس 18 وقۋلىققا جەكە-جەكە توقتالىپ, ونىڭ ماڭىزدىلىعىن, قازىرگى زامانداعى سۇرانىسىنا ءمان بەردى.
«قازىرگى كەزدە وسى 100 وقۋلىققا «100kitap.kz» سايتى جۇمىس ىستەپ تۇر. سول جەردە بارلىق مالمەتتەر بەرىلگەن. تاڭداپ الىنعان كىتاپتاردى كىمدەر اۋدارعانى, قانشا رەت باسىلىپ شىققانى ءبارى سول جەردە تۇر» - دەيدى جوبا جەتەكشىسى.
ونىڭ اايتۋىنا قاراعاندا كىتاپتار اتاۋىنىڭ قازاقشا بالاماسىنا قاتىستى دا ءتۇرلى ۇسىنىستار مەن نۇسقالار بولعان.
«مىسالى نەگىزگى اتاۋىن تۋرا قازاقشالاعاندا كوڭىلگە قونىمسىز, قازاقى تۇسىنىگىمىزگە تومپاق كەلەتىن اۋدارمالا بولدى. ءبىز سولارمەن كوپ جۇمىس جاسادىق. ءتىپتى ءالى دە كەيبىر كىتاپتاردىڭ قازاقشا اتاۋىن ناقتى بەرە الماي وتىرمىز. Karen ءArmstrongتىڭ «A History of God: The 4000-year quest of judaism, christianity and islam» اتتى تۋىندىسى (ورىسشا «يستوريا بوگا») دەگەن اتاۋدى تۋرا اۋدارساق «قۇدايلار تاريحى» بولۋى كەرەك. ال ءبىزدىڭ سەنىم بويىنشا تۋرا سولاي بەرۋگە بولمايدى. سونىمەن قاتار Elliot Aronsonنىڭ «The Social Animal» اتتى تۋىندىسىن دا قازاقشا اتاۋ تىم كۇردەلى. مىسالى «الەۋمەتتىك حايۋان» نەمەسە «قوعامدىق جانۋار» دەپ اتاۋ قازاقى بولمىسىمىزعا جات» - دەيدى راۋان كەنجەحان ۇلى.
قالاي دەگەنمەن بيىلعى جىلعا اۋدارىلادى دەپ جوسپارلانعان 18 كىتاپتىڭ اۋدارما جۇمىسى ءبىتتى.
«قازىرگى كەزدە بيىلعى جوسپارلانعان 18 كىتاپ اۋدارىلىپ ءبىتتى. ەندى رەداكتورلار جۇمىسى جاسالىپ جاتىر. بىراق بۇل كىتاپتار كەلەسى جىلدان باستاپ باسپاعا جىبەرىلەدى. جانە ءبىر ايتا كەتەرلىگى بۇل كىتاپتار لاتىن الىپبيىمەن باسىلادى دەپ جوسپارلاپ وتىرمىز. ەلباسى قازاق ءتىلىنىڭ لاتىن الىپبيىندەگى ءالفاۆيتىنىڭ سوڭعى نۇسقاسى قايسى دەپ بەكىتىپ, قول قويادى, سول نۇسقامەن باسىلادى. سوندىقتان لاتىن ءالىپبيى بەكىتىلگەنشە بۇل كىتاپتار باسپاعا دايىندالاتىن بولادى» - دەدى اۋدارما بيۋروسىنىڭ اتقارۋشى ديرەكتورى.
ەستەرىڭىزگە سالا كەتەيىك, بۇعان دەيىن 2017 جىلدا اۋدارىلۋعا ءتيىس 17 كىتاپتىڭ تىزىمى جاريالانعان بولاتىن.