ءبىز بۇعان دەيىن قىسقى جىلىتۋ ماۋسىمىنا ءتاستۇيىن دايىندىق جاساۋدىڭ ورنىنا ءوز مىندەتتەرىنە سالعىرت قاراعان باسشىلاردىڭ جاۋاپكەرشىلىككە تارتىلعانى تۋرالى جازعان ەدىك («جالعان اقپار جارعا جىقتى», ەق, №197. 13 قازان). ەندى ونىڭ «جىرىنا» قاتتى وتىن تاپشىلىعى قوسىلىپ, سولتۇستىك قازاقستان وبلىسى ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى ايدارحان ءمۋسيننىڭ تۇرعىندار الدىندا ەسەپ بەرۋىنە تۋرا كەلدى.
ونىڭ ايتۋىنشا, پەتروپاۆل № 2 جىلۋ-ەلەكتر ورتالىعىندا ەكى ءجۇز مىڭ تونناعا جۋىق كومىر قورى جيناقتالعان. الەۋمەتتىك جانە بيۋدجەتتىك مەكەمەلەر جەتكىلىكتى تۇردە قامتاماسىز ەتىلگەن. «قازاقستان تەمىر جولى» ۇك» اق پەن «شۇباركول كومىر» اق اراسىنداعى كەلىسىمشارت اياسىندا تاۋلىگىنە 700 توننا كومىر جەتكىزۋ بەلگىلەنگەن. تاسىمالمەن «وتىن LTD» جشس, «تۋردىوگلى» جەكە كاسىپكەرلىگى دە اينالىسادى.
الايدا ا.مۋسين جاعداي قالىپتى, كومىر تاپشىلىعى بولمايدى دەپ قانشا سەندىرۋگە تىرىسقانىمەن, جۇرتشىلىق كوڭىلى ءالى دە الاڭ. ساتىلىمعا شىعارىلعان 27 مىڭ توننا قاتتى وتىننىڭ ساپاسى سىن كوتەرمەيدى. اسىرەسە قاراجىرا كەنىنەن اكەلىنگەن كومىرگە شاعىم ايتۋشىلار كوپ. قىستان قىسىلماي شىعۋ ءۇشىن 400 مىڭ توننادان استام كومىر قاجەت بولسا, جوسپار 65 پايىزعا عانا ورىندالعان. ۆاگوندار جەتىسپەۋشىلىگى دە انىق بايقالادى.
قازىر ساپاسىنا قاراي كومىر باعاسى 7000-16000 تەڭگە ارالىعىندا قۇبىلىپ تۇر. قالتاسى كوتەرە بەرمەيتىندەر امالسىز قولعا تيگەنىنە ريزا.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى