وسكەمەننىڭ ىرگەسىندەگى گلۋبوكوە كەنتىندەگى «شاحان-اتا» جاۋاپكەرشىلىگى شەكتەۋلى سەرىكتەستىگىنىڭ قۇرىلعانىنا بيىل 20 جىل تولدى. ونى جاڭاباي تاستانبەكوۆ باسقارادى. 20 جىلدىڭ ىشىندە اتالمىش كاسىپورىن قازاقستاننىڭ قالالارىن بىلاي قويىپ, كورشى رەسەيگە ءوز تاۋارلارىن شىعارىپ جاتىر. ال ولاردىڭ ىشىندە نان, نان-توقاش تاعامدارىنىڭ – 15, 40-تان استام ءتاتتى پىراندىك, 70-تەن استام بيسكۆيتتى-كرەمدى تورت, كونديتەر تاعامدارىنىڭ 100-دەن استام ءتۇرى بار. ول ول ما, كەلەشەگى كەمەل كاسىپورىننىڭ كۇنباعىس مايىن سىعاتىن, اعاش ۇستاسى, جيھاز تسەحتارى, قۇرىلىسقا قاجەت قۇم جانە كومىر قالدىقتارىنان كىرپىش جاسايتىن زاۋىت, مال سوياتىن قاساپحاناسى بار.
بۇل كۇندەرى سەرىكتەستىكتە 370 ادام ەڭبەك ەتەدى, ولار جالاقىلارىن ۋاقتىلى الىپ تۇرادى.
– شىعىستى ەرەكشە ۇناتتىم. بۇل جاقتىڭ ادامدارى قاراپايىم, قوناقجاي ەكەن, مەنى جاتسىنباي, باۋىرلارىنا تارتتى. ول كەزدە ساۋدا-ساتتىقتىڭ قىزعان شاعى. كوكونىس ساتتىق, كاسىپكەرلىكتى يگەرە باستادىق. سول كەزدەگى اۋدان اكىمى مارات اكراموۆ مەنى قابىلداپ, ابدەن توزىعى جەتكەن بۇرىنعى نان زاۋىتىنىڭ ەسكى عيماراتىن بەردى, ونى جوندەپ, قاتارعا قوستىق. 15 ميلليون تەڭگە نەسيە الىپ, جاڭا جابدىقتاردى وندىرىسكە ەنگىزدىك. ءبىز وندىرەتىن ونىمدەردىڭ ساپاسى جوعارى, باعاسى قىمبات ەمەس, سوندىقتان وسكەمەننىڭ 820 ساۋدا دۇكەندەرىنەن ءتاتتى تاعامدارعا, تورتتارعا تاپسىرىس تۇسەدى. ەكولوگيالىق جاعىنان تازا, ەشقانداي كونسەرۆانتتار قوسىلماعان تاعامدارىمىز وتكەن جىلى وبلىستىق بايقاۋدا ءبىرىنشى ورىندى جەڭىپ الدى, دەيدى ج.تاستانبەكوۆ.
مال سوياتىن قاساپحانادا اۋداننىڭ بارلىق شارۋا قوجالىقتارىنىڭ ءىرى قاراسى سويىلىپ, ساۋدا ورىندارىنا جونەلتىلەدى. جيھاز تسەحىندا نەشە ءتۇرلى بۇيىمدار جاسالادى, ساپاسىنا تۇرعىندار ريزا. ءتاتتى تاعامدار تسەحىنا ەنگەنىمىزدە ءبىر توپ قىز-كەلىنشەكتى جولىقتىردىق. ولار اۋىسىمىنا جۇزدەگەن دانا تورت, كونديتەر تاعامدارىن جاسايدى ەكەن. ال كىرپىش شىعاراتىن تسەحقا ەنگەنىمىزدە, ون شاقتى جۇمىسشىنى جولىقتىردىق. شلاكتان, قۇم مەن تسەمەنت قوسىلىپ جاسالعان كىرپىشكە دە سۇرانىس ەرەكشە كورىنەدى.
– «شاحان-اتا» دەگەن اتاۋ نەنى بىلدىرەدى؟ دەپ سۇرادىق ءبىز.
– بابامىز شاحان-اتا 102 جاسىندا ورداباسىداعى جوڭعارمەن قازاقتار قاقتىعىسىپ قالعاندا قولىنا نايزا الىپ, جاۋلارىمەن شايقاسقان. ول كىسى اۋليە بولعان, ادامداردى ەمدەپ جىبەرەتىن قاسيەتى تاعى بار. قازاق ەلىنىڭ تاۋەلسىزدىك الۋىن ارمانداعان اتامىزدىڭ رۋحى بارلىق قازاقتاردى قورعاپ-قورشاپ ءجۇرسىن دەگەن نيەتپەن كاسىپورىنعا اتامىزدىڭ اتىن بەردىك. ماقسات ايقىن, قازىر بىزدە ەڭبەك ەتەتىن 370 ادام ءبىر مىڭعا جۋىق ادامدى اسىراپ وتىر, دەيدى جاڭاباي تاستانبەكوۆ.
جۇرەگى جومارت, جانى تازا ازامات قايىرىمدىلىق شارالارىنا بەلسەندىلىكپەن ارالاسادى. ەلىمىزدىڭ باس گازەتى «ەگەمەن قازاقستاندى» ۇزاق جىلدان وزىنە سەرىك ەتكەن. وڭتۇستىكتەگى اعايىندار جايلى وقىعان كەزدە توبەم كوككە ءسال عانا جەتپەي قالادى, دەيدى رۋحاني جاعىنان كەمەلدەنگەن ازامات. جاكەڭ كەزىندە وبلىستىق «ديدار» گازەتىندە قىزمەت ەتكەن زەينەلعابيدەن قاليەۆپەن جاقسى ارالاسقان ەكەن. ارداگەر جۋرناليست قازا تاپقان سوڭ ول كىسىنىڭ زيراتىن تۇرعىزىپ بەرىپتى. مادەنيەت, سپورت سالاسىنداعى ازاماتتارعا دا سان مارتە دەمەۋشىلىك جاساعان ازاماتتى گلۋبوكوە اۋدانىنىڭ تۇرعىندارى ەرەكشە قۇرمەتتەيدى.
– ءبىر ءوزى ءبىر كومبينات! شىركىن, جاڭابايداي ىسكەر, كاسىپكەرلىكتىڭ ۇڭعىل-شۇڭعىلىن تەرەڭ مەڭگەرگەن ازاماتتار كوپ بولسا, الىنبايتىن قيىندىق بولماس ەدى, ءوڭىرىمىز ءوسىپ-وركەندەي بەرەر ەدى, دەيدى اۋدان اكىمى قاليحان بايعونىسوۆ.
وڭداسىن ەلۋباي شىعىس قازاقستان وبلىسى, گلۋبوكوە اۋدانى