قازاقستان رەسپۋبليكاسى ۇلتتىق مۋزەيىندە 2017 جىلعى حالىقارالىق ارحەولوگيالىق زەرتتەۋلەر ناتيجەلەرى بويىنشا «قازاقستان رەسپۋبليكاسى ۇلتتىق مۋزەيى ارحەولوگيالىق ەكسپەديتسياسىنىڭ «رۋحاني جاڭعىرۋ» باعدارلاماسى اياسىندا اتقارعان جۇمىستارىنىڭ ناتيجەسى: «قازاقستان-جاپونيا, «قازاقستان-گەرمانيا, قازاقستان-رەسەي» اتتى دوڭگەلەك ۇستەل ءوتتى.
دوڭگەلەك ۇستەل جۇمىسىنا نارا عىلىمي-زەرتتەۋ ينستيتۋتىنىڭ پروفەسسورى ساداكاتسۋ كۋنيتاكە, جاپونيانىڭ قازاقستانداعى توتەنشە جانە وكىلەتتى ەلشىسى يتيرو كاۆاباتا, مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ, ۇلتتىق مۋزەي ديرەكتورىنىڭ ورىنباسارى, ەكسپەديتسيا جەتەكشىسى, تاريح عىلىمىنىڭ دوكتورى, پروفەسسور جاكەن تايماعامبەتوۆ جانە وسى سالادا قىزمەت ەتىپ جۇرگەن عالىمدار مەن جەتەكشى ماماندار قاتىستى.
بەس جىلدىق «Paleo Silk Road» باعدارلاماسى اياسىنداعى ۇلتتىق مۋزەي مەن تيۋبيگەن ۋنيۆەرسيتەتىنىڭ (گەرمانيا) بىرلەسكەن حالىقارالىق ەكسپەديتسياسى ءبىرىنشى جىلعى جۇمىسىن قورىتىندىلادى. سترافيكاتسيالانعان پالەوليت ەسكەرتكىشتەرىن ىزدەۋ بويىنشا جۇرگىزىلگەن مايبۇلاق كەيىنگى پالەوليت تۇراعى جانە شىعىس قازاقستان وڭىرىندەگى قازبا جۇمىستارىنا ۇلتتىق مۋزەي عالىمدارى, گەرمانيا, ۇلىبريتانيا, اقش, كانادا, ءۇندىستان, چەحيا عىلىمي مەكەمەلەرىنىڭ وكىلدەرى قاتىسقان. دوڭگەلەك ۇستەل بارىسىندا 2016 جىلى ۇلتتىق مۋزەي مەن رەسەي عىلىم اكادەمياسىنىڭ ءسىبىر ءبولىمىنىڭ ارحەولوگيا جانە ەتنوگرافيا ينستيتۋتىنىڭ ماماندارى اشقان ۇشبۇلاق پالەوليت تۇراعىنا جۇرگىزىلگەن قازاقستان-رەسەي, قاراتاۋ وڭىرىنە جۇرگىزىلگەن قازاقستان-جاپونيا, شىعىس قازاقستان ءوڭىرىن زەرتتەگەن قازاقستان-گەرمانيا ارحەولوگيالىق ەكسپەديتسياسى جۇمىستارىنىڭ ناتيجەلەرىن پروفەسسور جاكەن تايماعامبەتوۆ تانىستىردى.
«بەس جىلدىقتىڭ العاشقى ءبىرىنشى جىلىندا اتقارىلعان جۇمىستاردىڭ كوبى باستالدى. كەيبىر ايماقتار جەكەشەلەنىپ, يا تابيعي وزگەرىستەرگە قاتتى ۇشىراعاندىقتان زەرتتەۋ جۇرگىزۋگە قولايسىز بولدى. ەندىگى جىلداردىڭ جۇمىسى بۇدان دا زور تاريحي تابىستارعا اكەلەدى. ويتكەنى بۇل ءبىزدىڭ وتكەنىمىز. ءالى زەرتتەلمەگەن وبالار دا ءوز عالىمىن كۇتىپ جاتىر» دەدى ول الداعى كۇندەرگە ۇلكەن ءۇمىت ارتىپ.
تاس عاسىرىنىڭ جاڭا جيىرما ەسكەرتكىشىنىڭ اشىلۋى ارحەولوگيا ەكسپەديتسياسىنىڭ جەمىسى. قازاقستان تاريحىنا وزگە مەملەكەتتەردىڭ عالىمدارى دا اسا قىزىعىپ وتىر. ويتكەنى وتكەن داۋىرلەر ءبىزدى جاقىنداتادى. نارا عىلىمي-زەرتتەۋ ينستيتۋتىنىڭ پروفەسسورى ساداكاتسۋ كۋنيتاكەنىڭ ايتۋىنشا, افريكانى ادامزات بالاسىنىڭ مەكەندەگەنىنە الپىس مىڭ جىل بولسا, جاپونياعا ادام اياعىنىڭ تيگەنىنە وتىز مىڭ جىل بولعان. جاپونداردىڭ ارعى اتالارى قازاقستاننىڭ وڭتۇستىك ايماعىنان بارعان, يا سول جەرلەردى باسىپ وتكەن دەپ ەسەپتەيدى. عالىمنىڭ اسا قىزۋعىشىلىعىن وياتقان سەبەپتەردىڭ ءبىرى وسى بولسا كەرەك.
ۇلتتىق مۋزەي عالىمدارى «رۋحاني جاڭعىرۋ» باعدارلاماسى اياسىنداعى وسى جۇمىستارىن ءارى قاراي تاباندى تۇردە جالعاستىراتىندار ايتتى.
باعاشار تۇرسىنباي ۇلى, «ەگەمەن قازاقستان»