قورشاعان ورتانىڭ تازالىعىن ساقتاۋ جالپىعا ورتاق مىندەت. اسىرەسە ۇلكەن قالالارداعى سانيتارلىق ۇقىپتىلىقتىڭ ءتيىستى دەڭگەيدە ساقتالماۋى ادام بالاسىنا اسا زياندى زيانكەستەردىڭ بەلەڭ الۋىنا اكەلەدى.
الماتىلىق ماماندار الىپ مەگاپوليستەگى زيانكەستەرمەن كۇرەس ماسەلەسى ۇنەمى باقىلاۋدا ەكەنىن ايتادى. ماسەلەن ءبىر عانا كەمىرگىشتەردىڭ ءوزى ءاردايىم ادامعا جاقىن ءومىر سۇرەتىندىكتەن ادام ءۇشىن اسا قاۋىپتى, ءتىپتى ولىمگە اپاراتىن ءتۇرلى اۋرۋلاردىڭ تاسىمالداۋشى وشاعى بولىپ سانالادى. ولاردىڭ الپىستان استام ءتۇرى ادام مەن ءۇي جانۋارلارىنا قاۋىپ ءتوندىرىپ قانا قويماي, كوپتەگەن ەكونوميكالىق شىعىندارعا دۋشار ەتەدى. ەكى جارىم ميلليوننان استام تۇرعىنى بار الماتى سياقتى ۇلكەن قالالاردا زيانكەستەردى ۇدايى جويىپ وتىرۋ كوپتەگەن جۇقپالى اۋرۋلاردىڭ تارالۋىنىڭ الدىن الاتىن كورىنەدى.
– ءۇي جايلاردىڭ اۋلالارىندا كەزدەسەتىن كەمىرگىشتەر مەن دالا كەمىرگىشتەرىن جويۋ ماقساتىندا زالالسىزداندىرۋ جۇمىستارىنا ارنايى 8 بريگادا مەن 60 ادام جۇمىلدىرىلدى. ولاردىڭ قۇرامىندا: ۆراچ-ەپيدەميولوگ, پارازيتولوگ, نۇسقاۋشى دەزينفەكتور سياقتى بىلىكتى ماماندار بار. قالانى كەمىرگىشتەردەن تازارتۋعا ارنايى ۋلانعان بيداي داقىلدارىنىڭ داندەرىمەن قاتار «بروماديالون» پرەپاراتى قولدانىلۋدا. قالانىڭ تۇركسىب, جەتىسۋ سياقتى ۇلكەن اۋداندارىن زالالسىزداندىرۋ جۇمىستارىنىڭ كۇزگى ناۋقانى ويداعىداي اياقتالدى. قازىرگى ۋاقىتتا زالالسىزداندىرۋ جۇمىستارى مەدەۋ, الاتاۋ اۋداندارىندا جالعاسىن تابۋدا – دەيدى الماتى قالاسى بويىنشا دەزينفەكتسيا ورتالىعى فيليالىنىڭ ديرەكتورى ەسەن بەكبوسىنوۆ.
زالالسىزداندىرۋ ورتالىعىنىڭ دارىگەرلەرى مەن ارنايى ماماندار قالا جۇرتشىلىعىنا ساقتىق شارالارىن ساقتاۋدى, سانيتارلىق تازالىققا زور جاۋاپكەرشىلىكپەن قاراۋدى قاتاڭ ەسكەرتەدى. قاي جەردە تازالىق تولىق ساقتالمايدى, سول جەردە ءتۇرلى كەمىرگىشتەر پايدا بولۋى ابدەن مۇمكىن. «بارلىق تۇرعىن ءۇي اۋلالارىندا, ساۋدا ورىندارىنىڭ اۋماعىندا, ءوندىرىس ورىندارىنىڭ ايماقتارىندا, بارلىق جۇرگىزىلىپ جاتقان قۇرىلىس جۇمىستارىنىڭ الاڭدارىندا سانيتارلىق تازالىققا مۇقيات كوڭىل ءبولۋ كەرەك» دەيدى ماماندار.
ارمان وكتيابر,
«ەگەمەن قازاقستان»
الماتى