«موگاديشودا «اش-شاباب» تەررورلىق ۇيىمىنىڭ قاندى شابۋىلىنان قازا تاپقاندار سانى 276 ادامعا جەتتى. سونداي-اق, 300-دەن استامى ءتۇرلى دەڭگەيدە جاراقات الدى», دەپ جازدى ءسوماليدىڭ اقپارات ءمينيسترى ابديراحمان وسمان «Twitter» پاراقشاسىندا.
وتكەن سەنبى كۇنى سومالي استاناسى موگاديشودا قاسكويلەر جارىلعىش زات ورنالاسقان جۇك كولىگىن «سافاري» قوناق ءۇيىنىڭ ماڭىندا, ادام كوپ جينالعان جەردە ىسكە قوسقان بولاتىن. ناتيجەسىندە, قوناق ءۇي قيراپ, تۇرعىندار ءۇيىندىنىڭ استىندا قالدى.
«اش-شاباب» قاسكويلەر توبى 2007 جىلى قۇرىلعان بولاتىن. BBC-ءدىڭ حابارلاۋىنشا, وسى ۋاقىت ارالىعىندا مۇنداي ءىرى جارىلىس بولماعان. اتالعان توپ سومالي بيلىگىنە قارسى ءجيى شابۋىل ۇيىمداستىرادى. سونداي-اق, ولاردىڭ «ال-كايدا» تەررورلىق ۇيىمىمەن تىعىز بايلانىستا ەكەنى بەلگىلى.
ەل پرەزيدەنتى موحاممەد ابدۋللاحي موحاممەدتىڭ شەشىمىمەن الداعى ءۇش تاۋلىك قارالى كۇن ەتىپ جاريالاندى.