پرەزيدەنت نۇرسۇلتان نازارباەۆ ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا قازاقستاندىقتاردىڭ رۋحاني جاڭعىرۋىنىڭ بىرەگەي جولدارىن ۇسىندى.
بۇگىن ءاربىر قازاقستاندىقتىڭ الدىندا وزدىگىنەن ءبىلىم الۋ جانە ءوز ءبىلىمىن جەتىلدىرۋ ماقساتى تۇر جانە بۇل تۇرعىدان «رۋحاني جاڭعىرۋ» باعدارلاماسىن جۇزەگە اسىرۋ بويىنشا قويىلعان ستراتەگيالىق ماقساتتاردى ورىنداۋدا ماڭىزدى ءرول كىتاپحانالارعا تيەسىلى.
قوعامدا, سونىڭ ىشىندە بالالار, جاسوسپىرىمدەر جانە جاستار ورتاسىندا بولىپ جاتقان ۇردىستەر مەملەكەت تاراپىنان وسكەلەڭ ۇرپاققا نازار اۋدارىلۋىن تالاپ ەتەدى. بارلىق ۋاقىتتا كەز كەلگەن قوعامدا جاس بۋىن الەۋەتتى, رەسۋرستىق كۇشتەردىڭ ماڭىزدى, اۆانگاردتىق بولىگى بولىپ كەلەدى. ءبىزدىڭ بالالارىمىزدىڭ بولاشاعىنىڭ جارقىن بولۋى, باسەكەگە قابىلەتتىلىگى, ءوز بويىنا ادامگەرشىلىك جانە مادەني سالت-داستۇرلەردى سىڭىرۋىنە بايلانىستى بولاتىنى ءسوزسىز. بالالىق شاقتان باستاپ, وتباسىندا جانە كىتاپحانادا قالىپتاساتىن بىلىمگە دەگەن ىنتىزارلىقسىز ناعىز تۇلعانى قالىپتاستىرۋ مۇمكىندىگى ب ۇلىڭعىر. كىتاپحاناشىلاردىڭ تۇپكى باعىتى – قازاقستاندىق جانە الەمدىك ادەبيەتتىڭ اسا ماڭىزدى ۇلگىلەرىنىڭ كومەگىمەن بالالار مەن جاستاردىڭ بويىندا يگى قاسيەتتەردى ءسىڭىرۋ.
بۇل ءۇردىستىڭ سەنىمدى ىرگەتاسى بولىپ بالالار, جاسوسپىرىمدەر جانە ءجاسوسپىرىم-بالالار كىتاپحانالارى سانالاتىنى داۋسىز. الايدا ولاردىڭ الەۋمەتتىك ماڭىزدىلىعى مەن الەۋەتىنە قاراماستان ەلدە ادىستەمەلىك, تالدامالىق جانە ۇيلەستىرۋشى ورتالىعىنىڭ بولماۋىنا بايلانىستى بالالارمەن جانە جاسوسپىرىمدەرمەن جۇمىس ىستەيتىن ورىنداردا كۇردەلى جاعداي ورىن الۋدا.
قازىر قازاقستاندا پسيحولوگيالىق-جاستىق ەرەكشەلىكتەرىن ەسكەرە وتىرىپ, بالالارعا, جاسوسپىرىمدەرگە جانە جاستارعا ارنالعان جاس تۇتىنۋشىلاردىڭ تالاپتارىنا سايكەس كەلەتىن كىتاپحانالىق-بيبليوگرافيالىق قىزمەت كورسەتۋدى ۇيىمداستىرۋدىڭ ايرىقشا جۇيەسىن, اقپاراتتىق رەسۋرستاردى قالىپتاستىرۋداعى سارالانعان ءتاسىلىن, ينتەللەكتۋالدى ءۇزىلىستى ۇيىمداستىرۋى بار مامانداندىرىلعان كىتاپحانالار جۇيەسىن ەل كولەمىندە قالپىنا كەلتىرۋدىڭ وتكىر قاجەتتىلىگى تۋىنداپ وتىر.
وسى ماسەلەنىڭ نەگىزگى شەشىمى تالدامالىق, ۇيلەستىرۋشى, عىلىمي-زەرتتەۋ, عىلىمي-ادىستەمەلىك ورتالىقتىڭ, بالالار ادەبيەتىن زەرتتەۋ ورتالىعىنىڭ فۋنكتسيالارىن جۇزەگە اسىراتىن – ءجاسوسپىرىم-بالالار كىتاپحاناسىن قۇرۋدا دەپ بىلەمىز. بۇل كىتاپحانا جوعارىدا اتالعان فۋنكتسيالاردى جۇزەگە اسىرا وتىرىپ, استانا قالاسىنداعى ۇلتتىق اكادەميالىق كىتاپحانانىڭ بولىمشەسى رەتىندە قۇرىلۋى مۇمكىن.
وسىنداي كىتاپحانانى قۇرۋ ەلدە اقپاراتقا تەڭ جانە ەركىن قولجەتىمدىلىك قاعيداسىنا نەگىزدەلگەن بالالار مەن جاسوسپىرىمدەرگە قىزمەت كورسەتۋدىڭ زاماناۋي ۇلگىسىن قالىپتاستىرۋعا مۇمكىندىك بەرەدى. بالالار-جاسوسپىرىمدەر كىتاپحاناسىن ۇيىمداستىرۋ قاجەتتىلىگى قوعامىمىزدىڭ ساياسي, ەكونوميكالىق, الەۋمەتتىك جانە رۋحاني ومىرىندە, تەحنيكالىق ويلاۋدىڭ, اقپاراتتىق جانە وزگە دە تەحنولوگيالاردىڭ, سونداي-اق كىتاپحانالاردىڭ الدىنا مەملەكەت جانە پايدالانۋشىلاردىڭ وزدەرى قويىپ وتىرعان تالاپتاردىڭ دامۋىندا بولىپ جاتقان وزگەرىستەرگە بايلانىستى ەكەندىگى داۋسىز. سونىمەن قاتار استاناداعى ەكسپو-2017 حالىقارالىق مامانداندىرىلعان كورمە جۇمىسىنىڭ اياقتالۋىنا بايلانىستى, سونىڭ نەگىزىندە استانا قالاسىندا بالالار مەن جاسوسپىرىمدەر كىتاپحاناسىنىڭ فۋنكتسيالارى مەن مىندەتتەرىن اتقاراتىن «جاسىل كىتاپحانا» قۇرۋ مۇمكىندىگىن قاراۋدى ۇكىمەتكە ۇسىندىق.
دينار نوكەتاەۆا, سەناتور