سوچيدە وتكەن تمد-عا مۇشە مەملەكەتتەر باسشىلارىنىڭ كەڭەسىندە دوستاستىق جۇمىسىن رەفورمالاپ, ونىڭ قىزمەتىن جەتىلدىرۋ جونىندە ءسوز بولدى.
بىرلەستىك قۇرىلعالى بەرى قازاقستان ونىڭ قۇرامىندا بەلسەندى ارەكەت ەتىپ, ەكونوميكالىق ينتەگراتسيالىق ۋاعدالاستىقتى ءاردايىم قولداپ وتىردى. پرەزيدەنت نۇرسۇلتان نازارباەۆ ىشكى بايلانىستى تەرەڭدەتەتىن ناعىز ينتەگراتسيالىق بايلانىس ورناتۋدىڭ قاجەتتىلىگىن ايتىپ كەلەدى.
قازاقستان تاراپى تمد قىزمەتىنىڭ قازىرگى ۋاقىتقا ساي كەلمەيتىنى تۋرالى ءجيى ماسەلە كوتەرۋدە. ماسەلەن, دوستاستىق اياسىندا قابىلدانعان قۇجاتتاردىڭ بىرقاتارى قايتا قاراۋدى قاجەت ەتەدى. ۋاعدالاسقان ماقساتتىڭ ورىندالۋ بارىسىندا كەدەرگىلەردىڭ كەزدەسۋى كەڭ كولەمدى ىنتىماقتاستىق قۇرۋدىڭ كەرەكتىگىن كورسەتتى. وسىعان سايكەس, كەدەندىك وداق جانە ەۋرازيالىق ەكونوميكالىق وداق قۇرىلدى.
العاشقىدا تمد ينتەگراتسيالاۋ قۇرالى رەتىندە عانا ەمەس, كەڭەس وداعىنىڭ ورنىن باسقان مەملەكەتتەردىڭ ءوزارا قارىم-قاتىناسىن ءۇزىپ الماۋ ماقساتىندا قۇرىلدى. سول كەزدە مۇنداي ۇيىم قۇرۋ وتە قاجەت ەدى. كەيىنىرەك ءار ەل ءوزىنىڭ دامۋ باعىتىن ۇستانىپ, ءبىرى شىعىسقا, ءبىرى باتىسقا قاراپ بەت تۇزەي باستادى. كەلەسىلەرى, ءتىپتى, ءوز قازانىندا ءوزى قايناۋدى ءجون سانادى.
تمد ءالى كۇنگە دەيىن تۋىن تۇسىرگەن جوق جانە ونىڭ اياسىندا قابىلدانعان قۇجاتتار دا ءوز قالپىندا. ايتسە دە, كەي قۇجاتتار ەۋرازيالىق ەكونوميكالىق وداققا مۇشە مەملەكەتتەر قابىلداعان شەشىمدەرگە ساي كەلە بەرمەيدى. سوندىقتان تمد قىزمەتىن رەتتەۋ ماسەلەسى, ءنورماتيۆتى نەگىزدەرىن قايتا قاراپ, قازىرگى ۋاقىتقا ساي ەتۋ قاجەت ەكەنى انىق. مەنىڭشە, ۇيىمدى رەفورمالاۋ وسى باعىتتا جۇرگىزىلەدى.
ۆياچەسلاۆ دودونوۆ, قازاقستان ستراتەگيالىق زەرتتەۋلەر ينستيتۋتىنىڭ باس عىلىمي قىزمەتكەرى, ەكونوميكا عىلىمدارىنىڭ دوكتورى