قازاقستانداعى كومپانيالار ەكسپو-2017 حالىقارالىق مامانداندىرىلعان كورمەسىنەن ىرىكتەلگەن تەحنولوگيالاردى قولدانىسقا ەنگىزۋ بويىنشا باعالاۋ جۇمىستارىن جۇرگىزىپ جاتىر. ەنەرگەتيكا مينيسترلىگى جاڭعىرمالى ەنەرگيا كوزدەرى دەپارتامەنتىنىڭ ديرەكتورى اينۇر سوسپانوۆا بۇل جايىندا ۇكىمەت ۇيىندە وتكەن ءباسپاسوز ءماسليحاتىندا اڭگىمەلەدى.
«ەنەرگەتيكا مينيسترلىگى ءتورت باعىت بويىنشا حالىقارالىق پاۆيلوندارعا مونيتورينگ جۇرگىزدى. قازىرگى كەزدە اكىمدىكتەرمەن جانە كومپانيالارمەن ءتيىستى جۇمىستاردى جالعاستىرۋدامىز. 170-كە تارتا كومپانيا بۇگىندە ىرىكتەلگەن تەحنولوگيالارعا باعالاۋ جۇرگىزۋدە. وسى ورايدا ناقتى قانداي تەحنولوگيانى, قاي مەرزىمدە ءارى قارجىلاندىرۋدىڭ قانشا سوماسىندا ەنگىزۋ مۇمكىندىگى دە قارالۋدا. بۇل جۇمىسقا اكىمدىكتەر بەلسەندى جۇمىلدىرىلعان», دەدى ول.
دەپارتامەنت باسشىسىنىڭ سوزىنە قاراعاندا, اكىمدىكتەر ءۇشىن «اقىلدى قالا» قاعيداتىنا نەگىزدەلگەن تەحنولوگيالار قىزىعۋشىلىق تۋدىرىپ وتىر. اسىرەسە ينفراقۇرىلىم, تۇرعىن ءۇي-كوممۋنالدىق شارۋاشىلىعى, ەنەرگيا ۇنەمدەۋدى جاقسارتۋعا مۇمكىندىك بەرەتىن اقپاراتتىق-كوممۋنيكاتسيالىق تەحنولوگيالار ەسكەرىلگەن. «اتاپ ايتقاندا, بۇل باعىتتاعى جوبالار باعالاۋ راسىمدەرىنەن وتۋدە. قازان ايىنىڭ سوڭىنا دەيىن اكىمدىكتەر مەن كومپانيالاردان تەحنولوگيالاردىڭ ناقتى ءتىزىمى, سونداي-اق جول كارتاسى ازىرلەنۋى ءتيىس. وسىنىڭ ناتيجەسىندە ناقتى ءبىر اكىمدىك پەن كومپانيا قاي تەحنولوگيامەن جۇمىس ىستەيتىنىنە جاۋاپ الامىز», دەدى اينۇر سوسپانوۆا.
باسقوسۋدا «قازترانسويل» ۇك» اق ەكسپلۋاتاتسيا دەپارتامەنتى ديرەكتورىنىڭ ورىنباسارى سەرگەي كوستين حالىقارالىق كورمە كەزىندە سلوۆاكيا پاۆيلونىندا تانىستىرىلعان ەكوكاپسۋلا سىناقتان وتكىزىلەتىنىن ايتتى. ء«بىز ەكسپو-2017 كورمەسى اياسىندا ەنەرگەتيكا مينيسترلىگىنىڭ اتىنان ساراپشىلار توبىنىڭ جۇمىسىنا قاتىسىپ, بارلىق پاۆيلونداردى ارالاپ شىقتىق. وسىلايشا پاۆيلونداردان كورگەن تەحنولوگيالاردى ءوزىمىز ءۇشىن ىرىكتەپ الدىق. ماسەلەن, اۋستريا, سلوۆاكيا سياقتى ەلدەر ەنەرگەتيكا سالاسىندا جاقسى تەحنولوگيالارىن ۇسىندى», دەدى ول. ماماننىڭ ايتۋىنشا, شەتەلدىكتەر بۇل قۇرىلعىنىڭ قولدانىستاعى ۇلگىلەرىن تانىستىرعان. ونى تاس جولداردا ستاتسيونارلىق كوممۋنيكاتسيا, ياعني جىلۋ مەن ەلەكتر جارىعىنسىز پايدالانا بەرۋگە بولادى. ەكوكاپسۋلانى ەندى «قازترانسويل» اق نىساندارىندا سىناقتان وتكىزۋ جوسپارلانىپ وتىر. سودان سوڭ كۇزەت بەكەتتەرى مەن تەلەكوممۋنيكاتسيا جەلىسى تارتىلاتىن جەرلەردە پايدالانىلماق. بۇل ۇيلەر قانداي دا ءبىر اپاتتىڭ الدىن الۋ جۇمىستارىن ستاتسيونارلىق ەلەكتر ەنەرگياسى كوزدەرىنسىز جۇرگىزۋگە مۇمكىندىك بەرەدى ەكەن.
اسحات رايقۇل, «ەگەمەن قازاقستان»