كەشە قىرعىزستان رەسپۋبليكاسىندا پرەزيدەنت سايلاۋى ءوتتى.
ورتالىق سايلاۋ كوميسسياسىنىڭ ءتورايىمى نۇرجان شايلدابەكوۆانىڭ مالىمەتى بويىنشا, ەلدە 2375 ۋچاسكەلىك سايلاۋ كوميسسياسى ۇيىمداستىرىلدى. بۇل جەرلەردە 5370 اۆتوماتتاندىرىلعان ساناۋ جاشىكتەرى جۇمىس ىستەدى. بۇدان بولەك, شەت مەملەكەتتەردە 37 سايلاۋ ۋچاسكەسى داۋىس بەرۋگە قۇقى بار ەل ازاماتتارىنا قىزمەت كورسەتتى.
مىسالى, رەسەيدىڭ التى, گەرمانيانىڭ ءۇش قالاسىندا, سونداي-اق جاپونيا, وڭتۇستىك كورەيا, قىتاي, مالايزيا, ءۇندىستان, پاكىستان, بىرىككەن اراب امىرلىكتەرى, تۇرىكمەنستان, وزبەكستان, تاجىكستان جانە قازاقستاندا سايلاۋ ۋچاسكەلەرى داۋىس بەرۋشىلەرگە ەسىك اشتى.
كەشە گازەتىمىزدىڭ وسى ءنومىرى قاتتالىپ جاتقان كەزدە, قىرعىز وسك-ءنىڭ مالىمەتى بويىنشا, 15 قازان كۇنى ساعات كەشكى بەسكە دەيىن ەل تۇرعىندارىنىڭ 1213803-ءى داۋىس بەردى. بۇل سايلاۋشىلاردىڭ 40,12 پايىزىن قۇرايدى.
ەسكە سالساق, قىرعىزستانداعى پرەزيدەنت سايلاۋىندا باق سىناۋعا باستاپقىدا 59 ۇمىتكەر نيەت بىلدىرگەن بولاتىن. بىراق قىرعىزستان وسك-ءنىڭ شەشىمىمەن سايلاۋعا 13 ۇمىتكەر عانا جىبەرىلدى. كەيىن ۇمىتكەرلەر باقىت توروباەۆ پەن كامچىبەك تاشيەۆ ءوز ەرىكتەرىمەن سايلاۋ دوداسىنان باستا تارتتى دا, قىرعىز حالقى 11 كانديداتتىڭ ىشىنەن ءوزى قالاعان كانديداتقا داۋىس بەردى.
ۇمىتكەردىڭ سانى 11 بولعانىمەن, ساراپشىلار اتاپ وتكەندەي, تارتىس نەگىزىنەن ەكى كانديدات اراسىندا ءوتتى. سونىڭ ءبىرى – سوورونباي جەەنبەكوۆ بىشكەكتەگى №5 مەكتەپ-گيمنازيادا ورنالاسقان №1327 ۋچاسكەدە داۋىس بەردى. «مەن بۇگىن ەلىمىزدىڭ دامۋى, رەسپۋبليكانىڭ بولاشاعى ءۇشىن داۋىس بەردىم. الدىمىزدا كوپتەگەن رەفورمالار كۇتىپ تۇر. ەگەر ءبىز ءوز كۇشىمىزگە سەنبەگەن بولساق, وندا بۇل سايلاۋعا تۇسپەس ەدىك. ءبارىن دە حالىق شەشەدى», دەپ اتاپ ءوتتى ول باق وكىلدەرىمەن سۇحبات بارىسىندا.
سوورونبوي جەەنبەكوۆتىڭ باستى قارسىلاسى ومۋربەك بابانوۆ بولسا, وتباسىمەن كەلىپ, ەل استاناسىنداعى №70 گيمنازياداعى №1216 سايلاۋ ۋچاسكەسىندە ءوز تاڭداۋىن جاسادى. داۋىس بەرگەننەن كەيىن ۇمىتكەر باق وكىلدەرىنە بەرگەن سۇحباتىندا بىلاي دەدى: «حالقىم ءوزىنىڭ دۇرىس جولىن تاڭدايدى دەپ ۇلكەن ۇمىتپەن جانە زور قۇرمەتپەن كۇتەتىن بولامىن. بۇگىن ءبارىن دە حالىق شەشەدى. 15 قازان قىرعىزستان تاريحىندا التىن ارىپتەرمەن جازىلاتىن كۇن بولادى».
قىرعىزستانداعى سايلاۋدى الەمنىڭ 58 ەلىنەن كەلگەن 700-دەن استام بايقاۋشىلار قاداعالادى. ازىرگە بىزگە جەتكەن مالىمەتتەرگە قاراعاندا, سايلاۋ بارىسىندا ورەسكەل زاڭبۇزۋشىلىقتار ورىن الا قويماعان. اتالعان سايلاۋعا باق تاراپىنان دا قىزىعۋشىلىق زور بولدى. بۇل ساياسي شارانىڭ ءوتۋ بارىسى تۋرالى جەرگىلىكتى جۋرناليستەردى قوسپاعاندا, شەتەلدىڭ 35 بۇقارالىق اقپارات قۇرالى دۇنيەنىڭ تۇكپىر-تۇكپىرىنە مالىمەت تاراتتى.
سايلاۋ الدىندا قىرعىزستاننىڭ مەملەكەتتىك تىركەۋ قىزمەتى بۇل شاراعا 3 025 768 ادام داۋىس بەرۋگە مۇمكىندىك الدى دەپ حابارلاعان بولاتىن. بۇل تىزىمگە ەل ىشىندەگى 2 908 453 تۇرعىن جانە شەت مەملەكەتتەردە تۇراتىن 18 580 قىرعىزستاندىق ەنەدى.
قايرات ءابىلدا, «ەگەمەن قازاقستان»