جۋرناليست دەگەن قاۋىمنىڭ شاپانى جۇقا, كەيدە تىرلىگى جۇپىنى بولعانىمەن قوعامداعى جاقسىلىق پەن اتتەگەن-ايلاردى قوزعاۋ جاعىنان الدىڭعى ساپتا تۇراتىنى انىق.
وزگە ادامدار كورەدى, سونىمەن شەكتەلەدى. ال ءجۋرناليستىڭ وي تۇكپىرىندە ءار كورگەنىنە سۇراۋلى جۇزبەن قارايتىن ادەتى باياعىدان قالىپتاسقان. اسىرەسە, مۇنداي ىسكە قۇقىق سالاسىنا قالام تارتىپ جۇرگەن ازاماتتار ءبىرىنشى سەرگەكتىك تانىتادى. ويتكەنى ولار اركەز زاڭنىڭ ءتورت قۇبىلاسىن تۇگەندەپ جۇرەدى. سول زاڭدى بۇرا تارتقانداردى, قاساقانا بۇزعانداردى, ادام قۇقىعىنا نەمقۇرايدى قارايتىنداردى, ءوز مۇددەسى دەگەندە وزگەنى كوزگە ىلمەيتىندەردى سىن تەزىنە الىپ, ساراپتاما ماقالالارىندا تايعا تاڭبا باسقانداي كورسەتىپ وتىرادى. باسىلىم بەدەلى كەيدە سونداي تاقىرىپتاردىڭ كوتەرىلۋىمەن بيىكتەيتىنى بەلگىلى. ولاردىڭ ەڭبەگى كەيدە قاراعايدىڭ قارسى بۇتاعىنداي سەزىلۋى مۇمكىن. ويتكەنى زاڭدى قۇرمەتتەۋ, ادام قۇقىعىن قورعاۋ – بۇل ۇلكەن قاسيەت. ءبىلىم بىلىگىمەن, جان-جاقتى ساۋاتتىلىعىمەن, تابانداپ تۇرىپ تىرەسكەندە قارسىلاسىن تىزە بۇكتىرمەي قويمايتىن جۋرناليستەر قاتارىندا باس باسىلىمنىڭ بايىرعى قىزمەتكەرلەرىنىڭ ءبىرى, التى بەلەستىڭ بيىگىنە كوتەرىلگەن الەكساندر تاسبولاتوۆ تا بار.
ول – ءوزىنىڭ ەڭبەك جولىن باتىس قازاقستان وبلىستىق «ورال ءوڭىرى» گازەتىنەن باستاپ, رەسپۋبليكالىق بەلدى باسىلىمداردا قىزمەت اتقارىپ, قالامىن شىڭداعان ازامات. ءبىر سوزبەن ايتقاندا, ول جۋرناليستيكانىڭ اۋىر جۇگىن قايىسپاي ارقالاپ كەلە جاتىر. قۇقىق تاقىرىبىنىڭ ماعىناسى وتە كەڭ, ونىڭ ءتۇرى دە كوپ. جانە قۇقىقتى ءار سالا وزىنە ءتان ۇلگىمەن قورعايدى. ونىڭ كوبى بيلىك اتىنان ءسوز ايتقانمەن, كەيدە قىزمەتىنە نارازىلىق كەلتىرەتىندەر بولادى. بىراق «بيدايدىڭ بارار جەرى ديىرمەن» دەگەندەي, ءبارىنىڭ توقتار جەرى – سوت. كىم دە بولسا سوتتان ادىلدىك كۇتەدى. وزگە قۇقىق قورعاۋ مەكەمەلەرى ءبىر توبە دەسەك, سوتتىڭ ادىلدىگى سونىڭ ءبارىنىڭ جۇمىسىنا بەرگەن باعا بولىپ سانالادى. الەكساندر تاسبولاتوۆتىڭ ەڭبەگىن وسى تۇرعىدان الىپ قاراساق, كوپ نارسەنى اڭعارۋعا بولادى. ونىڭ ۇستىنە ادام قۇقىعىن قۇقىق قورعاۋشىلار عانا ەمەس, بارلىق مەكەمە ءمان بەرىپ, بارلىق ۇيىمدار جەتە قاداعالاپ وتىرۋى كەرەك. سوندا جۋرناليستەر قاۋىمىنىڭ ەڭبەگى جەڭىلدەرى انىق. ايتالىق, ارىپتەسىمىزدىڭ نەبىر داۋلى سوت پروتسەستەرىنە قاتىسىپ, كوپ كولەڭكەلى جايلاردىڭ بەتىن اشقانىنان حاباردارمىز. ءجۋرناليستىڭ ماقالالارىمەن تانىسقان ەلىمىزدىڭ تۇرعىندارى باس باسىلىمعا ءجيى حابارلاسىپ جاتادى. سول حابارلاسقان ادامداردىڭ شاعىمدارىنىڭ دەنى جەرگىلىكتى شەنەۋنىكتەردىڭ زاڭدى اياققا تاپتاۋىنان ورىن الادى ەكەن. كەيدە داۋلاسقان ەكى تاراپتىڭ ءىسىن العاش قاراعان ورگان قىزمەتكەرلەرىنىڭ سالعىرتتىعىنان داۋدىڭ ارا-جىگى مۇلدە وزگەرىپ كەتىپ جاتاتىن تۇستارى دا بولادى. سونىڭ سالدارىنان ءىس سوتقا جەتكەندە ونىڭ اق-قاراسى اشىلماي, ءبىراز جۇرت اۋرە-سارساڭعا تۇسەدى. مۇنداي جاعدايدا جۋرناليستەر امالسىز ارالاسادى. ا.تاسبولاتوۆ مۇنداي وقيعانىڭ تالايىن باستان وتكەرگەن. بىلەك سىبانىپ الىسپاسا دا, زاڭ اياسىندا ارباسقان ساتتەرى ماقالا ەمەس, ءبىر كىتاپقا جۇك بولارى حاق. ادىلدىك جولى – ونى بۇگىنگى الپىس دەيتىن جاستىڭ بەلەسىنە ابىرويمەن كوتەرىپ وتىر.
كورنەكتى جازۋشى شەرحان مۇرتازا «ارىلۋ» دەگەن كىتابىندا جازعان العىسوزىندە الەكساندر تاسبولاتوۆتىڭ شىعارماشىلىعىنا قاتىستى جوعارى باعا بەرگەنىن دە ايتا كەتۋ كەرەك. ءيا ول جۋرناليستيكامەن قاتار, كوركەم شىعارما جازۋمەن دە تانىلعان قالامگەر. «ارىلۋ, «شىندىق» وزگە دە پۋبليتسيستيكالىق كىتاپتارمەن بىرگە, «نامىس» رومانى بۇگىنگى كۇننىڭ اقيقاتىنا ارنالعان سۇبەلى دۇنيە.
ءبىر سوزبەن ايتقاندا, اقيقات ادامى ساناتىنداعى الەكساندر تاسبولاتوۆتىڭ قازاق جۋرناليستيكاسىنا قوسقان ەڭبەگى اركەز ءوزىنىڭ باعاسىن الىپ كەلە جاتىر. سونىڭ ايعاعى بولار ول پرەزيدەنت گرانتىنىڭ يەگەرى, قازاقستاننىڭ ەڭبەك سىڭىرگەن قايراتكەرى, جۋرناليستەر وداعى سىيلىعىنىڭ لاۋرەاتى. بۇعان قوسا «نۇر وتان» پارتياسىنىڭ, جوعارعى سوتتىڭ, ۇلتتىق قاۋىپسىزدىك كوميتەتىنىڭ, ادىلەت, ىشكى ىستەر مينيسترلىكتەرىنىڭ دە ماراپاتتارىنا يە بولعانىن دا ايتا كەتەلىك. قۇقىق سالاسىنا قالام تەربەگەن الدىڭعى تولقىن اعالارىنىڭ يگىلىكتى ءىسىن جالعاستىرعان تاسبولاتوۆ بۇكىل سانالى ءومىرىن شىندىقتىڭ شىراقشىسى بولۋعا ارناپ كەلە جاتىر. الدا دا وسى بيىكتەن كورىنە بەرەتىنى اقيقات.
سۇلەيمەن مامەت, «ەگەمەن قازاقستان»