سەنبى كۇنى مەملەكەت باسشىسى نۇرسۇلتان نازارباەۆ الماتى قالاسىنداعى بىرقاتار نىسانداردا بولدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
مەملەكەت باسشىسى قازاقستان رەسپۋبليكاسىنىڭ تۇڭعىش پرەزيدەنتى اتىنداعى دەندروساياباقتا بولدى. الماتى قالاسىنىڭ اكىمى احمەتجان ەسىموۆ پرەزيدەنتكە قالادا ساياباق ايماعىن دامىتۋ جوسپارى تۋرالى باياندادى.
ودان كەيىن نۇرسۇلتان نازارباەۆ «نۇر-مۇباراك» يسلام مادەنيەتى ۋنيۆەرسيتەتىندە بولدى. ۋنيۆەرسيتەت جوعارى بىلىكتى يمامداردى, يسلامتانۋشىلاردى, ءدىنتانۋشىلاردى, اراب ءتىلى مەن ادەبيەتىنىڭ اۋدارماشىلارىن دايارلاۋدى ءجۇزەگە اسىرادى. قازاقستاننىڭ باس ءمۇفتيى ءابساتتار قاجى دەربىسالى مەن ۋنيۆەرسيتەت رەكتورى ماحمۇد فاحمي حيدجازي مەملەكەت باسشىسىنا جاڭا وقۋ-اكىمشىلىك كورپۋسىن تانىستىردى. پرەزيدەنت ءماجىلىس زالىن, اۋديتوريانى, كومپيۋتەر جانە لينگافون كابينەتتەرىن قاراپ شىعىپ, وقۋشىلارمەن جانە وقىتۋشىلارمەن اڭگىمەلەستى.
– ۋنيۆەرسيتەتتى قۇرۋداعى ماقسات – قازاقستاندىق مەشىتتەردە جۇمىس ىستەيتىن ءوز ماماندارىمىزدى دايارلاۋ بولىپ تابىلادى. سىزدەر يسلامدى وقۋمەن قاتار, ءبىزدىڭ حالقىمىزدىڭ ەجەلگى تاريحى مەن باي داستۇرلەرىن دە ۇمىتپاۋلارىڭىز كەرەك. تاريحتى, مادەنيەتتى, ادەبيەتتى, فيلوسوفيانى بىلۋلەرىڭىز كەرەك. وقۋدى بىتىرگەننەن كەيىن قازاقستاننىڭ بارلىق وڭىرلەرىندەگى مەشىتتەردە جۇمىس ىستەيتىن بولاسىزدار. سىزدەر ءبىزدىڭ قوعامداعى بىرلىك, بەيبىتشىلىك پەن كەلىسىمنىڭ قانشالىقتى ماڭىزدى ەكەنىن ادامدارعا تۇسىندىرۋلەرىڭىز قاجەت, – دەپ اتاپ كورسەتتى نۇرسۇلتان نازارباەۆ.