وڭتۇستىك قازاقستان وبلىسىنىڭ اكىمى جانسەيىت تۇيمەباەۆ دۇنيەجۇزىلىك بانكتىڭ قازاقستانداعى تۇراقتى وكىلى اتو براۋنمەن كەزدەستى. ەكىجاقتى كەزدەسۋ بارىسىندا وڭتۇستىك قازاقستان مەن دۇنيەجۇزىلىك بانك اراسىنداعى ىنتىماقتاستىقتىڭ وزەكتى ماسەلەلەرى تالقىلاندى.
ءوز كەزەگىندە ءوڭىر باسشىسى قازاقستاننىڭ الەمنىڭ باسەكەگە قابىلەتتى 30 ەلىنىڭ قاتارىنا كىرۋ بويىنشا وبلىستا شاعىن كاسىپكەرلىكتى جان-جاقتى قولداۋ جانە جاڭادان جۇمىسىن باستاعان بيزنەس سۋبەكتىلەرىنىڭ باستامالارىنا قارجىلىق قولداۋ كورسەتۋ شارالارى باعىتىندا ءتيىستى جۇمىستار جۇرگىزىلىپ جاتقانىن اتاپ ءوتتى.
ء«بىزدىڭ وبلىس قازاقستانداعى حالقى تىعىز ورنالاسقان اگرارلى ايماق. ەلىمىزدەگى ءار بەسىنشى ءسابي وسى وڭىردە دۇنيەگە كەلەدى. وڭتۇستىك قازاقستان وبلىسى شاعىن جانە ورتا كاسىپكەرلىكتىڭ دامۋى بويىنشا وبلىستار اراسىندا ءبىرىنشى ورىندا كەلەدى. سونىمەن قاتار وبلىسىمىز ءبىلىم بەرۋ مەن دەنساۋلىق ساقتاۋ مەكەمەلەر سانى جاعىنان دا الدا. ال بۇل سالادا اتقارىلار جۇمىستا از ەمەس. سوندىقتان دۇنيەجۇزىلىك بانكپەن الداعى ۋاقىتتا دا تۇراقتى جۇمىس ىستەۋگە ءازىرمىز, - دەدى اكىم.
وڭتۇستىك قازاقستانعا ءۇش كۇندىك جۇمىس ساپارىمەن كەلگەن مارتەبەلى مەيمان وڭىردە اتقارىلىپ جاتقان ىلكىمدى ىستەرمەن تانىسىپ شىققانىن ايتىپ, شىمكەنت قالاسىن ارالاۋ كەزىندە ونىڭ قارقىندى دامىپ كەلە جاتقانىنا كوز جەتكىزگەنىن ايتتى.
«بيىل دۇنيەجۇزىلىك بانك پەن قازاقستاننىڭ ارىپتەس اتانعانىنا 25 جىل تولىپ وتىر. وسى داتانى اتاپ ءوتىپ, قارجىلاندىرۋ باعدارلاماسىنىڭ كەزەكتى بەس جىلدىعىن قورىتىندىلايمىز. الداعى ۋاقىتتا قارجىلاندىرۋدىڭ جاڭا باعدارلاماسىن باستاۋدى جوسپارلاپ وتىرمىز», - دەپ قوستى اتو براۋن.
كەزدەسۋ سوڭىندا وبلىس اكىمى جانسەيىت تۇيمەباەۆ دۇنيەجۇزىلىك بانكتىڭ قازاقستانداعى تۇراقتى وكىلى ا.براۋنعا ساتتىلىك پەن تابىس تىلەدى.