بۇگىن «حابار» ارناسىندا «داۋرەن اباەۆپەن اشىق ديالوگ» باعدارلاماسىنىڭ كەزەكتى شىعارىلىمى كورسەتىلدى.
مينيستر ماڭىزدى سۇراقتارعا جاۋاپ بەرىپ, وزەكتى جاڭالىقتارعا توقتالدى. باعدارلاما بارىسىندا اقش پرەزيدەنتى دونالد ترامپتىڭ قر پرەزيدەنتى نۇرسۇلتان نازارباەۆقا قوڭىراۋ شالۋى ءسوز بولدى.
داۋرەن اباەۆتىڭ پايىمداۋىنشا, مەملەكەت باسشىلارىنىڭ تەلەفونمەن سويلەسۋى كوزبە-كوز تىلدەسۋمەن تەڭ.
«بۇنداي شارانى ەكى ەلدىڭ سىرتقى ساياسي ۆەدومستۆولارى الدىن-الا ۇيىمداستىرادى, پرەزيدەنتتەردىڭ جۇمىس گرافيكتەرىنە ەنگىزەدى. استانا مەن ۆاشينگتون اراسىنداعى 12 ساعاتتىق ايىرماشىلىقتى ەسكەرگەنىمىز ءجون. ەكى پرەزيدەنتتىڭ ۋاقىتىنا تەلەفونمەن سويلەسۋدى ىڭعايلى ەتىپ كەلىستىرۋ ۇلكەن جۇمىستى قاجەت ەتەدى. تاعى ءبىر ماڭىزدى جايت, قوڭىراۋ امەريكا تاراپىنان كەلىپ ءتۇستى. بۇل قوڭىراۋ ەكسپو-عا كەلىپ كەتكەن امەريكالىق دەلەگاتسيادان كەيىن بولدى. ياعني, استانا تۋرالى جاعىمدى اسەر العان دەلەگاتسيانىڭ ارقاسىندا اقش پرەزيدەنتى قوڭىراۋ شالۋعا نيەت ءبىلدىردى. بارلىق ارەكەتتەر ءبىر-بىرىمەن تىعىز بايلانىستى. سونىمەن قاتار, ەلباسىمىزدىڭ اقش-قا رەسمي ساپارمەن كەلۋگە شاقىرۋ الۋى دا جاقسى بەلگى دەپ ويلايمىن,» دەدى اباەۆ.
ەستەرىڭىزگە سالا كەتەيىك, باعدارلاما بارىسىندا مينيستر «تسيفرلىق قازاقستان» باعدارلاماسىنىڭ جۇمىسىنا توقتالىپ, استانادا وتكەن يسلام ىنتىماقتاستىق ءۇيىمى سامميتىنىڭ ماڭىزدىلىعى تۋرالى ايتىپ بەردى.