الماتىدا «شىعىس بازارى» حالىقارالىق فەستيۆالى باستالادى

وسىناۋ وقيعاعا ەلىمىزدەگى قۇراق قۇراۋ شەبەرلەرىنىڭ قاۋىمداستىعى ۇيىتقى بولىپ وتىر. ءىس-شارا اياسىندا تۇڭعىش رەت حالىقارالىق ارت-جوبالار كور­سەتىلمەك. فەستيۆالدىڭ جالاۋ­لاتقان جوباسى – «ORIENT» اتتى تاڭعالارلىق تو­قىما پاننولاردىڭ جىلجىمالى كورمەسى بولىپ تابىلادى. ونىڭ قۇرامىندا چەحيا, سلو­ۆاكيا, بىرىككەن كورولدىكتەر, گەر­مانيا, پولشا مەن قازاقستان سياقتى ەلدەردىڭ ارت-كۆيلت پەن پەچۆورك تەحنيكاسى شەبەرلەرىنىڭ قولىنان شىققان 60-تان استام جۇمىس بار.

ORIENT كورمەسى – العاش رەت 2017 جىلدىڭ ءساۋىر ايىندا پراگادا وتكەن جىل سايىنعى حI حالىقارالىق Prague Patchwork Meeting فەستيۆالىنە قاتىسىپ, وزىندىك ۇلگىلەرىمەن دارالانعان.

بايقاۋلارعا تولى ۇلكەن فەس­تيۆالدىڭ تاعى ءبىر توسىنسىيى – «مەنىڭ باقشام» اتتى بالالاردىڭ قۇراق قۇراۋ كورمەسى بولماق. بۇل بولىمگە ەۋروپا مەن رەسەيدىڭ 6 مەن 16 جاس ارالىعىنداعى جاس شەبەرلەرىنىڭ جۇمىستارى قويىلادى.

كورمە ەكسپوزيتسيالاردان بولەك, كەلۋشىلەرگە تاجىريبەلىك ءبولىم دە قاراستىرعان. فەس­­تيۆالدىڭ بارلىق قا­تى­سۋ­شىلارى قازاقستاندىق ىس­مەر­لەردىڭ تەگىن شەبەرلىك سا­عاتتارىنا قاتىسىپ, ۇزدىك ۇر­دىس­تەردى ۇيرەنە الادى. سو­نىمەن قاتار, فەس­تيۆالعا قوناق رەتىندە, قازاق­ستانداعى قۇراق قۇراۋ شەبەرلەرى قاۋىم­داستىعىنىڭ ارنايى شاقىرۋىمەن حالىقارالىق دەڭگەيدەگى تانىمال كۆيلتتەر كەلەدى. كورمەدە قولدان جا­سالعان بۇيىمداردىڭ جار­مەڭكەسى ءوتىپ, ەلىمىزدىڭ تانىمال ديزاينەرلەرى ءساندى كيىم ۇلگىلەرىن ۇسىنادى دەپ كۇتىلۋدە.

قازاقستان قۇراق قۇراۋ شە­بەر­لەرى قاۋىمداستىعىنىڭ پرە­زيدەنتى تامارا شتروشەرەردىڭ ايتۋىنشا, «شىعىس بازارى» فەستيۆالى ەڭ الدىمەن, ەلىمىزدەگى ۇلتتىق قولدانبالى قۇراق قۇراۋ ونەرىن قولداۋ مەن دامىتۋدى كوزدەيدى. ال الماتىلىقتار شەت­ەلدىك قۇراق قۇراۋشىلاردىڭ قولىنان شىققان دۇنيەلەردى تاماشالاسا, ءوز شەبەرلەرىمىز جاڭا جاۋھارلار تۋدىرۋ ءۇشىن توعىسادى. 

ون ساۋساعىنان ونەر تامعان ىسمەرلەرگە حالىقارالىق قازى­لار القاسى تورەلىك ەتەدى. جە­ڭىمپازدارعا فەستيۆال دەمەۋ­شىسى «Bernina» تىگىن ماشينا­سىنىڭ تانىمال برەندى باعالى سىيلىقتار تاعايىنداپ وتىرعان جايى بار.

ايناش ەسالي, «ەگەمەن قازاقستان»

الماتى