مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ بىرىڭعاي ستاندارتىن ەنگىزۋ ماسەلەسى قازاقستاننىڭ ءاربىر ازاماتىنا قاتىستى جانە ەلىمىزدىڭ XXI عاسىرداعى دامۋىنىڭ, ونىڭ ەكونوميكالىق, الەۋمەتتىك جانە رۋحاني جاڭعىرۋىنىڭ جاڭا كەزەڭىن اشادى.
جالپىۇلتتىق تالقىلاۋ شەڭبەرىندە قازاقستان حالقى اسسامبلەياسى مەن ونىڭ كەڭەسىنىڭ, قحا عىلىمي-ساراپتامالىق كەڭەسىنىڭ مۇشەلەرى, دوستىق ۇيلەرىنىڭ, ەلىمىزدەگى ەتنومادەني بىرلەستىكتەردىڭ, عىلىمي-ساراپتامالىق توپتاردىڭ وكىلدەرى جانە قحا كافەدرالارىنىڭ, قوعامدىق كەلىسىم كەڭەستەرىنىڭ, انالار كەڭەستەرىنىڭ, بۇقارالىق اقپارات قۇرالدارى مەن جاستار ۇيىمدارىنىڭ وكىلدەرى جاڭا ءالىپبيدى تالقىلاۋ مەن قولداۋدىڭ بىرىڭعاي رەسپۋبليكالىق كۇنىن وتكىزدى.
قازاقستان حالقى اسسامبلەياسى تاريحي قادام – مەملەكەتتىك ءتىلدىڭ لاتىن گرافيكاسىنا كوشۋىن ىسكە اسىرۋ ءۇشىن بار كۇش-جىگەرىن جۇمساۋ جونىندە ءتاستۇيىن شەشىمگە بەكىگەنىن بىلدىرەدى.
ءبىز ءبارىمىز دە ءوزىمىزدىڭ تاۋەلسىز تاڭداۋىمىزدىڭ تەك ءبىزدىڭ جالپىۇلتتىق مۇددەلەرىمىزبەن – تاتۋلىق پەن كەلىسىم, باسەكەگە قابىلەتتىلىك, پراگماتيزم جانە سانا اشىقتىعى مۇددەلەرىمەن بايلانىستى ەكەنىن انىق تۇسىنەمىز.
بۇل – وبەكتيۆتى قاجەتتىلىكتەن تۋىنداعان ۋاقىت تالابى.
قازاق ءتىلىن لاتىن الىپبيىنە كوشىرۋ جالپىۇلتتىق بىرىكتىرۋ فاكتورى رەتىندە مەملەكەتتىك ءتىلدىڭ ءرولىن ودان ءارى بيىكتەتە تۇسەتىنىنە, قوعامدىق كەلىسىم مەن جالپىۇلتتىق بىرلىكتى نىعايتاتىنىنا, ۇلتتىق كودىمىزدى ساقتاۋدى قامتاماسىز ەتەتىنىنە نىق سەنىمدىمىز.
لاتىن گرافيكاسىن ەنگىزۋ ەلىمىزدەگى كوپ تىلدىلىكتىڭ دامۋىنا جاعداي جاسايدى. قازاقستاننىڭ الەمدىك ەكونوميكا مەن كوممۋنيكاتسيالارعا, عىلىم مەن مادەنيەتكە ينتەگراتسيالانۋى ءۇشىن, ەكونوميكالىق دامۋ جانە ىنتىماقتاستىق ۇيىمىنا كىرۋ ءۇشىن, قوعام ءومىرىنىڭ بارلىق سالالارىن تسيفرلاندىرۋ پرينتسيپىندە ءۇشىنشى جاڭعىرتۋ جۇرگىزۋ ءۇشىن ۇزاق مەرزىمدى اسەر بەرە الادى.
بۇل ينۆەستورلار ءۇشىن, شەتەلدىك تۋريس-تەر ءۇشىن جانە قازاقستانعا قىزىعۋشىلىق تانىتقانداردىڭ بارلىعى ءۇشىن ءبىزدىڭ ەلىمىزدى قولجەتىمدى دە تارتىمدى ەتە تۇسەدى. زاماناۋي قازاقستاندىق مادەنيەتتى جاھاندا ىلگەرىلەتۋ ءۇشىن جاڭا پەرسپەكتيۆالار اشادى.
شەتەلدە تۇراتىن وتانداستارىمىز ءۇشىن انا ءتىلى مەن جازۋدى دامىتۋدىڭ, تاريحي وتانىمەن جاقىنداسۋدىڭ جاڭا مۇمكىندىكتەرى پايدا بولادى. لاتىن ءالىپبيىن ەنگىزۋ – ەلىمىزدىڭ باسەكەگە قابىلەتتىلىگىن ارتتىرۋعا جانە قازاقستاننىڭ الەمنىڭ نەعۇرلىم دامىعان ەلدەرىنىڭ «وتىزدىعىنا» ەنۋىنە باعىتتالعان, جاڭعىرتۋ رەفورمالارىنا تولىعىمەن ساي كەلەتىن جانە ولاردىڭ اجىراماس بولىگى بولىپ تابىلاتىن پراگماتيكالىق سىندارلى قادام بولىپ تابىلادى.
ءبىز ەلىمىزدىڭ بارلىق ازاماتتارىن مەملەكەتتىك ءتىلدىڭ جاڭا ءالىپبيىن تالقىلاۋ جانە قابىلداۋ بويىنشا جۇمىستى قولداۋعا, قۋاتتى دا وركەندەگەن قازاقستاندى قۇرۋىمىز ءۇشىن مەملەكەت باسشىسىنىڭ وسى باستاماسىن ءتيىمدى ىسكە اسىرۋدى قامتاماسىز ەتۋگە شاقىرامىز!
لاتىن الىپبيىنە كوشۋ – ءبىزدىڭ ورتاق مىندەتىمىز!
قحا عىلىمي-ساراپتامالىق كەڭەسىنىڭ كەڭەيتىلگەن وتىرىسى استانا قالاسى, 2017 جىلعى 15 قىركۇيەك