ماجار بايلانىسىنىڭ ماڭىزى زور

ۆەنگريا پاۆيلونى ەلەكتر جانە قالالىق جوسپارلاۋ سالاسىنداعى ەڭ جاڭا قوندىرعىلاردى كورسەتتى. تاقىرىپ ەل ەنەرگياسىنىڭ قولجەتىمدى كوزدەرىنىڭ گەوگرافيالىق جانە ۇنەمدى ەرەكشەلىكتەرىنە نەگىزدەلگەن. باستى نازار كۇن ەنەرگياسىنا ءبولىندى, بىراق ۆەنگريا پاۆيلونىنىڭ كورنەكى شەشىمى نەگىزىندە وسىمدىك ەنەرگياسىن ءتيىمدى پايدالانۋدى بىلدىرەتىن ءومىر اعاشى يدەياسى, ونى قولدانۋدىڭ جەتىك تەتىگى ۇسىنىلدى. ينستاللياتسيالاۋ نەگىزىندە كورسەتىلگەن ءومىر اعاشىنا پاۆيلون قوناقتارى 30 000-عا جۋىق تىلەكتەرىن قالدىرعان ەكەن. ال كەلۋشىلەردىڭ سانى شامامەن 300 000-عا جەتكەن ەكەن. بۇل – كورمەنىڭ ەڭ كىشكەنتاي پاۆيلوندارىنىڭ ءبىرى ءۇشىن تاماشا كورسەتكىش بولىپ تابىلادى.

ۆەنگريا پاۆيلونىن ۇلتتىق ەكونوميكا ءمينيسترى ميحاي ۆارگا, سىرتقى ىستەر جانە ساۋدا ءمينيسترى پەتەر سييارتو, اۋىل شارۋاشىلىعى ءمينيسترى شاندور فازەكاش, ەكسپو-2017 كورمەسىنىڭ كوميسسارى ناندور كارتەزي, ۆەنگريانىڭ قازاقستانداعى ەلشىسى اندراش باراني, قازاقستان سىرتقى ىستەر ءمينيسترى قايرات ءابدىراحمانوۆ, پرەمەر-ءمينيستردىڭ كەڭەسشىسى جانە اۋىل شارۋاشىلىعى ءمينيسترى اسقار مىرزاحمەتوۆ سىندى لاۋازىمدى قوناقتار تاماشالاعان. ەكى ەلدىڭ ۇكىمەتتەرىنىڭ كەزدەسۋلەرى بارىسىندا مەديتسينا مەن تۋريزم سالالارىنداعى بيزنەس-ىنتىماقتاستىق ماسەلەلەرى تالقىلاندى. ۆەنگريا ۇكىمەتى جالپى وتكەنگە, ورتاق بايلانىستارعا جانە حالىقتار اراسىنداعى ءجۇز جىلدان ارتىق ىنتىماقتاستىققا بايلانىستى قازاقستانمەن قارىم-قاتىناستىڭ ەرەكشە ماڭىزدى ەكەندىگىن اتاپ ءوتتى.

ۆەنگريا پاۆيلونى مادەني ءىس-شارالاردى دا مولىنان ۇيىمداستىردى. ولاردىڭ ىشىندەگى قىپشاقتار كۇنى – ۆەنگەر مەن قازاق داستۇرلەرىنىڭ ءوزارا بايلانىستىعىن, ۇندەستىگىن ايشىقتادى. كورمەنىڭ سوڭعى كۇندەرىندە ۆەنگريا ەكونوميكا مەن دەنساۋلىق ساقتاۋ سالاسى بويىنشا كونفەرەنتسيا ءوتتى. شارا بارىسىندا «ەلەكتروندىق پاسپورت», ساۋىقتىرۋ ءتۋريزمى جانە باسقا دا تارتىمدى جوبالار تالقىلاندى.

ەكى ەلدىڭ ۇكىمەتتەرىنىڭ بولجامدارى بويىنشا ەكونوميكالىق جانە رۋحاني بايلانىستاردى جولعا قويۋدىڭ ارقاسىندا سىرتقى ساۋدا اينالىمى بىرنەشە ەسەگە ۇلعايادى, قازىردىڭ وزىندە ول 300 ميلليون دوللاردى قۇرايدى.

اسحات رايقۇل,

«ەگەمەن قازاقستان»