ارقالىقتا كەيكى بابامىزدىڭ ەسىمىن ۇلىقتاۋعا ارنالعان «باس كەسپەك بولسا دا» دەگەن تاقىرىپپەن ايتىس باستالدى.
وبلىس اكىمىنىڭ ورىنباسارى مارات جۇندىباەۆ ايتىستىڭ باستالۋىمەن جۇرتشىلىقتى قۇتتىقتاپ, كەيكىنىڭ ونەرلى ۇرپاقتارىنا ساتتىلىك تىلەدى. ايتىسقا التى جۇپ جاس اقىندار قاتىسۋدا. قازىر ەكى جۇپ ايتىستى.
توبا وتەپباەۆ پەن اسەم ەەرەجەقىزى, ديدار قاميەۆ پەن مارجان ەسجانوۆا كورەرمەننىڭ كوڭىلىنەن شىعاتىنداي, تاماشا ونەر كورسەتتى. ەكى جۇپ تا قازىلاردان جوعارى باعا الدى.
ارقالىق قالاسىنداعى جاستار تەاترىندا ءوتىپ جاتقان رەسپۋبليكالىق ايتىس كورەرمەننىڭ دە, اقىنداردىڭ دا دەلبەسىن قوزدىرىپ, قىزا ءتۇستى. قازىر ساحنادا ايتىستا تانىلىپ قالعان اقىندار قوستانايلىق سالتانات وتەلباەۆا مەن الماتىلىق قازىرەت بەردىحان تاماشا ايتىس ۇلگىسىن كورسەتىپ جاتىر. ەكى اقىن قازاقتىڭ جاراسىمدى ءازىل-قالجىڭىن ايتىپ, كورەرمەندى دۋ-دۋ كۇلكىگە كومدى.
ايتپاقشى, اقىندار ايتىسىنا قازاقستاننىڭ حالىق اقىندارى ءاسيا بەركەنوۆا, اسەلحان قالىبەكوۆا, قونىسباي ءابىل, جازۋشى عۇمار احمەتچين, اقىن ابىلاي ماۋدانوۆ قازىلىق ەتۋدە.
ايتىستى ءجۇرسىن ەرمان جۇرگىزىپ وتىر.
ءنازيرا جارىمبەت
«ەگەمەن قازاقستان»