قانات يسلام الداعى جوسپارلارىمەن ءبولىستى

قانات يسلام 24.كز تەلەارناسىنا سۇحبات بەرىپ, بولاشاق جوسپارلارىمەن ءبولىستى, – دەپ حابارلايدى Qsport.kz پورتالى.

استانا قالاسىندا بوكس كەشىن وتكىزىپ, 25-جەڭىسىنە قول جەتكىزگەن QAZAQ الداعى جوسپارلارى مەن قارسىلاسى برەندون كۋكتىڭ الەۋەتى جايلى ايتىپ بەردى.

قانات يسلام: «جەكپە-جەككە دايىندىعىم وتە جاقسى بولدى. قازاق ەلى مەنەن نوكاۋت كۇتتى. ويتكەنى الماتىداعى جەكپە-جەگىمدە نوكاۋتتى كورە الماعان ەدى. مەن دە قارسىلاسىمدى 1 راۋندتا-اق نوكاۋتقا تۇسىرگىم كەلەدى, الايدا الدىڭداعى تۇرعان قاپشىق ەمەس, ءوزىڭ سياقتى جاتپاي-تۇرماي دايىندالعان سپورتشى عوي. كۋك ماعان قايسارلىعىن, وڭاي شاعىلاتىن جاڭعاق ەمەس ەكەندىگىن رينگتە سەزدىردى. جانكۇيەرلەر تاراپىنان قانشا قىسىم كورسە دە, شارشى الاڭدا ءوزىن ەركىن سەزىندى. اللاعا شۇكىر, ەلىمە جارقىن جەڭىس پەن كەرەمەت بوكس كەشىن سىيلاعانىما قۋانىشتىمىن», – دەدى.

سونىمەن قاتار QAZAQ الداعى جەكپە-جەكتەرىن HBO كانالى كورسەتۋ مۇمكىندىگىن دە اتاپ ءوتتى. «كانادالىق بوكسشىمەن ءبىر دەڭگەيدە ەدىك. وسى جەكپە-جەكتە كىمنىڭ ۇلكەن شايقاستارعا جولى اشىلاتىنى ايقىندالۋ كەرەك ەدى. HBO, Show time كانالدارى ەكەۋمىزگە دە كەلىسىمشارت ۇسىنىپ, بولاشاقتا جەكپە-جەكتەرىمىزدى كورسەتۋ تۋرالى شەشىم شىعارۋدى ۇيعارعان. جالپى, بۇل جەكپە-جەكتى HBO كانالىنىڭ ءتۇسىرۋى جوسپارىندا بولدى. الايدا ءبىز ۇلتتىق ارنا مەن قازسپورت ارناسىمەن كەلىسىپ قويعان سوڭ, ول ارنامەن كەلىسىمشارت جاساسپادىق. ەندى بولاشاقتا HBO كانالى ەلىمىزگە كەلىپ جەكپە-جەكتەرىمدى ءتۇسىرۋى مۇمكىن», – دەدى قانات.

سارىارقا ۆەلوترەگىنە جينالعان قالىڭ كورەرمەننىڭ قولداۋى جايلى ءسوز قوزعاپ, «شەتەلدە ونەر كورسەتسەم دە, ەلىمىزدە جۇدىرىقتاسسام دا باستى ماقسات – ەلدىڭ ابىرويىن اسقاقتاتۋ. كوك تۋدى جەلبىرەتەمىز دەپ جۇرگەننەن سوڭ, ءار جەڭىس مەن ءۇشىن وتە قىمبات. سەن ءۇشىن, تاۋەلسىز ەلىڭ, جانى قازاق قانداستارىڭ تاقىمىن قىسىپ, قولداۋ كورسەتىپ تۇرعاندا ەشقانداي ايانىپ قالۋعا بولمايدى. شارشى الاڭدا جانىڭدى سالىپ جۇدىرىقتاسۋىڭ كەرەك. استاناداعى جەكپە-جەگىمە امەريكادان كەلگەندەر ەلىمىزدى كورىپ, قاتتى تاڭعالدى. ەلىمىزدىڭ قوناقجايلىعى مەن اسەم قالامىزعا ءتانتى بولىپ, ماعان امەريكادا نە ىستەپ ءجۇرسىڭ؟ دەدى. مەنىڭ وسى جەكپە-جەگىمنەن كەيىن, پروموۋتەرىمە امەريكادان كوپ حابارلاسىپ جاتىر. قازاقستانداعى ۇلكەن ارەنالاردى كورىپ, حالىقتىڭ سپورتقا دەگەن قۇشتارلىعىن بايقاعان سوڭ, ولار دا قازاقستاندا جەكپە-جەك وتكىزۋگە قۇلشىنىس تانىتىپ وتىر. بولاشاقتا استانا مەن الماتى قالاسى كاسىپقوي بوكستىڭ وتانى بولۋى دا مۇمكىن», – دەيدى QAZAQ.

اڭگىمە بارىسىندا قازاق كاسىپقوي بوكسىنىڭ دەڭگەيى تۋرالى دا ءسوز قوزعالدى.

«جالپى, قازاقستاندىق كاسىپقوي بوكسشىلار الەمدەگى ەڭ ۇزدىك كۇرزى جۇدىرىقتى بىلعارى قولعاپ شەبەرلەرىنىڭ قاتارىنا كىرەدى دەپ تولىق سەنىممەن ايتا الامىن. استانادا وتكەن بوكس كەشى سونىڭ ايقىن دالەلى بولا الادى», -دەدى.

بولاشاق قارسىلاستار تۋرالى.

«مەنىڭ بوكستا جۇرگەنىمە 20 جىلداي, كاسىپقوي بوكستا 6 جىل ۋاقىت بولدى. قازىرگى تاڭدا كوتتو بولسىن, پاكياو بولسىن كەز كەلگەن قارسىلاسپەن جۇدىرىقتاسۋعا دايىنمىن. اللا قالاسا, تاۋەلسىزدىك كۇنىنە وراي, تاعى ءبىر جەكپە-جەك وتكىزۋىم مۇمكىن. سپورتتان كەتكەننەن كەيىن, QAZAQ پروموۋشەن كومپانياسىنىڭ جوعارى دەڭگەيگە جەتكىزىپ, ءاربىر قازاق بوكسشىسى الەمنىڭ كەز كەلگەن تۇكپىرىندە جەكپە-جەك وتكىزە الاتىن جاعدايعا جەتكىزگىم كەلەدى», – دەيدى قازاقتىڭ قاناتى.

ەسكە سالا كەتەيىك, قانات يسلام سوڭعى جەكپە-جەگىن استانا قالاسىندا برەندون كۋككە قارسى وتكىزىپ, 9-راۋندتا تەحنيكالىق نوكاۋتپەن جەڭىسكە جەتكەن بولاتىن. ءسويتىپ, وتانداسىمىز ءبىرىنشى ورتا سالماقتاعى WBO, NABO جانە WBA Inter-Continental چەمپيوندىق بەلبەۋلەرىن قورعاپ قالدى.