تۇركى اكادەمياسى حالىقارالىق ۇيىمىنىڭ (TWESCO) ۇيىمداستىرۋىمەن قازاقستاندىق جانە شەتەلدىك ءبىر توپ عالىمدار مەن زەرتتەۋشىلەر, تىلشىلەر «كەنتايدان ۇلىتاۋعا دەيىن: تاريحي جادىنىڭ جاڭعىرۋى» ءىىى حالىقارالىق ەكسپەديتسياسى جولعا شىققان بولاتىن.
استانادان اتتانعان ەكسپەديتسيا كەشە جەزقازعانعا جەتىپ, ايالداعان. قۇرامىندا قازاقستان, قىرعىزستان, ءازىربايجان, تۇركيا, موڭعوليا سىندى بىرنەشە ەلدىڭ تاريحشى, جازۋشى, جۋرناليستەرى بار توپ بۇگىن جەزقازعاننان جوشى حان, الاشا حان, دومباۋىل كەسەنەلەرىنە اتتاندى.
اتالعان ەكسپەديتسيا پرەزيدەنت نۇرسۇلتان نازارباەۆتىڭ «رۋحاني جاڭعىرۋ» باعدارلاماسىن ىسكە اسىرۋ ماقساتىندا قولعا الىنىپ وتىر. اكادەميا باسشىسى دارحان قىدىرالى باستاعان قۇرام ۇلان-باتىر قالاسىنان باستالعان ساپاردى ۇلىتاۋدا اياقتاماق.
ەستەرىڭىزگە سالا كەتسەك, تۇركى اكادەمياسى 2017 جىلدىڭ 15 تامىزىنان 17 قىركۇيەگىنە دەيىن موڭعوليا جانە قازاقستان اۋماعىنان وتەتىن «كەنتايدان ۇلىتاۋعا دەيىن: تاريحي جادىنىڭ جاڭعىرۋى» اتتى كەزەكتى ءىىى حالىقارالىق ەكسپەديتسياسىن ۇيىمداستىرعان بولاتىن. موڭعولياداعى كەنتاي ايماعىنان باستاۋ العان ەكسپەديتسيا 15-16 قىركۇيەك كۇندەرى ۇلىتاۋداعى الاشا حان مەن جوشى حان كەسەنەلەرىنىڭ باسىندا قورىتىندىلانادى.
ەكى كۇندىك ەكسپەديتسياعا شىققان توپ ەندى ۇلىتاۋ اۋدانىنىڭ ورتالىعى مەن ساتباەۆ قالاسىندا بولىپ, كەزدەسۋلەر وتكىزەدى.