القالى جيىن سوڭىندا سىرتقى ىستەر ءمينيسترى قايرات ءابدىراحمانوۆ كەلىسسوزدەردى قورىتىندىلاپ, سيرياعا قاتىستى ورتاق شەشىمدى مالىمدەدى.
قايرات ءابدىراحمانوۆتىڭ ايتۋىنشا, جيىندا اڭگىمە سوعىستى توقتاتۋ مەن اسكەري-گۋمانيتارلىق كومەك كورسەتۋ توڭىرەگىندە وربىگەن. مينيستر استانا كەلىسسوزدەرىنىڭ ناتيجەسىندە سيرياداعى جاعداي جاقسى جاققا وزگەرىپ, داعدارىستى ساياسي كەلىسسوزدەر ارقىلى شەشۋدىڭ كوكجيەگى كەڭەيە تۇسكەنىنە توقتالدى.
«قازاقستان پرەزيدەنتىنىڭ ۇزدىكسىز قولداۋىمەن جۇزەگە اسىپ كەلە جاتقان سيريا ماسەلەسى بويىنشا استانا پروتسەسسى ءوز مارەسىنە جەتتى. جيىنعا قاتىسۋشىلار استانا پلاتفورماسى اياسىندا وسىعان دەيىن كەلىسىلگەن ۋاعدالاستىقتاردىڭ ورىندالۋ بارىسىن تالقىلاپ, سيرياداعى جاعدايدى رەتتەۋ بويىنشا ءوزارا ءىس-قيمىل جولدارىن تانىستىردى», – دەدى سىرتقى ىستەر ءمينيسترى ق. ءابدىراحمانوۆ.
مينيستر سيرياداعى شيەلەنىستىڭ قايتا ءورشۋى ەشقانداي تاراپقا پايدا اكەلمەيتىنىن ايتتى. سوندىقتان, ەلدەگى جاعدايدى تۇراقتاندىرۋعا اسەرى بار ەلدەردىڭ ساياسي كەلىسسوزدەر جۇرگىزۋىن ماڭىزدى دەپ ەسەپتەيتىنىن جەتكىزدى ق.ءابدىراحمانوۆ.
«قازاقستان سيرياداعى جاعدايدى رەتتەۋگە باعىتتالعان بارلىق بەيبىت باستامالاردى قولداي وتىرىپ, كەلىسسوزدەرگە ءوز الاڭىن ۇسىنۋىن جالعاستىرا بەرەدى. ەلدە قاقتىعىس باستالا سالا, قازاقستان پرەزيدەنتى ن.نازارباەۆ الەم ەلدەرىن سيرياداعى شيەلەنىستى بەيبىت جولمەن شەشۋگە شاقىرعان بولاتىن. قاڭتاردا باستالعان استانا كەلىسسوزدەرىنىڭ تابىستى بولاتىنىنا سەنبەگەندەر تابىلدى. الايدا, وسىندا جينالعانداردىڭ جىگەرىنىڭ ارقاسىندا ەلدەگى جاعدايدى بەيبىت جولمەن شەشۋگە مۇمكىندىك تۋىپ وتىر», – دەپ پىكىرىمەن ءبولىستى ق.ءابدىراحمانوۆ.
سونىمەن قاتار, سىرتقى ىستەر ءمينيسترى استاناداعى كەلىسسوزدەردىڭ ارقاسىندا بەيبىتشىلىك پەن تۇراقتىلىقتى قايتا ورناتۋدا ماڭىزدى ناتيجەلەرگە قول جەتكەنىن جانە سيريادا دەەسكالاتسيا ايماقتارىن قۇرۋعا مۇمكىندىك تۋعانىن حابارلادى. ق.ءابدىراحمانوۆتىڭ پىكىرىنشە, بۇل – استانا كەلىسسوزدەرىنىڭ ماڭىزدى شەشىمدەرىنىڭ ءبىرى.
ق.ءابدىراحمانوۆ جيىندا يران, رەسەي جانە تۇركيا تاراپىنىڭ قول جەتكىزگەن ورتاق مالىمدەمەمەن تانىستىردى. وندا اتالعان ءۇش ەلدىڭ سيريا اراب رەسپۋبليكاسىنىڭ بىرلىگى مەن تەرريتوريالىق تۇتاستىعىن, ەگەمەندىگى مەن تاۋەلسىزدىگىن ساقتاي وتىرىپ, كەپىل-مەملەكەتتەر رەتىندە بىرقاتار ەلدەگى زورلىق-زومبىلىقتى ازايتىپ, وق اتۋدى توقتاتۋعا قولدايتىنى ايتىلعان.
ءۇش ەلدىڭ مالىمدەمەسىندە بىرقاتار ماسەلەلەر قارالعان. 2017 جىلعى 4 مامىردا كەلىسىلگەن مەموراندۋمعا سايكەس, 4 دەەسكالاتسيا ايماعىن قۇرۋ جونىندە جاريالانعان. اتاپ ايتار بولساق, شىعىس گۋتا, حومس ولكەسىنىڭ سولتۇستىگىندە, يدليب جانە كورشى اۋدانداردا, سيريانىڭ وڭتۇستىگىندە تۇراقتاندىرۋ ايماعى قۇرىلماق. ايتسە دە, مۇنداي دەەسكالاتسيا ايماقتارى ۋاقىتشا 6 ايلىق مەرزىمگە جاسالادى جانە ونى ۇزارتۋ كەپىل-مەملەكەتتەردىڭ قۇزىرەتىنە كىرەدى. مۇنداي ايماقتاردىڭ سيريانىڭ بىرلىگى مەن تۇتاستىعىنا نۇقسان كەلتىرمەيتىنى ايتىلعان مالىمدەمەدە.
سيرياداعى شيەلەنىستە بىرنەشە قارۋلى توپتىڭ قاقتىعىسىپ جاتقانى ءمالىم. سولاردىڭ كەيبىرى تەرروريستىك ۇيىم رەتىندە تانىلعان. كەلەسىسى مەملەكەتتىڭ نەگىزگى كۇشى سانالادى. وسىعان وراي, كەپىل-مەملەكەتتەر مالىمدەمەسىندە سيريا اراب رەسپۋبليكاسى بيلىگى جانە قارۋلى وپپوزيتسيا كۇشتەرىمەن قاقتىعىسۋدىڭ الدىن الۋ ماقساتىندا يدليب پروۆينتسياسى مەن كورشى اۋداندارداعى اسكەري كۇشتەردى قايتا ورنالاستىرۋ قاراستىرىلعان. ال يليم, «دجابحات ءان-نۋسري» سەكىلدى ء«ال-كايدامەن» قاتىسى بار تەرروريستىك توپتارمەن كۇرەس جالعاسا بەرەدى. سونىمەن بىرگە, دەەسكالاتسيا ايماقتارىنداعى جاعدايدى باقىلاۋ ماقساتىندا يران-رەسەي-تۇركيا بىرلەسكەن باسقارۋ ورتالىعىن قۇرۋ جوسپارلانىپ وتىر.
«استانا كەلىسسوزىن باقىلاۋشىلار جانە مۇددەلى حالىقارالىق قوعام مۇشەلەرىن سيرياداعى دەەسكالاتسيا مەن تۇراقتاندىرۋ ارەكەتىنە قولداۋعا, سيريا تۇرعىندارىنا قوسىمشا كومەك جىبەرۋگە, تاريحي قۇندىلىقتاردى قورعاپ, الەۋمەتتىك جانە ەكونوميكالىق ينفراقۇرىلىم سەكىلدى ومىرگە قاجەتتى وبەكتىلەردى قايتا قالپىنا كەلتىرۋگە شاقىرامىز», – دەپ وقىپ بەردى ق.ءابدىراحمانوۆ.
استانا كەلىسسوزدەرىن جيىنعا قاتىسۋشىلار جوعارى باعالادى. ءۇش ەل كەلىسكەن مالىمدەمەدە ەلباسى ن.نازارباەۆتىڭ سيريا كەلىسسوزدەرىنىڭ 6-شى كەزەڭىن وتكىزۋگە قوسقان ۇلەسىنە ىرزاشىلىعىن ءبىلدىردى. داماسك دەلەگاتسياسىنىڭ مۇشەسى باشار ءال-دجاافاري استانا كەلىسسوزدەرىنىڭ تيىمدىلىگى مول ەكەنىن ءسوز ەتتى. ونىڭ پايىمداۋىنشا, قازاقستان استاناسىنداعى پروتسەسستىڭ پايداسى مول بولعاندىقتان, بىرقاتار مەملەكەتتەر قىزىعۋشىلىق تانىتىپ وتىرعان كورىنەدى. ءوز كەزەگىندە سيريا وپپوزيتسياسى دەلەگاتسياسىنىڭ وكىلى ايمان ءال-ءاسيمي كوزدەلگەن ماقساتتارىنىڭ بىرىنە قول جەتكىزگەنىن ايتادى.
«وسى كەزەڭدە 3 ميلليون تۇرعىنى بار يدليبتە دەەسكالاتسيا ايماعىن قۇرۋ جونىندە كەلىسىم جاسالدى. بۇل – بۇگىنگى باستى ماقسات بولاتىن. مۇنداي وڭتايلى قادامدار جەنەۆادا ساياسي شەشىمدەرگە ءوز اسەرىن تيگىزەدى. سيريا بيلىگى تۇتقىنعا تۇسكەندەردى بوساتۋدى مۇمكىندىگىنشە كەيىنگە قالدىرۋدى كوزدەپ وتىر. الايدا قازاقستان مەن رەسەي تاراپى بۇل ماسەلەدە كومەك قولىن سوزاتىنىنا ۋادە بەردى», – دەدى وپپوزيتسيونەرلەر وكىلى ايمان ءال-ءاسيمي.
سيرياداعى شيەلەنىستى شەشۋ بارىسىندا اتالعان ەلدە ەشكىمگە باس بەرمەي اساۋلىق تانىتقان سەركەلەردىڭ باسىن ءبىر ورتاعا جيناپ, وڭ ناتيجەگە قول جەتكىزۋ وڭايعا سوققان جوق. سيريادا ءالى دە شەشىلمەگەن ماسەلەلەر جەتەرلىك. وسىعان سايكەس, كەلىسسوزدەرگە قاتىسۋشىلار كەلەسى باس قوسۋدىڭ بيىلعى قازاندا وتەتىنىن حابارلادى.
اباي اسانكەلدى ۇلى,
«ەگەمەن قازاقستان»