مىڭنان استام استانالىق ستۋدەنتتىڭ قاتىسۋىمەن «بايتەرەك» مونۋمەنتىنىڭ قاسىندا جالپى رەسپۋبليكالىق «رۋحاني جاڭعىرۋ» جاستار اكتسياسى باستاۋ الدى.
دوڭگەلەنە ساپ تۇزەسكەن جاستاردىڭ كوڭىل-كۇيىنەن وزگەشە مەرەكەلىك لەپ ەسەدى. قولدارىنا ۇستاعان ءتۇرلى-ءتۇستى شاردى قالىقتاتىپ اسپانعا قويا بەرگەندە, استانانىڭ اسپانىن جاۋلاعان شارلار كوز ۇشىنان بۇلدىراپ بارىپ, ساعىمعا اينالدى.
سالتاناتتى شاراعا قاتىسقان ريو-دە جانەيرو وليمپياداسىنىڭ چەمپيونى دانيار ەلەۋسىنوۆ جاستاردىڭ باسىن بىرىكتىرىپ, ىزگىلىككە ۇيىستىرىپ وتىرعان مۇنداي شارالاردىڭ ماڭىزى زور ەكەنىنە توقتالدى. استانا قالاسى جاستار ساياساتى ماسەلەلەرى جونىندەگى باسقارماسىنىڭ جەتەكشىسى اسحات ورالوۆ رۋحاني جاڭعىرۋدىڭ العىشارتى رەتىندە ۇلتتىق مادەنيەتتى ساقتاۋ مەن ناسيحاتتاۋ بويىنشا اتقارىلاتىن ءىس-شارالار رەتى تۋرالى بايانداپ ءوتتى.
– مەملەكەت باسشىسى ءبىرتۇتاس ۇلت بولۋ ءۇشىن بولاشاققا ققارقىندى قادام باسۋدى جانە بۇقارالىق سانانى وزگەرتۋدە جاستارعا ۇلكەن ءۇمىت ارتىپ وتىر. وسى ماقساتا ۇيىمداستىرعان مۇنداي ايتۋلى شارادان ەلىمىزدىڭ بەلسەندى جاستارى قالىس قالماۋى قاجەت. ال اكتسيانى 22 قىركۇيەك كۇنى كاسپي جاعالاۋىندا قورىتىندىلايمىز, – دەيدى ول.
باسقارما جەتەكشىسىنىڭ ايتۋىنشا, ىزگىلىك پەن جاسامپازدىقتى تۋ ەتكەن اكتسيا شەڭبەرىندە ء«بىلىم», «اسار», «تاعزىم», «ونەر» اتتى ءتورت باعىتتا ەل جاستارى ونەگە بولارلىق ءىس-شارالار اتقارىلماق. ۇلتتىق سالت-ءداستۇر مەن تاريحتى جاڭعىرتۋ ماقساتىندا حالىق كوپ جينالاتىن ورىندارعا بارىپ, جالپىحالىقتىق ۆيكتورينا ۇيىمداستىرىلماق. سونىمەن بىرگە, كومەككە ءزارۋ زەينەتكەرلەر مەن جاسى كەلگەن قاريالارعا دا قول ۇشىن بەرۋ, وزەن اڭعارلارى مەن ساياباقتاردى تازالاپ, اعاش وتىرعىزۋ سىندى بىرقاتار يگى ىستەرگە مۇرىندىق بولماق.
ەل الدىنا ۇلكەن مىندەتتەر قويىپ, ونى جۇزەگە اسىرۋدىڭ مەملەكەتتىك تەتىكتەرىن انىقتاپ بەرگەن مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن قولداۋ ماقساتىندا ءوتىپ جاتقان ايتۋلى شارا اپتا بويى ەلىمىزدىڭ تۇكپىر-تۇكپىرىندە جالعاسادى. ءىس-شارانى استانا قالاسى جاستار ساياساتى ماسەلەلەرى جونىندەگى باسقارماسى ۇيىمداستىرىپ وتىر.
ايا ءومىرتاي,
«ەگەمەن قازاقستان»