19 قازاندا پرەزيدەنتتىڭ «اقوردا» رەزيدەنتسياسىندا قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى ب.بايبەكتىڭ توراعالىعىمەن مەملەكەتتىك باسقارۋ تيىمدىلىگىن ارتتىرۋ ماسەلەلەرى جونىندە رەسپۋبليكالىق سەمينار ءوتتى.
سەمينار شەڭبەرىندە مەملەكەتتىك باسقارۋ, باقىلاۋ قىزمەتى تيىمدىلىگىن جەتىلدىرۋ جانە وڭىرلەر رەيتينگىن ءوتكىزۋ ماسەلەلەرى تالقىلاندى. سونداي-اق, ەلباسى جارلىعىنا سايكەس جۇرگىزىلەتىن مەملەكەتتىك ورگاندار قىزمەتىنىڭ تيىمدىلىگىن جىل سايىنعى باعالاۋ جۇيەسىنە ايرىقشا كوڭىل ءبولىندى.
سەميناردىڭ جۇمىسىنا پرەزيدەنت اكىمشىلىگىنىڭ جانە پرەمەر-مينيستر كەڭسەسىنىڭ جاۋاپتى قىزمەتكەرلەرى, رەسەي فەدەراتسياسى پرەزيدەنتىنىڭ باقىلاۋ باسقارماسىنىڭ دەلەگاتسياسى, سونداي-اق ورتالىق اتقارۋشى ورگانداردىڭ جاۋاپتى حاتشىلارى مەن استانا, الماتى قالالارىنىڭ, وبلىستار اكىمدەرىنىڭ اپپارات باسشىلارى قاتىستى.
رەسەي فەدەراتسياسى پرەزيدەنتىنىڭ كومەكشىسى – باقىلاۋ باسقارماسىنىڭ باستىعى ك.چۋيچەنكو رەسەي فەدەراتسياسى پرەزيدەنتىنىڭ تاپسىرمالارى مەن باسقا دا شەشىمدەرىن ىسكە اسىرۋ ءۇشىن باقىلاۋدى قامتاماسىز ەتۋ ماسەلەسى بويىنشا ءوز تاجىريبەسىمەن ءبولىستى.
بايلانىس جانە اقپارات ءمينيسترى ا.جۇماعاليەۆ «ەلەكتروندىق ۇكىمەت تۋرالى», مەملەكەتتىك قىزمەت ىستەرى اگەنتتىگىنىڭ توراعاسى ءا.بايمەنوۆ «مەملەكەتتىك قىزمەتتىڭ قازاقستاندىق ۇلگىسى تۋرالى» باياندامالار جاسادى.
پىكىر الماسۋ قورىتىندىلارى بويىنشا مەملەكەتتىك ورگاندار قىزمەتىنىڭ تيىمدىلىگىن ودان ءارى ارتتىرۋ جونىندە ناقتى تاپسىرمالار بەرىلدى.
«ەگەمەن-اقپارات».