ەكسپو-2017 كورمەسى كەزىندە تەمىر جول كولىگىمەن استانا قالاسىنا جولاۋشىلاردى تاسىمالداۋ ءوسىمى وبلىسارالىق باعىتتار بويىنشا 23%-عا, ال حالىقارالىق باعىتتار بويىنشا 10%-عا ۇلعايدى.
اتاپ ايتقاندا, استانا قالاسىنا تەمىر جول كولىگىمەن 1,46 ملن جولاۋشى كەلدى. ەلىمىزدىڭ ايماقتارىنان 1,43 ملن جولاۋشى, تمد مەملەكەتتەرىنەن 31,3 مىڭ جولاۋشى كەلدى.
جولاۋشىلار كوپ كەلگەن ايماقتار دا انىقتالدى. الماتى قالاسى مەن الماتى وبلىسىنان 245 مىڭ جولاۋشى, وڭتۇستىك ايماقتاردان 207 مىڭ, پاۆلودار وبلىسىنان 176 مىڭ, اقمولا وبلىسىنان 173 مىڭ, قوستاناي وبلىسىنان 160 مىڭ, قاراعاندى وبلىسىنان 125 مىڭ جانە شىعىس قازاقستان وبلىسىنان 105 مىڭ جولاۋشى ساپارلاعان.
سونىمەن قاتار, اقتوبە مەن اتىراۋ وبلىستارىنان قاتىنايتىن پويىزدارمەن ساپارلاعان جولاۋشىلار سانى ارتقان. بۇل كەزەڭدە استاناعا اقتوبەدەن 57 مىڭ, اتىراۋدان 47 مىڭ جولاۋشى كەلگەن.
ايتا كەتۋ كەرەك, كورمە ۇيىمداستىرىلعان كەزەڭدە جولاۋشىلار تاسىمالىن قامتاماسىز ەتۋ ءۇشىن استانا قالاسىنا جۇرەتىن باعىتتاردىڭ سانى 44-تەن 57-گە دەيىن كوبەيتىلىپ, 13 جولاۋشى جانە قالا ماڭى پويىزى ىسكە قوسىلدى.