قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسى بارىسىندا قارجى ءمينيسترى باقىت سۇلتانوۆ سالىق كودەكسىنىڭ جاڭا جوباسىندا جانە ىلەسپە زاڭ جوباسىندا قاراستىرىلعان مەملەكەت پەن سالىق تولەۋشى اراسىنداعى ءوزارا قارىم-قاتىناستى ىرىقتاندىرۋ تۋرالى باياندادى.
مينيستر مەملەكەتتىك كىرىستەر ورگاندارى مەن سالىق تولەۋشى اراسىنداعى ءوزارا ءىس-قيمىلدىڭ ايقىن ەرەجەلەرىن بەكىتۋ ماقساتىندا زاڭدىلىق قاعيداتى, تيىمدىلىك قاعيداتى جانە تاۋەكەلگە باعدارلانعان اكىمشىلىكتەندىرۋ قاعيداتى سياقتى سالىقتىق اكىمشىلىكتەندىرۋدىڭ قاعيداتتارى ەنگىزىلەتىنىن باياندادى.
سالىق ءتارتىبىن ارتتىرۋدى ىنتالاندىرۋ ماقساتىندا تاۋەكەلدەردى باسقارۋ جۇيەسى تۇبەگەيلى قايتا قارالادى. سالىق تولەۋشىلەردىڭ ءتۇرلى ساناتتارى ءۇشىن سالىقتىق اكىمشىلىكتەندىرۋگە ارتاراپتاندىرىلعان ءتاسىل ەنگىزىلۋدە.
«الەمنىڭ كوپتەگەن ەلدەرىندە سالىق تولەۋشىلەردى ساناتتاۋ قۇپيا, «جابىق» اقپارات بولىپ تابىلاتىنىن اتاپ وتكەن ءجون. ءبىز بولساق, «اشىق كريتەريلەردى» قاراستىراتىن قۇرامداستىرىلعان ۇلگىنى ەنگىزۋدى ۇسىنامىز, ول سالىق تولەۋشىلەرگە تاۋەكەلدىڭ تومەن دارەجەسى «جاسىل ايماققا» ەنۋ ءۇشىن باعدار جانە «قىزىل ايماققا» تۇسۋدەن ەسكەرتۋ بولماق», — دەپ اتاپ ءوتتى باقىت سۇلتانوۆ.
جوبادا سەنىم مەن اشىقتىقتىڭ قاعيداتتارىنا نەگىزدەلگەن ءىرى سالىق تولەۋشىلەرمەن ءوزارا ءىس-قيمىلدىڭ جاڭا ءتۇرى – دەڭگەيلەس مونيتورينگ قاراستىرىلعان. مۇنداي ءتاسىل ەىدۇ ەلدەرىندە پايدالانىلاتىن اكىمشىلىكتەندىرۋدىڭ ىلگەرىندى ادىستەرىنىڭ ءبىرى بولىپ تابىلادى.
زاڭ جوباسىندا ارەكەتسىز سالىق تولەۋشىلەردى ماجبۇرلەپ جويۋ ءۇشىن نەگىزگى شارتتار قاراستىرىلعان. اتالعان ءراسىمنىڭ اشىقتىعىن قامتاماسىز ەتۋ ماقساتىندا ماجبۇرلەپ جويۋ تۋرالى اقپارات الدىن الا باق-تا جاريالانادى, جانە وسى كومپانيالاردىڭ الەۋەتتى كرەديتورلارىنىڭ شاعىمدارىمەن جۇمىس جۇرگىزىلۋدە.
«سالىقتىق تەكسەرۋلەر تۇرعىسىنان ولاردىڭ سانىن قىسقارتۋ مەن ساپاسىن ارتتىرۋعا باعىتتالعان شارالار قاراستىرىلعان»,— دەپ باسا ايتتى مينيستر.
اتاپ ايتقاندا, جوسپاردان تىس تەكسەرىستەر جۇرگىزۋ ءۇشىن نەگىزدەمەلەر 56%-عا قىسقاردى.
كودەكس جوباسىندا ليتسەنزيالىق باقىلاۋدى ىرىقتاندىرۋ قاراستىرىلعان. سونداي-اق, ققس قايتارۋ راسىمدەرىن وڭتايلاندىرۋ بويىنشا شارالار قاراستىرىلعان.
ىلەسپە زاڭ جوباسىندا اكىمشىلىكتەندىرۋ تۇرعىسىنان بىرقاتار زاڭنامالىق اكتىلەرگە تۇزەتۋلەر قاراستىرىلعان.
ء«سوز سوڭىندا اكىمشىلىكتەندىرۋدى جەتىلدىرۋ بويىنشا بارلىق جاڭاشىلدىقتار بيزنەستىڭ دامۋىنا ءسوزسىز وڭ اسەر ەتەتىنىن جانە سالىق ورگاندارىنىڭ جۇمىسىنىڭ قازىنالىق ادىستەرىنەن بيزنەسپەن سەرىكتەستىك قاتىناستارعا كوشۋدى قامتاماسىز ەتەدى», - دەپ تۇيىندەدى مينيستر.
ەستەرىڭىزگە سالساق, بۇگىن ۇكىمەت وتىرىسىندا «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قر كودەكسىنىڭ جوباسى جانە ىلەسپە زاڭ جوباسى تۋرالى ماسەلە قارالدى.