استانادا وتكەن حالىقارالىق ەكسپو-2017 كورمەسى اياقتالار تۇستا «شىمكەنت» اكك مەن «روساتوم ورتالىق ازيا» ايماقتىق ورتالىعى ءوزارا ىنتىماقتاستىق پەن ارىپتەستىك كەلىسىمىنە قول قويدى. ونىڭ ماقساتى - وڭتۇستىك قازاقستان وبلىسىندا شاعىن سۋ ەلەكتر ستانتسياسى مەن باسقا دا بالامالى ەنەرگيا سالاسىن دامىتۋ, سونداي-اق, تابيعات قورىن ءتيىمدى پايدالانۋ مەن ساقتاۋ بولىپ تابىلادى. قۇجاتقا «شىمكەنت» اكك باسقارما توراعاسى ايتمۇحاممەد الداجاروۆ پەن «روساتوم ورتالىق ازيا» باس ديرەكتورى ۆيتالي دراگۋنوۆ قول قويدى.
قوس تاراپ وڭتۇستىكتىڭ تاۋلى ايماقتارىندا قۋاتتىلىعى 2مۆت-قا دەيىنگى, كونتەينەر تيپتەس شاعىن سۋ ستانتسيالارىن سالۋدىڭ يننوۆاتسيالىق پيلوتتىق جوباسىن بىرگە قۇرماق. كەلىسىلگەن ارىپتەستىك بويىنشا وسى جىلدىڭ قىركۇيەك ايىنىڭ وزىندە ماماندار ستانتسيالاردى سالۋعا جانە سۋ جيناۋ قۇرىلعىسى مەن كونتەينەرلەردى ورناتۋعا قولايلى ورىنداردى انىقتاۋ ءۇشىن العاشقى تەحنيكالىق ءىس-ساپارمەن كەلەدى دەپ جوسپارلانۋدا.
كونتەينەردەگى شاعىن سەس شىعارۋمەن «روساتوم» مەملەكەتتىك كورپوراتسياسىنىڭ «اتومەنەرگوماش» كومپانياسىنىڭ قۇرامىنا كىرەتىن ۆەنگريانىڭ Ganz Engineering and Energetics Machinery llc. (Ganz EEM) كومپانياسى اينالىسادى. شاعىن سەس-تەردى تۇرعىندارى ەلەكتر جەلىسىنە قوسىلماعان ايماقتاردا قولدانۋعا بولادى. شاعىن سەس تۋربيناسى جانە باسقارۋ تەتىگى بار كونتەينەرلەر جەتكىزىلگەن سوڭ ءبىر ايدان كەيىن 1مۆت-قا دەيىن ەلەكتر ەنەرگياسىن وندىرە الادى. ايتا كەتەيىك, شاعىن سەس قاشىقتىقتان, سپۋتنيكالىق بايلانىس ارقىلى باسقارىلادى. قازىر شاعىن سەس-تەردى وزگە ەلدەرگە ەكسپورتتاۋ بويىنشا كەلىسسوزدەر جۇرگىزىلۋدە.
وڭتۇستىك قازاقستاننىڭ تاۋ, وزەندەرىنىڭ مول الەۋەتىن ەسكەرگەن تاراپتار العاشقى جوبا اياقتالعان سوڭ دا ءارى قاراي بىرگە جۇمىس ىستەپ, وقو اكىمدىگىنىڭ قولداۋىمەن شاعىن سۋ ەنەرگەتيكاسى سالاسىنداعى باسقا دا جوبالاردى جۇزەگە اسىرۋعا نيەتتى.
«شىمكەنت» الەۋمەتتىك-كاسىپكەرلىك كورپوراتسياسى» ۇلتتىق كومپانياسى» اق مەملەكەتتىڭ 100 پايىز قاتىسىمەن 2011 جىلى قۇرىلعان. كومپانيا ءىس-ارەكەتىنىڭ نەگىزگى باعىتى - ءتيىمدى مەملەكەتتىك-جەكەمەنشىك ارىپتەستىك مەحانيزمى ارقىلى وڭتۇستىك قازاقستان وبلىسىنىڭ الەۋمەتتىك-ەكونوميكالىق دامۋى, وبلىستاعى اكتيۆتەر مەن رەسۋرستار الەۋەتىن جۇزەگە اسىرۋ, وبلىس, رەسپۋبليكا, جاقىن جانە الىس شەتەل نارىعىن بارىنشا جۇزەگە اسىرۋعا نەگىزدەلگەن.
ال «روساتوم ورتالىق ازيا» - «روساتومنىڭ» ورتالىق ازيا ايماعىنداعى وكىلدىگى. كەڭسە «روساتومنىڭ» الەمنىڭ ءتۇرلى ەلدەرىندەگى حالىقارالىق جەلىسىنە جاتادى. ايماقتىق ورتالىقتاردى «روساتوم حالىقارالىق جەلىسى» (رمس) كومپانياسى باسقارادى. رمس-ءتىڭ نەگىزگى تاپسىرماسى - مەملەكەتتىك كورپوراتسيانىڭ شەتەل نارىعىنداعى ءىس-ارەكەتىن قولداۋ, جاڭا بيزنەس-مۇمكىندىكتەردى ىزدەۋ, رەسەي اتوم سالاسىنىڭ ونىمدەرى مەن قىزمەتىن جاھاندىق نارىقتا ۇسىنۋ, ءتيىمدى بيزنەس-اليانس قۇرۋدا كومەك كورسەتۋ, «روساتوم» كاسىپورىندارىن ماركەتينگ جانە اقپاراتتىق قولداۋ بولىپ تابىلادى.