وبلىس ورتالىعىنىڭ كوشەلەرىندە ەرەكشە جول بەلگىلەرى پايدا بولدى. جاياۋ جۇرگىنشىلەر كوپ جۇرەتىن جەرلەرگە ورناتىلعان وسىنداي بەلگىلەر كۇن قۋاتىمەن جۇمىس ىستەيدى.
ديودتى شامدار ءتۇنى بويى جارىق شاشىپ, اينالانى نۇرلاندىرىپ تۇرادى. مۇنىڭ ءوزى جۇيتكىپ كەلە جاتقان كولىك يەلەرىنە الىس قاشىقتىقتان بەرىلەتىن ەسكەرتۋ دەسە دە بولادى. مۇنداي كومەكشى قوندىرعىلاردى قويۋ مەكتەپ ماڭدارىنان باستاۋ الدى.
– بۇل بەلگىلەر «جاياۋ جۇرگىنشىلەر جولى 5.16» دەپ اتالادى. كۇن ەنەرگياسى ارقىلى زاريادتالاتىن ءبىر قوندىرعى 700 مىڭ تەڭگە تۇرادى. جارىقتى ون ەسەگە دەيىن ۇلعايتا الاتىن جاڭاشىل ءۇردىس تۇرعىندار تاراپىنان ۇلكەن قولداۋعا يە بولىپ وتىر,–دەيدى پەتروپاۆل قالالىق جولاۋشىلار كولىگى جانە اۆتوموبيل جولدارى ءبولىمىنىڭ باس مامانى ازات بەيسەنبين.
قالادا ورنالاسقان 80 باعدارشامدى دا ءتيىمدى قۋات كوزىنە كوشىرۋ جوسپارلانعان.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى