جاقىندا تارباعاتاي اۋدانىنىڭ ورتالىعى – اقسۋات اۋىلىندا تولىقتاي كۇردەلى جوندەۋدەن وتكەن 2000 ورىندىق ستاديون سالتاناتتى تۇردە اشىلىپ, ەل يگىلىگىنە پايدالانۋعا بەرىلدى.
اۋىلدىڭ اجارىن كىرگىزگەن سپورت نىسانىنداعى فۋتبول الاڭىنا 20 ميلليون تەڭگەگە جاساندى توسەنىش توسەلىپ, ەنى 10 مەتر, ۇزىندىعى 400 مەتر بولاتىن جۇگىرۋ جولى اسفالتتالىپتى. سونىمەن قاتار ستاديونعا 1250 جاڭا ورىندىق ورناتىلىپ, ونداعى اكىمشىلىك عيماراتتىڭ شاتىرى جاڭالانىپتى. «وسى جۇمىستاردىڭ بارلىعىنا ۇزىن سانى 80 ميلليون تەڭگەگە جۋىق قاراجات جۇمسالدى. ستاديوننىڭ ادام تانىماستاي وزگەرۋىنە اۋداننان شىققان ىسكەر ازاماتتار, وسىنداعى كاسىپورىندار مەن مەكەمەلەر, ءتىپتى قاراپايىم تۇرعىندارعا دەيىن ءبىر كىسىدەي اتسالىستى. تۋعان جەرگە جاناشىر ازاماتتارعا العىستان باسقا ايتارىمىز جوق. بارقىتبەل باۋرايىنداعى جۇرت ەلباسىنىڭ «رۋحاني جاڭعىرۋ» باعدارلاماسىنا وسىلايشا ءۇن قاتىپ, ۇلەس قوسىپ جاتقان جايى بار. جالپى, بيىل كاسىپكەرلەر ەسەبىنەن اۋدان بيۋدجەتىنە 200 ميلليون تەڭگەدەن استام ينۆەستيتسيا سالىندى. ءوسىپ-ونگەن مەكەنىن وركەندەتسەم دەيتىن جانى جومارت جانداردىڭ قاتارىنىڭ كوبەيىپ كەلە جاتقانى قۋانتادى», دەيدى تارباعاتاي اۋدانىنىڭ اكىمى دىلدابەك ورازباەۆ.
ەكى مىڭ ورىنعا شاقتالعان ستاديوندا ءبىر مەزگىلدە سپورتتىڭ بىرنەشە تۇرىمەن شۇعىلدانۋعا بولادى. ايناداي جارقىراعان سپورت نىسانىنىڭ اشىلعانىنا اۋىلدىڭ جاسامىسى دا, جاسى دا ءدان ريزا. «اۋداننان 10 الەم چەمپيونى شىققان. بۇل ستاديون الداعى ۋاقىتتا ءبىزدىڭ جاستارىمىزدىڭ اراسىنان الەم, وليمپيادا چەمپيوندارىنىڭ شىعۋىنا سەپتىگىن تيگىزەدى دەپ ويلايمىز», دەيدى سپورت ارداگەرى بولات ورازعاليەۆ.
ازامات قاسىم, «ەگەمەن قازاقستان»
شىعىس قازاقستان وبلىسى, تارباعاتاي اۋدانى