ەلوردادا جالعاسقان ءداستۇرلى ءراسىم

 مۇنداي ءراسىم 1851 جىلى لوندون قالاسىندا وتكەن دۇنيەجۇزىلىك ءبىرىنشى كورمەدەن باستاپ داستۇرگە اينالعان. بيىلعى ماراپات ارقىلى ەكسپو-2017  حالىقارالىق مامانداندىرىلعان كورمەسىنىڭ قاتىسۋشىلارىن «بولاشاقتىڭ ەنەرگياسى» تاقىرىبىنداعى جوبالاردى جۇزەگە اسىرۋدى جالعاستىرۋعا جانە وسى باعىتتاعى بىرەگەي يدەيالاردى دامىتۋعا ىنتالاندىرۋ كوزدەلگەن.  

ەلباسىنان باستاپ, ەرىكتىلەرگە دەيىن ماراپاتتالدى

سالتاناتتى باسقوسۋدا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ەكسپو-2017 كورمەسىن جوعارى دەڭ­گەيدە وتكىزۋگە تىكەلەي اتسا­لىس­قانى ءۇشىن حالىقارالىق كور­مەلەر بيۋروسىنىڭ ءبىرىنشى التىن مەدالىن ەنشىلەدى. ماراپاتتى «استانا ەكسپو-2017» ۇك» اق باس­شىسى احمەتجان ەسىموۆكە تابىستاعان بيۋرو پرەزيدەنتى ستين كريستەنسەن ەلباسى مەن قازاقستان ۇكىمەتىنە ءبىلىم بەرۋ, يننوۆاتسيالار جانە ىنتى­ماق­تاستىقتىڭ نەگىزگى قۇن­دى­لىق­تا­رىنا قولداۋ ءبىلد­ىرىپ, بو­لا­شاقتىڭ ەنەرگياسى سا­لا­سىنداعى جا­ھاندىق ىنتى­ماق­تاس­تىققا قوسقان ولشەۋ­سىز ۇلەسى ءۇشىن العىس ايتتى. 

ەكىنشى التىن مەدال اۋقىمدى شارانى تابىستى وتكىزۋدە ايانباي ەڭبەك ەتكەن ەكسپو-2017 كورمەسىنىڭ حالىقارالىق قاتىسۋ­شى­لارىنا بەرىلدى. ودان بولەك, حالىقارالىق كورمەلەر بيۋروسى «استانا ەكسپو-2017» ۇك» اق ۇجىمىنا كاسىبيلىگى مەن حالىقارالىق قاتىسۋشىلارعا قولداۋ بىلدىرگەنى ءۇشىن «ابىروي» مەدالىن تابىستادى. ءدال وسىنداي ەكىنشى مەدالعا ەرەكشە قوناقجايلىلىق تانىتىپ, الەم ازاماتتارىنا شابىت سىيلاعان استانا قالاسى مەن ونىڭ تۇر­عىن­دارى لايىق دەپ تانىلدى. سىيلىق ەلوردا اكىمى اسەت يسەكەشەۆكە تاپسىرىل­دى. تاعى ءبىر «ابىروي» مەدالى قاتىسۋ­شى­لاردى كوپتەپ تارتا بىلگەنى ءۇشىن كورمە كوميسسارى ءراپىل جوشىباەۆقا بەرىلدى. سونىمەن قاتار ەكسپو-2017 كورمەسىنىڭ اينى­ماس بولشەكتەرىنە اينالعان ەرىك­تى­لەر مەن قوعاممەن بايلانىس دە­پار­تامەنتىنىڭ قىزمەتكەرلەرى ارنايى سەرتيفيكاتتارمەن ماراپاتتالدى. 

«عارىش» سىيلىعى ستۋدەنتتەرگە بەرىلدى

افريكانىڭ وڭتۇستىگىندە ورنالاسقان لەسوتو كورولدىگىنىڭ ۇلت­تىق ۋنيۆەرسيتەتى ەكسپو-2017 كورمەسى اياسىن­دا­عى «عارىش» سىيلىعىن جە­ڭىپ الدى. جاپوندىق ەكسپو-90 حا­لىقارالىق قورى مەن حا­لىق­ارالىق كورمەلەر بيۋ­رو­سىنىڭ الەۋمەتتىك جوباسى بولىپ سانالاتىن ماراپات كورمە تاريحىندا بەسىنشى مارتە تابىستالدى. بۇل سىيلىق «بولاشاقتىڭ ەنەرگياسى» سالاسىنداعى ۇزدىك يننوۆاتسيالىق جوبانى انىقتاۋعا باعىتتالعان. 

الەمنىڭ تۇكپىر-تۇكپىرىنەن كەلىپ تۇسكەن وتىنىمدەر اراسىندا لەسوتو ستۋدەنتتەرىنىڭ كۇن قۋا­تىن جينايتىن جوباسى ۇزدىك دەپ تانىلعان. ەكسپو-2017 كور­مەسى قالاشىعىندا وتكەن جەڭىم­پاز­داردى ماراپاتتاۋ راسى­مىن­دە حالىقارالىق كورمەلەر بيۋروسى باس ديرەكتورىنىڭ ورىن­باسارى ديميتري كەركەنزەس لەسوتو پاۆيلونىنىڭ كوميسسا­رى­نا «عارىش» سىيلىعى مەن 20 مىڭ ەۋرو قارجىلاي سىيلىق سەرتيفيكاتىن تابىس ەتتى. 

لەسوتو ۇلتتىق ۋنيۆەرسيتەتى – اۋىلدىق جەرلەرگە ارنالعان جاڭعىرمالى ەنەرگيا تەحنولوگياسىن دامىتىپ كەلە جاتقان اكادەميالىق زەرتتەۋ وقۋ ورنى. ونداعى ستۋدەنتتەر ويلاپ تاپقان كۇن ەنەرگياسىن جينايتىن ارزان قۇرىلعى اۋىلدىق جەرلەردە اس دايىنداپ, ءۇي جىلىتۋعا مۇمكىندىك بەرەدى. ادىلقازىلار «جاسىل» تەحنولوگيانى دامىتۋ ارقىلى از قامتىلعان وتبا­سى­لار­دىڭ تۇرمىسىن جاق­سار­تۋعا جانە قورشاعان ورتانى قورعاۋعا سەپتىگىن تيگىزەدى دەپ ەسەپتەيدى. 

التىندى رەسەي الدى

حالىقارالىق پاۆيلوندار «كورمە ديزاينى» جانە «كورمە تاقىرىبىنىڭ اشىلۋى» اتتى ەكى سانات بويىنشا باعالاندى. قازىلار القاسى قۇرامىنا كورمە, ساۋ­لەت جانە حالىقارالىق كور­مەلەر سالاسىنداعى 9 ساراپشى ەنگەن. بىرلەسكەن پاۆيلوندار اراسىندا «كورمە ديزاينى» ساناتى بويىنشا التىن جۇلدە كاريب قوعامداستىعى پلازاسىنا بەرىلسە, كۇمىس جۇلدەنى تىنىق مۇحيتى پلازاسى قانجىعالادى. قولا جۇلدە لاتىن امەريكاسى پلا­زاسىنا بۇيىردى. «كورمە تا­قى­رىبىنىڭ اشىلۋى» ساناتىندا التىن – تاجىكستانعا, كۇمىس – گانا رەسپۋبليكاسىنا, قولا ۋكراي­ناعا تابىستالدى. 

اۋماعى 400 شارشى مەتردەن كەم پاۆيلوندار اراسىندا «كورمە ديزاينى» بويىنشا التىن جۇلدەنى پولشا جەڭىپ الدى. كۇمىس جۇلدەنى – سلوۆاكيا, قولا جۇلدەنى لاتۆيا ەنشىلەدى. «كورمە تاقىرىبىنىڭ اشىلۋى» اتالىمىندا التىندى  فين­ليان­ديا­لىق پاۆيلون الدى. كۇمىس جۇل­دە – سينگاپۋرعا, قولا جۇلدە چە­حياعا بۇيىردى. 400 جانە 700 شار­شى مەتر اۋماعى بار پاۆيل­وندار ىشىندە «كورمە ديزاينى» ساناتىندا التىن جۇلدەگە قاتار لايىق دەپ تانىلدى. كۇمىستى ازەربايجان, قولانى موناكو كنيازدىگى ەنشىلەدى. «كورمە تاقىرىبىنىڭ اشىلۋى» ساناتىندا شۆەيتساريا ۇزدىك دەپ تانىلدى. قالعان ەكى ورىن ماجارستان مەن ۇندىستانعا تابىس ەتىلدى. 

700 شارشى مەتر جانە ودان كوپ اۋماعى بار پاۆيلوندار اراسىندا باسەكە قىزا ءتۇستى. «كورمە ديزاينى» بويىنشا التىن جۇلدە رەسەيگە بەرىلسە, كۇمىس جۇلدەنى – ۇلىبريتانيا, قولا جۇلدەنى كورەيا رەسپۋبليكاسى الدى. «كورمە تاقىرىبىنىڭ اشىلۋى» ساناتىندا التىن جۇلدەمەن – گەرمانيا فەدەرا­تيۆ­تىك رەسپۋبليكاسى, كۇمىس جۇل­دەمەن – قىتاي حالىق رەس­پۋب­ليكاسى, قولا جۇلدەمەن فرانتسۋز رەسپۋبليكاسى ماراپاتتالدى. 

اسحات رايقۇل,

"ەگەمەن قازاقستان"

سۋرەتتى تۇسىرگەن ەرلان ومار,

"ەگەمەن قازاقستان"